លទ្ធផល​បោះឆ្នោតរបស់ប្រទេសមីយ៉ាន់ម៉ានឹងត្រូវ​ប្រកាសនៅចុង​ខែ​មករា ឆ្នាំ​២០២៦

គណៈកម្មាធិការរៀបចំការបោះឆ្នោតដែលគ្រប់គ្រងដោយយោធារបស់ប្រទេសមីយ៉ាន់ម៉ាបាននិយាយថាលទ្ធផលនៃការបោះឆ្នោតនាពេលខាងមុខរបស់ប្រទេសនឹងត្រូវបានប្រកាសនៅចុងខែមករាឆ្នាំ ២០២៦។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១២ខែសីហា។

ការបោះឆ្នោតត្រូវបានកំណត់ថានឹងចាប់ផ្តើមនៅថ្ងៃទី ២៨ ខែធ្នូ ដោយធ្វើឡើងជាបីដំណាក់កាលក្នុងរយៈពេលមួយខែ។ នៅក្នុងការបោះឆ្នោតលើកនេះ មានតែគណបក្សចំនួនប្រាំមួយប៉ុណ្ណោះដែលនឹងប្រកួតប្រជែងដណ្តើមយកអាសនៈនៅក្នុងសភាជាតិ ខណៈដែលគណបក្សសរុបចំនួន ៥៧ នឹងចូលរួមនៅទូទាំងប្រទេស តិចជាងចំនួនគណបក្សនៅក្នុងការបោះឆ្នោតឆ្នាំ ២០២០។

គួរបញ្ជាក់ថារបបយោធាបានដណ្តើមអំណាចនៅឆ្នាំ ២០២១​ បន្ទាប់ពីផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី បានគ្រោងរៀបចំការបោះឆ្នោតជាជំហានឆ្ពោះទៅរកការបញ្ចប់ជម្លោះស៊ីវិល។ ទោះបីជាយ៉ាងណាក៏ដោយ លោកស្រី ស៊ូជី នៅតែជាប់ពន្ធនាគារ គណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រីត្រូវបានដកចេញ ហើយអ្នកសង្កេតការណ៍អន្តរជាតិចាត់ទុកដំណើរការនេះថាជាមធ្យោបាយមួយដើម្បីពង្រឹងការគ្រប់គ្រងដោយយោធាឲ្យស្របច្បាប់ប៉ុណ្ណោះ។

ទឹកដីដ៏ធំរបស់ប្រទេសនេះនៅតែស្ថិតនៅក្រៅការគ្រប់គ្រងដោយយោធា ដោយក្រុមគាំទ្រលទ្ធិប្រជាធិបតេយ្យ និងកងកម្លាំងប្រដាប់អាវុធជនជាតិភាគតិចបានប្តេជ្ញាថានឹងរារាំងការបោះឆ្នោតនៅក្នុងទឹកដីរបស់ពួកគេ។ ហានិភ័យផ្នែកសន្តិសុខ ជំរឿនខុសឆ្គងដែលខកខានមនុស្ស ១៩ លាននាក់ និងការប៉ះទង្គិចគ្នាជាបន្តបន្ទាប់បង្កើនការសង្ស័យលើភាពជឿជាក់ និងវិសាលភាពនៃការបោះឆ្នោត។ អ្នក​វិភាគ​ព្រមាន​ថា ក្នុងអំឡុងពេលនៃ​ការ​បោះឆ្នោត​អាច​បង្ក​ឲ្យ​មាន​អំពើ​ហិង្សា​កាន់​តែ​ខ្លាំង ខណៈ​របប​យោធា និង​ក្រុម​ប្រឆាំងបន្ត​ប៉ះ​ទង្គិច៕

អត្ថបទ៖ ប៊ុន សុភាព