បុស្តិ៍ទូរទស្សន៍កូរ៉េខាងត្បូង KBS ចុះមកយកព័ត៌មានផ្ទាល់ពីការរងទុក្ខរបស់ប្រជាជនកម្ពុជាដោយសារថៃឈ្លានពាន

បុស្តិ៍ទូរទស្សន៍ដ៏ធំ KBS របស់កូរ៉េខាងត្បូងបានចុះមកថតផ្សាយផ្ទាល់ពីការខូចខាតនិងភាពរងទុក្ខវេទនារបស់ប្រជាជនខ្មែរនៅតាមបណ្ដោយព្រំដែនដោយសារថៃឈ្លានពានមកលើកម្ពុជា។

បើយោងតាមការចេញផ្សាយរបស់ KBS បានផ្សាយផ្ទាល់ដោយមានពិធីករជាច្រើននាក់និងបង្ហាញវីដេអូសកម្មភាពចុះមកយកព័ត៌មាននៅកម្ពុជានិងសម្កាសន៍ផ្ទាល់ពីខាងអ្នកយកព័ត៌មានរបស់ KBS ជាមួយប្រជាជនកម្ពុជា កងទ័ព ជាពិសេសប្រជាជននៅក្នុងជំរំជនភៀសសឹក ដែលមួយចំនួននៅតែភ័យខ្លាចការបាញ់ផ្លោងរបស់ថៃមិនទាន់វិលត្រឡប់ទៅផ្ទះវិញ។

នៅក្នុងវីដេអូដែលបានចេញផ្សាយនោះបានបង្ហាញសកម្មភាពជាច្រើន​ របស់អ្នកយកព័ត៌មានចុះទៅថតផ្ទាល់នៅទីតាំងជាច្រើននៅតាមព្រំដែនកម្ពុជា-ថៃ ដែលរងការខូចខាតពីយន្តហោះចម្បាំងទម្លាក់គ្រាប់បែកនិងការបាញ់ផ្លោងរបស់ថៃ។ ទីតាំងទាំងនោះមានដូចជា ផ្ទះសម្បែងរបស់ប្រជាពលរដ្ឋ វត្តអារាម​ សាលារៀន​ មណ្ឌលសុខភាព ដែលបណ្ដាលឲ្យប្រជាជនកម្ពុជាស្លាប់ រងរបួសនិងបាត់បង់ជម្រក ហើយថែមទាំងចុះទៅដល់កន្លែងមានគ្រាប់បែកមិនទាន់ផ្ទុះក្រោយថៃទម្លាក់ទៀតផង។

អ្នកយកព័ត៌មាន KBS ក៏បានទៅដល់ផ្ទាល់នៅទីតាំងដែលទាហានថៃរាយបន្លាលួសព័ទ្ធយកដីសហគមន៍ខ្មែរ និងបណ្ដេញប្រជាជនខ្មែរចេញ។ ក្នុងនោះមានទាំងការសម្ភាសន៍អ៊ំស្រីម្នាក់ដែលត្រូវបានទាហានថៃព័ន្ទបន្លាលួសយកផ្ទះរបស់គាត់ថា «ទាហានថៃបានដេញគាត់ចេញពីផ្ទះដោយទុក្ខពេលតែ២០នាទីប៉ុណ្ណោះដើម្បីយករបស់របរចេញពីផ្ទះ»។ ក្រៅពីនេះ ក៏មានការសម្ភាសប្រជាជនកម្ពុជាដែលបាត់បង់ផ្ទះសម្បែងដោសារការឈ្លានពាន ជាពិសេស បង្កាញពីភាពលំបាករបស់ប្រជាជនកម្ពុជានៅតាមជំរំជនភៀសសឹក​ ដែលចង់ឲ្យភាគីថៃឈប់ឈ្លានពានមកលើកម្ពុជា។

លើសពីនេះពិធីករ KBS បាននិយាយអំពីទាហានកម្ពុជាចំនួន១៨នាក់ដែលទាហានថៃចាប់ទៅនិងមិនទាន់ដោះលែងមកវិញនោះទេ បើទោះបីជាមានបទឈប់បាញ់ក៏ដោយ។ ពិធីករ KBS ក៏និយាយពីការបិទព្រំដែន និងការចាកចេញរបស់ពលករកម្ពុជាពីប្រទេសថៃដោយសារតែជម្លោះថៃនិងកម្ពុជា និងការភ័យខ្លាចព្រោះមានប្រជាជនថៃជាតិជានិយមមួយចំនួនបានប្រើហិង្សាធ្វើបាបពលករកម្ពុជា ដោយសូម្បីតែពលករមីយ៉ាន់ម៉ានៅក្នុងប្រទេសថៃក៏មានការភ័យខ្លាចដែរព្រោះពេលខ្លះពួកគេត្រូវបានប្រជាជនថៃយល់ច្រឡំថាជាខែ្មរ។

ចំពោះការចុះមកយកព៍ត័មានដល់ប្រទេសកម្ពុជាផ្ទាល់នេះ គឺដោយសារតែកន្លងមកមានតែការផ្សាយអំពីការខូចខាតពីភាគីខាងថៃ បំភ្លៃការពិត ខណៈភាគីកម្ពុជាមិនមានចុះផ្សាយពីការខូចខាត និងមិនបានដឹងពិតប្រាកដពីភាពរងទុក្ខវេទនារបស់ប្រជាជនស្លូតត្រង់កម្ពុជាដោយសារថៃឈ្លានពាននោះទេ។

គួរបញ្ជាក់ថានេះជាព័ត៌មានមួយទៀតបន្ទាប់ពីការចេញផ្សាយរបស់ពីសារព័ត៌មាន BBC ដែលចុះមកយកព័ត៌មានផ្ទាល់នៅកម្ពុជា ដោយការទៅថតផ្តិតយកលរូបភាពនិងសភាពនៃការខូចខាតផ្ទាល់ៗពីការឈ្លានពានរបស់ថៃតែម្ដង៕

អត្ថបទ៖ ប៊ុន សុភាព