ម៉ាឡេស៊ី ថា បទឈប់បាញ់កម្ពុជា-ថៃ ជាសមិទ្ធផលដ៏ធំមិនធ្លាប់មាន សម្រាប់អាស៊ាន

ក្នុងសុន្ទរកថាអំឡុងទិវាអាស៊ានលើកទី៥៨ នៅថ្ងៃសុក្រទី៨ខែសីហាឆ្នាំ២០២៥ នាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម បានសាទរចំពោះបទឈប់បាញ់កម្ពុជា-ថៃ ហើយប្រកាសថា បទឈប់បាញ់យ៉ាងរហ័សនិងមានប្រសិទ្ធភាពនេះគឺជាសមិទ្ធផលដ៏ធំមិនធ្លាប់មានពីមុនមកសម្រាប់អាស៊ាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសម្តីលោក អាន់វ៉ា ដែលយកមកចុះផ្សាយដោយសារព័ត៌មាន Bernama, បទឈប់បាញ់នេះ បង្ហាញពីការប្តេជ្ញាចិត្តយ៉ាងមុតមាំពីសំណាក់មេដឹកនាំរបស់អាស៊ាន ក្នុងការដោះស្រាយជម្លោះ។

ស្របពេលជាមួយគ្នានោះដែរ លោកអះអាងថា ភាគជោគជ័យនេះអាចកើតឡើងបាន តាមរយៈកិច្ចសហប្រតិបត្តិការជាច្រើនកម្រិត ដែលពាក់ព័ន្ធនឹងនាយករដ្ឋមន្ត្រីនិងរដ្ឋមន្ត្រីការបរទេសកម្ពុជា-ថៃ, កងកម្លាំងប្រដាប់អាវុធរបស់ប្រទេសទាំងពីរ និងទំនុកចិត្តដែលកសាងឡើងក្នុងចំណោមមេដឹកនាំអាស៊ាន។

សូមជម្រាបជាថ្មី ដោយមានម៉ាឡេស៊ីជាម្ចាស់ផ្ទះ, កិច្ចប្រជុំ GBC ថ្នាក់រដ្ឋមន្ត្រីការពារជាតិកម្ពុជា-ថៃ ដោយមានការចូលរួមសង្កេតការណ៍ពីម៉ាឡេស៊ីផ្ទាល់ សហរដ្ឋអាមេរិក និងចិន កាលពីថ្ងៃព្រហស្បតិ៍ គឺភាគីទាំងពីរ បានឯកភាពគ្នាទៅលើលក្ខខណ្ឌមួយចំនួនពាក់ព័ន្ធនឹងបទឈប់បាញ់ និងការរៀបចំយន្តការតាមដានសម្រាប់ការអនុវត្តលើបទឈប់បាញ់នេះ។

ក្នុងនោះ កម្ពុជា-ថៃ បានជំរុញរៀបចំឲ្យបានឆាប់រហ័សបំផុត និងដាក់ឲ្យអនុវត្តនូវយន្តការតាមដាន ត្រួតពិនិត្យពីក្រុមសង្កេតការណ៍អាស៊ានលើការអនុវត្តបទឈប់បាញ់។

សហរដ្ឋអាមេរិកនិងចិន បានប្រកាសបន្តគាំទ្របទឈប់បាញ់ ព្រមទាំងគាំទ្រជាភស្តុភាកម្ម សម្ភារបច្ចេកទេសសំខាន់ៗ និងឃ្លាំមើលយ៉ាងយកចិត្តទុកដាក់លើការអនុវត្តបទឈប់បាញ់ដោយភាគីកម្ពុជា និងថៃ។

ចំណែក ប្រទេសម៉ាឡេស៊ី ដែលជាប្រធានប្តរូវេនអាស៊ាននៅឆ្នាំនេះវិញ ក៏បានប្រកាសថា នឹងបន្តដើរតួនាទីជាអ្នកសម្របសម្រួលដោះស្រាយជម្លោះកម្ពុជា-ថៃ ទៅតាមការឯកភាពដោយភាគីទាំងពីរ៕

អត្ថបទ៖ សុខ សុវណ្ណ

ចុចអាន៖ ប្រមុខការពារជាតិកម្ពុជា​សង្ឃឹមថាថៃ អនុវត្តស្មារតីកិច្ចប្រជុំវិសាមញ្ញ GBC ដោយតម្លាភាព ស្មោះត្រង់ គោរពបទឈប់បាញ់ដើម្បីសុខសន្តិភាពកងទ័ព និងប្រជាជន