ព័ត៌មានអន្ដរជាតិ

មេដឹកនាំអឺរ៉ុបនឹងជួបប្រជុំនៅវ៉ាស៊ីនតោន ខណៈលោក ត្រាំ រៀបចំទណ្ឌកម្មថ្មីលើរុស្ស៊ី

បានផុស

១០ ខែ មុន

នៅ

ថ្ងៃចន្ទ ៨ កញ្ញា ២០២៥

ដោយ

Chheang

សេតវិមាន បានប្រកាសកាលពីថ្ងៃអាទិត្យទី៧ខែកញ្ញាថា មេដឹកនាំអឺរ៉ុបនឹងធ្វើដំណើរទៅកាន់សហរដ្ឋអាមេរិកនៅដើមសប្តាហ៍នេះ ដើម្បីសម្របសម្រួលកិច្ចខិតខំប្រឹងប្រែងជាមួយប្រធានាធិបតី ដូណាល់ ត្រាំ លើការបញ្ចប់សង្រ្គាមនៅក្នុងប្រទេសអ៊ុយក្រែន។

លោក វ៉្លាឌីមៀរ ពូទីន និងលោក ដូណាល់ ត្រាំ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បាននិយាយទៅកាន់អ្នកសារព័ត៌មានបន្ទាប់ពីប្រទេសរុស្ស៊ីបានទម្លាក់គ្រាប់បែកដ៏ធំបំផុតរបស់ខ្លួនលើអ៊ុយក្រែនថា លោកក៏នឹងជួបពិភាក្សាដោយផ្ទាល់ជាមួយប្រធានាធិបតីរុស្ស៊ីលោក វ៉្លាឌីមៀរ ពូទីន នាពេលឆាប់ៗនេះផងដែរ។ លោកបានបន្ថែមថា ក្រុងវ៉ាស៊ីនតោនបានត្រៀមខ្លួនជាស្រេចក្នុងការឈានទៅរក«ដំណាក់កាលទីពីរ»នៃទណ្ឌកម្មលើក្រុងមូស្គូ។

យ៉ាងណាមិញ លោក ត្រាំ មិនបានបញ្ជាក់ថា មេដឹកនាំអឺរ៉ុបរូបណាខ្លះទេដែលនឹងទៅជួបប្រជុំនៅទីក្រុងវ៉ាស៊ីនតោន។

ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បានស្វាគមន៍ចំពោះលទ្ធភាពនៃការដាក់ទណ្ឌកម្មកាន់តែខ្លាំងលើរុស្ស៊ី ដោយចាត់ទុកថាវាជា«គំនិតដ៏ត្រឹមត្រូវ»។ បន្ថែមពីនេះ លោកបានជំរុញឲ្យអឺរ៉ុបបញ្ឈប់ការនាំចូលថាមពលទាំងអស់ពីប្រទេសរុស្ស៊ី។ លោក ហ្សេលេនស្គី បានប្រាប់ថា «យើងត្រូវតែបញ្ឈប់ថាមពលគ្រប់ប្រភេទពីរុស្ស៊ី ព្រមទាំងកិច្ចព្រមព្រៀងណាមួយក៏ដោយជាមួយរុស្ស៊ី។ យើងមិនអាចមានកិច្ចព្រមព្រៀងបានទេ ប្រសិនបើយើងចង់បញ្ឈប់ពួកគេ»។

ការអត្ថាធិប្បាយរបស់លោក ហ្សេលេនស្គី បានកើតឡើងប៉ុន្មានម៉ោងបន្ទាប់ពីកងកម្លាំងរុស្ស៊ីបានបើកការវាយប្រហារដោយប្រើយន្តហោះគ្មានមនុស្សបើកយ៉ាងហោចណាស់ ៨១០គ្រឿង និងមីស៊ីល ១៣គ្រាប់នៅអ៊ុយក្រែន ដោយសម្លាប់មនុស្ស ៤នាក់ និងធ្វើឲ្យខូចខាតអគាររដ្ឋាភិបាលសំខាន់របស់រដ្ឋធានីកៀវជាលើកដំបូង។

អគាររដ្ឋាភិបាលអ៊ុយក្រែនដែលរងការវាយប្រហារពីរុស្ស៊ី (រូបថត៖ AP)

យោងតាមមជ្ឈមណ្ឌលស្រាវជ្រាវថាមពល និងខ្យល់ស្អាត ចាប់តាំងពីការចាប់ផ្តើមការលុកលុយទ្រង់ទ្រាយធំរបស់ខ្លួននៅក្នុងខែមីនាឆ្នាំ២០២២ ប្រទេសរុស្ស៊ីរកចំណូលបានប្រហែល ៩៨៥ពាន់លានដុល្លារពីការនាំចេញប្រេង និងឧស្ម័ន។ ចិន និងឥណ្ឌា គឺជាអ្នកទិញធំជាងគេ ខណៈដែលសហភាពអឺរ៉ុបបានកាត់បន្ថយការទិញយ៉ាងគំហុក ហើយបានសន្យាថានឹងបញ្ឈប់ការទិញទាំងនោះទាំងស្រុងនៅឆ្នាំ២០២៧។

កាលពីខែមុន សហរដ្ឋអាមេរិកបានដំឡើងពន្ធ ៥០% លើទំនិញឥណ្ឌា ដើម្បីឆ្លើយតបនឹងការបន្តនាំចូលប្រេងរបស់ក្រុងញ៉ូវដេលីពីរុស្ស៊ី។ ប្រទេសឥណ្ឌាបានទទូចថា ខ្លួននឹងបន្តកិច្ចព្រមព្រៀងជាមួយរុស្ស៊ី ដើម្បីការពារផលប្រយោជន៍សេដ្ឋកិច្ចរបស់ខ្លួន។ ទន្ទឹមនឹងនេះ ប្រទេសរុស្ស៊ីបានសន្យាក្នុងអំឡុងពេលកិច្ចពិភាក្សានៅទីក្រុងប៉េកាំងកាលពីសប្តាហ៍មុន ក្នុងការពង្រីកការផ្គត់ផ្គង់ឧស្ម័នទៅកាន់ប្រទេសចិន៕

ដោយ៖ ឈាង

ចុចអាន៖ អគាររដ្ឋាភិបាលអ៊ុយក្រែន រងការវាយប្រហារតាមអាកាសពីរុស្ស៊ី