អ្នកដំណើរភ័យបុកពោះ ក្រោយផ្ទុះឆេះ Power bank លើយន្តហោះក្រុមហ៊ុន Xiamen Airlines

យោងតាមការចេញផ្សាយរបស់ Shanghai Daily មាន Power bank មួយបានផ្ទុះឆេះលើយន្តហោះរបស់ក្រុមហ៊ុន អាកាសចរណ៍ Xiamen Airlines ក្នុងប្រទេសចិនបង្កជាចលាចល ខណៈយន្តហោះរៀបនឹងចេញដំណើរទៅហើយ។

បើតាមអ្នកនិយមលេងអ៊ីនធឺណិតម្នាក់បានបង្ហោះវីដេអូដែលអះអាងថាកាលពីថ្ងៃទី ២៨ ខែសីហា មានPower bank មួយបានផ្ទុះឆេះនៅក្នុងកាប៊ីនយន្តហោះរបស់ក្រុមហ៊ុនអាកាសចរណ៍ Xiamen Airlines មុនពេលហោះឡើងបញ្ចេញផ្សែងពេញយន្តហោះជំរុញឱ្យមានការជម្លៀសអ្នកដំណើរ។ ឧបទ្ទវហេតុនេះបានកើតឡើងនៅលើជើងហោះហើរលេខMF 8086 ជាយន្តហោះ Boeing 737 ប៉ុន្តែមិនមានអ្នករងរបួសនោះទេ។

នៅរសៀលដដែលនោះ បុគ្គលិកក្រុមហ៊ុន Xiamen Airlines បានបញ្ជាក់ថា ឧប្បត្តិហេតុពិតជាបានកើតឡើងមែន តែយ៉ាងណាត្រូវបានដោះស្រាយបានភ្លាមៗ ទប់ស្កាត់ហានិភ័យទាន់ពេល ហើយទីបំផុតជើងហោះហើរបានចាកចេញដោយសុត្ថិភាព ទោះបីមានការពន្យារពេលក៏ដោយ។

ហេតុការណ៍នេះបានកើតឡើងតែប៉ុន្មានសប្ដាហ៍ បន្ទាប់ពីជើងហោះហើរ KLMរបស់ប្រទេសហូឡង់ថ្មីៗនេះកាលពីថ្ងៃទី៦ ខែសីហា មាន Power bank ចេញផ្សែងលើយន្តហោះ តែត្រូវបានពន្លត់ភ្លាមៗ និងអនុញ្ញាតឱ្យយន្តហោះចុះចតដោយសុវត្ថិភាពនៅទីក្រុង Amsterdam ។

គួរបញ្ជាក់ថាឧប្បត្តិហេតុទាំងនេះបង្ហាញពីគ្រោះថ្នាក់នៃដុំសាកថ្មទូរសព្ទដែលងាយនឹងឡើងកំដៅ និងផ្ទុះឆេះ ហើយជាមូលហេតុដែលក្រុមហ៊ុនអាកាសចរណ៍មានការដាក់កម្រិតលើយក Power bank តាមខ្លួនពេលជិះយន្តហោះ ដោយសារព្រួយបារម្ភអំពីសុវត្ថិភាពដែលកើតមានហេតុការណ៍ស្រដៀងគ្នាបន្ថែមទៀត៕

អត្ថបទ៖ ប៊ុន សុភាព