ឥណ្ឌូណេស៊ី បណ្តេញមន្ត្រីប៉ូលិស ជុំវិញការស្លាប់ អ្នកបើកម៉ូតូដឹកជញ្ជូន ដែលបង្កបាតុកម្មយ៉ាងហិង្សា

យោងតាមការចេញផ្សាយរបស់ទីភ្នាក់ងារព័ត៌មាន Reuters គណៈកម្មការប៉ូលិសឥណ្ឌូណេស៊ីបានបណ្តេញមន្ត្រីម្នាក់កាលពីថ្ងៃពុធ បន្ទាប់ពីរកឃើញថាមានពិរុទ្ធពីបទរំលោភក្រមសីលធម៌លើតួនាទី ដែលបានសម្លាប់អ្នកបើកបរដឹកជញ្ជូនបង្កឲ្យមានការបន្តការតវ៉ាយ៉ាងហិង្សាប្រឆាំងរដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីប៉ូលិសដែលត្រូវបានបណ្ដេញចេញមានឈ្មោះ Cosmas K. Gae បន្ទាប់ពីរថយន្តប៉ូលិសបានបុកអ្នកបើកបរដឹកជញ្ជូនម្នាក់អាយុ ២១ ឆ្នាំ ឈ្មោះAffan Kurniawan ក្នុងអំឡុងពេលការតវ៉ាទូទាំងប្រទេសកាលពីសប្តាហ៍មុន។ ការសម្លាប់នេះបានបង្កឱ្យមានកំហឹងចំពោះវិសមភាពសេដ្ឋកិច្ច និងអត្ថប្រយោជន៍ដ៏ច្រើនសន្ធឹកសន្ធាប់របស់សមាជិកសភា ធ្វើឱ្យបាតុកម្មក្លាយជាហិង្សាកាន់តែខ្លាំង។

ប៉ូលិសជាតិបាននិយាយថា Cosmas បានប្រព្រឹត្ត «ដោយគ្មានវិជ្ជាជីវៈ» និងបានចេញការបណ្តេញចេញភ្លាមៗ ទោះបីជា Cosmasបានបដិសេធថាមិនមានចេតនាបង្កគ្រោះថ្នាក់ក៏ដោយ។ មន្ត្រី​ប៉ូលិស៦​នាក់​ផ្សេង​ទៀត​ក៏​ត្រូវ​បាន​ចាប់​ខ្លួន​ផង​ដែរ​។

គួរបញ្ជាក់ថានៅក្នុងភាពចលាចលក្នុងប្រទេសឥណ្ឌូណេស៊ីប៉ុន្មានថ្ងៃនេះបានធ្វើឱ្យមនុស្សយ៉ាងហោចណាស់ ១០ នាក់ស្លាប់ និង២០ នាក់បាត់ខ្លួននៅទូទាំងតំបន់ជាច្រើន ដែលជំរុញឱ្យមានការដាក់ពង្រាយយោធានៅក្នុងទីក្រុងហ្សាកាតា៕

អត្ថបទ៖ ប៊ុន សុភាព