រថយន្តដឹកទាហានថៃមួយក្រុម ធ្លាក់ជ្រោះ ពេលធ្វើដំណើរទៅជួយប្រយុទ្ធនៅភាគខាងត្បូង 

រថយន្តយោធាដែលដឹកទាហានថៃមួយក្រុម ឆ្ពោះទៅភាគខាងត្បូង ដើម្បីជួយកងកម្លាំងកំពុងប្រយុទ្ធជាមួយក្រុមផ្តាច់ខ្លួនមូស្លីម បានធ្លាក់ជ្រោះនៅខេត្ត Songkhla។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Khaosod នៅថ្ងៃព្រហស្បតិ៍ទី១១ខែកញ្ញាឆ្នាំ២០២៥ រថយន្តនោះមានដឹកទាហានថៃចំនួន៨នាក់ បានដាច់ហ្វ្រាំងធ្លាក់ជ្រោះនៅចំណុចភូមិលេខ១៦ ឃុំ Na Thawi នៃស្រុក Na Thawi។

សេចក្តីរាយការណ៍ខាងលើបានឲ្យដឹងថា ទាហានទាំង៨មិនមានគ្រោះថ្នាក់ដល់ជីវិតឡើយ គ្រាន់តែរបួសប៉ុណ្ណោះ ហើយត្រូវបញ្ជូនទៅព្យាបាលនៅមន្ទីរពេទ្យស្រុក Na Thawi។

សូមជម្រាបថា ការប្រយុទ្ធគ្នាកំពុងផ្ទុះឡើងយ៉ាងខ្លាំងក្លា នៅខេត្ត Songkhla ភាគខាងត្បូង ពេលដែលកងកម្លាំងសន្តិសុខថៃ បើកប្រតិបត្តិការរុះរើ​​ភូមិ Baan Huai Tao ក្នុងស្រុក Saba Yoi បន្ទាប់ពីរបាយការណ៍ស៊ើបការណ៍បង្ហាញថា ក្រុមបះបោរម​ូស្លីមកំពុងលាក់ខ្លួននៅក្នុងតំបន់នោះ។

ការ​វាយឆ្មក់​នេះ​ ​បណ្តាលឲ្យ​ផ្ទុះអាវុធទ្រង់ទ្រាយធំ​រវាង​អាជ្ញាធរ និង​ក្រុមតស៊ូ ហើយក្រោយមក កងកម្លាំងសន្តិសុខ បានបិទតំបន់នោះ ដើម្បីរារាំង​ជនសង្ស័យពីការរត់គេចខ្លួន និងរក្សាការគ្រប់គ្រងយ៉ាងតឹងរ៉ឹងលើស្ថានការណ៍។

រហូតមកដល់ពេលនេះ ប្រតិបត្តិការកំពុងដំណើរការនៅឡើយ ហើយនៅតែមិនទាន់មានសេចក្តីរាយការណ៍អំពីមនុស្ស​ស្លាប់ឬ​របួស៕

អត្ថបទ៖ សុខ សុវណ្ណ

ចុចអាន៖ កងកម្លាំងសន្តិសុខថៃ កំពុង​ឡោមព័ទ្ធក្រុមបះបោរក្នុងខេត្ត Songkhla