នាយករដ្ឋមន្ត្រីឥណ្ឌា ជួប​ជាមួយ​ប្រមុខ​រដ្ឋាភិបាល​មីយ៉ាន់ម៉ា ដើម្បី​ជំរុញ​ទំនាក់ទំនង​ទ្វេភាគី

នាយករដ្ឋមន្ត្រីឥណ្ឌា លោក ណារិនដ្រា ម៉ូឌី (Narendra Modi) បានជួបពិភាក្សាជាមួយមេដឹកនាំរបបយោធាមីយ៉ាន់ម៉ា លោកឧត្តមសេនីយ មីន អ៊ុងឡាំង (Min Aung Hlaing) ក្នុងអំឡុងពេលទៅចូលរួមកិច្ចប្រជុំកំពូលរបស់អង្គការសហប្រតិបត្តិការសៀងហៃនៅទីក្រុង Tianjin ប្រទេសចិន។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Anadolu នៅថ្ងៃទី០១ខែកញ្ញា។

កិច្ចប្រជុំបានផ្តោតលើការពង្រីកកិច្ចសហប្រតិបត្តិការលើវិស័យពាណិជ្ជកម្ម ការតភ្ជាប់ ថាមពល ការជីកយករ៉ែកម្រ និងសន្តិសុខ។ លោក ម៉ូឌី បានសង្កត់ធ្ងន់លើតួនាទីយុទ្ធសាស្ត្ររបស់មីយ៉ាន់ម៉ានៅក្នុងគោលនយោបាយ Act East និង Neighborhood First របស់ឥណ្ឌាផងដែរ។

លោក មីន អ៊ុងឡាំង ដែលទើបឡើងកាន់តួនាទីជាប្រធានាធិបតីស្តីទីបន្ទាប់ពីបានដកស្ថានការណ៍ក្នុងគ្រាអាសន្នរបស់ប្រទេសមីយ៉ាន់ម៉ាបានសន្យាថានឹងពង្រឹងទំនាក់ទំនងនៅមុនការបោះឆ្នោតដែលបានគ្រោងទុករបស់ប្រទេសនេះ។

គួរបញ្ជាក់ថា ប្រទេសឥណ្ឌា និងមីយ៉ាន់ម៉ា មានព្រំដែនជាប់គ្នា ១,៦៤៣ គីឡូម៉ែត្រ ជាមួយនឹងរបបចលនាសេរី ដែលអនុញ្ញាតឱ្យធ្វើដំណើរឆ្លងកាត់ព្រំដែនសម្រាប់អ្នកស្រុកក្បែរគ្នា។ ទោះបីជាយ៉ាងណាក៏ដោយ ជម្លោះដែលកំពុងបន្តនៅក្នុងប្រទេសមីយ៉ាន់ម៉ាបានរុញច្រានជនស៊ីវិលរាប់ពាន់នាក់ និងសូម្បីតែទាហាន ចូលទៅក្នុងប្រទេសឥណ្ឌា ដោយបញ្ជាក់ពីភាពបន្ទាន់នៃកិច្ចសហប្រតិបត្តិការកាន់តែជិតស្និទ្ធ៕

អត្ថបទ៖ ប៊ុន សុភាព