លោក ស៊ី និងលោក ពូទីន ខ្សឹបគ្នា​អំពី​រឿង​ជីវិត​អមតៈ និង​លទ្ធភាពធ្វើ​ឲ្យ​មនុស្ស​រស់​ដល់​អាយុ​១៥០​ឆ្នាំ

ក្នុងអំឡុងពេលព្យុហយាត្រាយោធានៅទីក្រុងប៉េកាំងកាលពីថ្ងៃទី​៣​ខែកញ្ញាឆ្នាំ​២០២៥ ប្រធានាធិបតីចិន ស៊ី ជីនពីង និងប្រធានាធិបតីរុស្ស៊ី វ៉្លាឌីមៀរ ពូទីន ត្រូវបានបែកធ្លាយ​សំឡេង​​នៅលើមីក្រូហ្វូន ខណៈ​កំពុងពិភាក្សា​គ្នា​អំពី​បច្ចេកវិទ្យាជីវសាស្រ្ត​​ផ្លាស់​ប្តូរសរីរាង្គ ការ​ធ្វើ​ឲ្យ​អាយុ​វែង និងលទ្ធភាពនៃការរស់នៅរបស់មនុស្សរហូតដល់​អាយុ ១៥០​ឆ្នាំ។ មេដឹកនាំកូរ៉េខាងជើង លោក គីម ជុងអ៊ុន ក៏មានវត្តមានសម្រាប់ព្រឹត្តិការណ៍នេះផង​ដែរ និងកំពុងដើរជាមួយមេដឹកនាំទាំងពីរ នៅពេលអំឡុង​​ការ​សន្ទនារវាង​លោក ពូទីន និង​លោក ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកបកប្រែសម្រាប់លោក ពូទីន ត្រូវបានគេឮថា ភាពជឿនលឿននៃបច្ចេកវិទ្យាជីវសាស្រ្ត រួមទាំងសមត្ថភាពក្នុងការប្តូរសរីរាង្គជាបន្តបន្ទាប់ អាចជួយមនុស្សឲ្យ«រស់នៅក្មេងជាងវ័យ» និង«សូម្បីតែសម្រេចបាននូវភាពអមតៈ»។ ជាការឆ្លើយតប លោក ស៊ី បានកត់សម្គាល់ថា «អ្នកខ្លះព្យាករថានៅក្នុងសតវត្សនេះ មនុស្សអាចមានអាយុដល់ទៅ ១៥០ឆ្នាំ»។

ក្នុង​សន្និសីទ​សារព័ត៌មាន​ក្រោយ​មក លោក ពូទីន បាន​បញ្ជាក់​ថា ការ​សន្ទនា​នេះ​ពិត​បាន​កើត​ឡើងមែន។ លោកបានរៀបរាប់យ៉ាងលម្អិតថា ការរីកចម្រើនផ្នែកវេជ្ជសាស្រ្តទំនើប រួមទាំង«ការវះកាត់ដែលទាក់ទងនឹងការជំនួសសរីរាង្គ» ផ្តល់​ឲ្យ​មនុស្សជាតិ «នូវ​ក្ដី​សង្ឃឹមថា ជីវិតសកម្មនឹងបន្តខុសពីសព្វថ្ងៃនេះ»។

សូម​រឭកថា ទាំង​មេដឹកនាំរុស្ស៊ី និង​មេដឹកនាំ​ចិន សុទ្ធតែ​​ធ្លាប់​​បង្ហាញចំណាប់អារម្មណ៍លើអាយុវែង និងបច្ចេកវិទ្យាជីវសាស្ត្រ។ កាលពី​ឆ្នាំ​២០២៤ លោក ពូទីន បានបញ្ជា​ឲ្យ​បង្កើតវិទ្យាស្ថានស្រាវជ្រាវដែលគាំទ្រដោយរដ្ឋរុស្ស៊ី ផ្តោតលើអាយុវែង ការធ្វើ​ឲ្យ​កោសិការស់​ឡើងវិញ និងការជួសជុល​សរីរាង្គ៕

ដោយ៖ ឈាង