ព័ត៌មានអន្ដរជាតិ

យោធាអ៊ីស្រាអែល ប្រាប់ពីមូលហេតុដែលផ្លោងគ្រាប់ស្ទួនគ្នាដាក់មន្ទីរពេទ្យនៅហ្គាហ្សា ស្លាប់មនុស្ស២០នាក់

បានផុស

១០ ខែ មុន

នៅ

ថ្ងៃពុធ ២៧ សីហា ២០២៥

ដោយ

Chheang

យោធាអ៊ីស្រាអែលបាននិយាយថា ការវាយប្រហារស្ទួនគ្នារបស់ខ្លួនទៅលើមន្ទីរពេទ្យ Nasser នៃតំបន់ហ្គាហ្សាដែលសម្លាប់មនុស្ស២០នាក់ក្នុងនោះមានទាំងអ្នកកាសែត៥នាក់ គឺសំដៅទៅលើកាមេរ៉ាឃ្លាំមើល និងគ្នីគ្នាក្រុមសកម្មប្រយុទ្ធជាច្រើននាក់របស់ក្រុមហាម៉ាសដែលខ្លួនបានកំណត់អត្តសញ្ញាណនៅកន្លែងនោះ។

អ្នកថតរូបរបស់ Reuters ដែលរងរបួសនៅក្នុងការវាយប្រហាររបស់អ៊ីស្រាអែលថ្ងៃទី២៥សីហា២០២៥ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់ Sky News កាលពីថ្ងៃទី២៦ខែសីហាឆ្នាំ២០២៥ កងកម្លាំងការពារអ៊ីស្រាអែល (IDF) បានអះអាងថា ទាហានបានបញ្ជាឲ្យធ្វើការវាយប្រហារ បន្ទាប់ពីបានកំណត់ថា កាមេរ៉ានៅលើមូលដ្ឋានមន្ទីរពេទ្យត្រូវបានប្រើប្រាស់ដោយពួកសកម្មប្រយុទ្ធដើម្បីសង្កេតមើលកងកម្លាំងអ៊ីស្រាអែល។ យោធាបានអះអាងបន្ថែមថា ៦នាក់ក្នុងចំណោមអ្នកស្លាប់នៅក្នុងការវាយប្រហារគឺជា «ភេរវករ» ដែលជាផ្នែកមួយនៃការអះអាងដ៏យូររបស់ខ្លួនដែលថា ប្រតិបត្តិករហាម៉ាសប្រើប្រាស់ទីតាំងវេជ្ជសាស្រ្តសម្រាប់បិទបាំង។

រដ្ឋបាលមន្ទីរពេទ្យ Nasser បានច្រានចោលការអះអាងទាំងនេះយ៉ាងដាច់អហង្ការ ដោយចាត់ទុកថា ការលើកឡើងបែបនេះគ្រាន់តែជាលេសសម្រាប់អ៊ីស្រាអែលវាយប្រហារលើទីតាំងវេជ្ជសាស្ត្រតែប៉ុណ្ណោះ។ ការវាយប្រហាររបស់អ៊ីស្រាអែលដែលត្រូវបានថ្កោលទោសយ៉ាងខ្លាំងពីអន្តរជាតិ បានសម្លាប់អ្នកកាសែតមកពីទីភ្នាក់ងារព័ត៌មាន Reuters, Associated Press, Al Jazeera និង Middle East Eye។ យ៉ាងណាមិញ IDF បាននិយាយថា អ្នកកាសែតមិនមែនជាគោលដៅនៃការធ្វើវាយប្រហារនោះទេ។

អង្គការសុខភាពពិភពលោក (WHO) ក៏បានរាយការណ៍ផងដែរថា បុគ្គលិកសុខាភិបាល ៤នាក់ ក៏ស្ថិតក្នុងចំណោមអ្នកស្លាប់ផងដែរ។ ចំណែកអគ្គលេខាធិការអង្គការសហប្រជាជាតិ លោក Antonio Guterres បានសង្កត់ធ្ងន់ថា ការសម្លាប់នេះ «គូសបញ្ជាក់ពីហានិភ័យខ្លាំង ដែលបុគ្គលិកពេទ្យ និងអ្នកកាសែតប្រឈមមុខ» ហើយបានរំលឹកឡើងវិញនូវការអំពាវនាវឲ្យមានបទឈប់បាញ់។ រដ្ឋមន្ត្រីការបរទេសអង់គ្លេស David Lammy និងប្រធានាធិបតីបារាំង Emmanuel Macron ក៏បានសម្តែងការភ័យរន្ធត់ និងខឹងសម្បារផងដែរ៕