ព័ត៌មានអន្ដរជាតិ

លោក Rubio និយាយធូរខ្សុយ រឿងដ្រូនរុស្ស៊ីរំលោភដែនអាកាសប៉ូឡូញ ខណៈអឺរ៉ុបប្រតិកម្មបែកខ្ទិះ

បានផុស

៩ ខែ មុន

នៅ

ថ្ងៃអាទិត្យ ១៤ កញ្ញា ២០២៥

ដោយ

រដ្ឋមន្ត្រីការបរទេសអាមេរិក លោក ម៉ាកូ រ៉ូប៊ីអូ (Marco Rubio) បាននិយាយថា ទីក្រុងវ៉ាស៊ីនតោនចង់ទទួលបានព័ត៌មានបន្ថែមទៀតអំពីឧប្បត្តិហេតុយន្តហោះគ្មានមនុស្សបើក (ដ្រូន) ដែលប្រទេសប៉ូឡូញចោទប្រកាន់ភាគីរុស្ស៊ីអំពីការរំលោភដែនអាកាសដោយចេតនា ហើយនឹងពិគ្រោះយោបល់អំពីរឿងនេះជាមួយសម្ព័ន្ធមិត្តណាតូ មុនពេលធ្វើការសន្និដ្ឋានណាមួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងការផ្សព្វផ្សាយរបស់ក្រសួងការបរទេសសហរដ្ឋអាមេរិក ដោយស្រង់ខ្លឹមសារឆ្លើយតបចំពោះអ្នកសារព័ត៌មាន លោក រ៉ូប៊ីអូ បាននិយាយថា៖«គ្មានការងឿងឆ្ងល់ទេដែលយន្តហោះគ្មានមនុស្សបើកទាំងនោះត្រូវបានបង្ហោះដោយចេតនា។ សំណួរគឺថាតើយន្តហោះគ្មានមនុស្សបើកត្រូវបានគេកំណត់គោលដៅទៅប្រទេសប៉ូឡូញឬអត់។ ជាពិសេស ប្រសិនបើមានករណីបែបនោះមែន ប្រសិនបើភស្តុតាងឲ្យយើងជឿនៅទីនោះមែន នោះច្បាស់ណាស់ថាវាជាការកើនឡើងការប្រឈមខ្ពស់»។

លោក រដ្ឋមន្រ្តី បានបន្ថែមថា៖«មានលទ្ធភាពផ្សេងៗជាច្រើនទៀតផងដែរ ប៉ុន្តែយើងឲ្យមានការពិត និងពិគ្រោះជាមួយសម្ព័ន្ធមិត្តរបស់យើង មុនយើងបង្ហាញការតាំងចិត្តជាក់លាក់»។

ប្រទេសនៅតំបន់អឺរ៉ុបជាពិសេសប្រទេសជាសមាជិករបស់អង្គការណាតូ បានប្រតិកម្មយ៉ាងខ្លាំងទៅនឹងការបង្ហោះដ្រូនរបស់រុស្ស៊ីចូលទៅក្នុងដែនអាកាសរបស់ប្រទេសប៉ូឡូញស្ថិតនៅជាប់ព្រំដែនជាមួយប្រទេសបេឡារុស។

ក្រោយការបាញ់ទម្លាក់យន្តហោះគ្មានមនុស្សបើកមួយចំនួនក្នុងចំណោម១៩គ្រឿង ដោយការត្រៀមបង្ការឧបទ្ទវហេតុណាមួយនៃការឈ្លានពានពីសំណាក់ប្រទេសរុស្ស៊ីនិងបេឡារុសដែលធ្វើលំហាត់សមយុទ្ធយោធាទ្រង់ទ្រាយធំ ឈ្មោះ «Zapad 2025» ប្រទេសប៉ូឡូញ បានដាក់ពង្រាយកងកម្លាំងរបស់ខ្លួនរហូត៤០០០០នាក់ ខណៈប្រទេសបារាំងបានបញ្ជូនយន្តហោះចម្បាំង៣គ្រឿង ប្រទេសហូឡង់បានបញ្ជូនកងកម្លាំង៣០០នាក់ និង ប្រទេសផ្សេងៗទៀត មានអង់គ្លេស អាល្លឺម៉ង់ ជាដើមសុទ្ធតែបានបញ្ជូនយន្តហោះចម្បាំងទៅការពារប៉ូឡូញ។

រដ្ឋមន្ត្រីការបរទេសអាមេរិក បាននិយាយថា ៖«នៅតែមានការប្រមូលផ្តុំព័ត៌មានជាច្រើនកំពុងកើតឡើង។ បើទោះជាវាមិនគួរកើតឡើង។ ខ្ញុំមិនគិតថានរណាម្នាក់សប្បាយចិត្តក្នុងការឃើញវាកើតឡើងនោះទេ»។

នៅព្រឹកថ្ងៃទី១០ ខែកញ្ញា កងទ័ពប៉ូឡូញបានកម្ទេច UAVs ជាច្រើនគ្រឿងដែលរំលោភដែនអាកាសរបស់ប្រទេស។ យោងតាមនាយករដ្ឋមន្រ្តី Donald Tusk ការរំលោភលើអាកាសចំនួន១៩ត្រូវបានកត់ត្រានៅយប់ថ្ងៃទី ៩-១០ ខែកញ្ញា។ ណាតូ តាមសំណើរបស់ប៉ូឡូញ បានកោះហៅមាត្រាទី ៤ នៃសន្ធិសញ្ញាអាត្លង់ទិកខាងជើង ដើម្បីចាប់ផ្តើមការពិគ្រោះយោបល់ក្នុងចំណោមសមាជិកសម្ព័ន្ធភាព៕

រ៉ាន់ រើយ