ប្រធាន IOT ប្រាប់កងទ័ពថៃ នៅឲ្យស្ងៀម កុំបង្កហេតុ ទុកឲ្យ JBC ធ្វើ​ការ

ក្រោយកងកម្លាំងថៃប្រព្រឹត្តទង្វើយ៉ាងព្រៃផ្សៃលើពលរដ្ឋកម្ពុជានៅភូមិព្រៃចាន់ អនុព័ន្ធយោធាម៉ាឡេស៊ី ដែលជាប្រធានក្រុមអ្នកសង្កេតការណ៍អន្តរកាលអាស៊ាន (IOT) ប្រចាំប្រទេសថៃ បានជំរុញឲ្យថៃរក្សាភាពស្ងប់ស្ងាត់ និងបញ្ឈប់រាល់សកម្មភាពបង្កហេតុ ហើយ​អំពាវនាវ​ដល់​អាជ្ញាធរ​ថៃ ទុក​បញ្ហានេះឲ្យគណៈកម្មាធិការ​ព្រំដែន​ចម្រុះ (JBC) ធ្វើ​ការនិង​ដោះស្រាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Samsul Rizal Bin Musa បានបដិសេធសំណើរបស់ថៃ ដែលចង់ឲ្យលោកទៅមើលតំបន់ព្រំដែនដែលមានជម្លោះ ដោយលោកនិយាយថា សូមនៅស្ងៀមសិន និងបញ្ឈប់រាល់សកម្មភាពបង្កហេតុ រង់ចាំការប្រជុំ JBC និងការសម្រេចបន្ទាប់។

ដោយប្រើសម្តីបែបផ្លែផ្កាឲ្យថៃដែលតែងចោទកម្ពុជាថាជាអ្នកឈ្លានពាន អនុព័ន្ធយោធាម៉ាឡេស៊ីប្រាប់ឲ្យថៃកុំបារម្ភពេក កងទ័ពរបស់អ្នកខ្លាំងគ្មាននរណាអាចមកឈ្លានពានបានទេ។

ការទាត់ចោលសំណើរបស់ថៃនិងសម្តីពីអនុព័ន្ធយោធាម៉ាឡេស៊ីនេះ ហាក់បង្ហាញថា លោកដឹងយ៉ាងច្បាស់អំពីចេតនានិងចរិតដ៏ខូចរបស់ថៃ ដែលតែងទម្លាក់កំហុសលើកម្ពុជា និងចោទប្រកាន់ លាបពណ៌មិនចេះចប់។

អ្វីដែលកាន់តែគួរឲ្យកត់សម្គាល់គឺថា ក្រោយរឿងនេះនាយករដ្ឋមន្ត្រីម៉ាឡេស៊ី លោក Anwar Ibrahim ក៏ជំរុញឲ្យថៃ ចូលតុចរចា ដោះស្រាយជម្លោះព្រំដែនជាមួយកម្ពុជាដែរ។ 

នាយករដ្ឋមន្ត្រីម៉ាឡេស៊ីនិងជាប្រធានអាស៊ានឆ្នាំ២០២៥ លោក Anwar Ibrahim កាលពីថ្ងៃព្រហស្បតិ៍ទី១៨ខែកញ្ញា បានជួបសន្ទនាតាមទូរស័ព្ទជាមួយនាយករដ្ឋមន្ត្រីថៃ Anutin Charnvirakul ដោយក្នុងនោះ លោក Anwar បានជំរុញឲ្យភាគីថៃ ដោះស្រាយជម្លោះព្រំដែនជាមួយកម្ពុជា ដោយសន្តិវិធី និងនាំយកបញ្ហាទៅកាន់តុចរចា។

តាមរយៈការបង្ហោះលើបណ្តាញសង្គម Facebook របស់លោក Anwar, នាយករដ្ឋមន្ត្រីម៉ាឡេស៊ីរូបនេះសរសេរថា លោកនិងនាយករដ្ឋមន្ត្រីថៃ បានពិភាក្សាគ្នាអំពីការវិវត្តចុងក្រោយនៅតាមបណ្តោយព្រំដែនថៃ-កម្ពុជា។ លោកអំពាវនាវឲ្យភាគីទាំងពីរ រក្សាសន្តិភាពនិងចៀសវាងបង្កភាពតានតឹងដែលមិនចាំបាច់។

ទន្ទឹមនោះ លោក Anwar ក៏អំពាវនាវផងដែរឲ្យយកបញ្ហាដែលកើតឡើង ទៅដោះស្រាយនៅតុចរចា តាមរយៈកិច្ចប្រជុំគណៈកម្មាធិការព្រំដែនរួម (JBC )៕

អត្ថបទ៖ សុខ សុវណ្ណ

ចុចអាន៖ Reuters បកស្បែកមុខថៃ ជាកន្លែងចាប់ជម្រិតនិងមជ្ឈមណ្ឌលឆ្លងកាត់សម្រាប់ពួកបោកប្រាស់