ប៉ូឡូញ បាញ់ទម្លាក់​ដ្រូន​រុស្ស៊ី ដោយ​ចោទ​ថា​រំលោភ​ដែន​អាកាស​របស់​ខ្លួន

យោង​តាម​ការ​ចុះផ្សាយ​របស់ BBC នៅ​ថ្ងៃ​ទី​១០​ខែ​កញ្ញា​ឆ្នាំ​២០២៥ ប្រទេសប៉ូឡូញ បាន​ឲ្យ​ដឹង​​ថា ខ្លួនបានបាញ់ទម្លាក់ដ្រូន​រុស្ស៊ី​នៅលើទឹកដីរបស់ខ្លួនកាល​ពី​ព្រឹក​ថ្ងៃ​ពុធ​នេះ បន្ទាប់ពីការរំលោភបំពានដែនអាកាស​ប៉ូឡូញ​ម្តងហើយម្តងទៀត ក្នុងអំឡុងពេលការវាយប្រហារទ្រង់ទ្រាយធំរបស់​ក្រុង​មូស្គូ​លើអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កងកម្លាំងប្រដាប់អាវុធប៉ូឡូញ បានប្រកាសថា យន្តហោះយោធា​របស់​ខ្លួន​កំពុង​ប្រតិបត្តិការ បាញ់​ទម្លាក់​«វត្ថុនានា»ដែលហោះ​ឆ្លងកាត់ព្រំដែន​ដោយ​ខុស​ច្បាប់។

បញ្ជាការប្រតិបត្តិការនៃកងកម្លាំងប្រដាប់អាវុធ បាន​ប្រកាស​នៅ​បណ្ដាញ​សង្គម X ថា «ក្នុងអំឡុងពេលនៃការវាយប្រហារថ្ងៃនេះដោយសហព័ន្ធរុស្ស៊ីសំដៅទៅលើប្រទេសអ៊ុយក្រែន ដែនអាកាសរបស់យើងត្រូវបានរំលោភបំពានម្តងហើយម្តងទៀតដោយដ្រូន»។

យោងតាមរដ្ឋបាលអាកាសចរណ៍សហព័ន្ធអាមេរិក ឧបទ្ទវហេតុនេះ បានជំរុញ​ឲ្យ​មានការបិទអាកាសយានដ្ឋាន​ប៉ូឡូញ ​Chopin នៅទីក្រុង Warsaw និងអាកាសយានដ្ឋាន Rzeszow-Jasionka ជាបណ្តោះអាសន្ន ដែលជាមជ្ឈមណ្ឌលសំខាន់សម្រាប់ការធ្វើដំណើរ និងការផ្ទេរអាវុធទៅកាន់ប្រទេសអ៊ុយក្រែន។ មន្ត្រីយោធាប៉ូឡូញមិនបានបញ្ជាក់ពីការបិទភ្លាមៗនោះទេ។

អនុរដ្ឋមន្ត្រីក្រសួងការពារជាតិ​ប៉ូឡូញ​លោក Cezary Tomczyk បាន​ប្រាប់​ថា ប្រតិបត្តិការ​ត្រូវបានចាប់ផ្តើម «ដើម្បីកម្ចាត់​វត្ថុដែលបានរំលោភបំពាន និងហួសព្រំដែននៃសាធារណរដ្ឋប៉ូឡូញ» ហើយបានជំរុញ​​ឲ្យ​ពលរដ្ឋធ្វើតាមការប្រកាសជាផ្លូវការពីកងទ័ព និងប៉ូលិស។

មុននេះ កងទ័ពអាកាសរបស់អ៊ុយក្រែន បាន​ប្រកាស​ថា ដ្រូន​របស់រុស្ស៊ីបានឆ្លងចូលទៅក្នុងប្រទេសប៉ូឡូញដែលជាសមាជិកណាតូ ហើយបានគំរាមកំហែងទីក្រុង Zamosc។

នៅទីក្រុងវ៉ាស៊ីនតោន សមាជិកព្រឹទ្ធសភាអាមេរិក លោក Dick Durbin បានព្រមានថា សកម្មភាពរបស់ទីក្រុងមូស្គូ អាចជាការប៉ុនប៉ងដើម្បីសាកល្បងការឆ្លើយតបរបស់អង្គការណាតូ។ លោកបានសរសេរនៅលើ X ថា «បន្ទាប់ពីការសម្លាប់រង្គាលដែល​ពូទីនបន្តធ្វើដាក់អ៊ុយក្រែន ការ​លុកលុយ​ទាំងនេះមិនអាច​មិន​អើពើបានទេ»៕

ដោយ៖ ឈាង