ព័ត៌មានអន្ដរជាតិ

ត្រាំ និយាយថា សំណើអាវុធនុយក្លេអ៊ែររបស់ពូទីន «ស្តាប់ទៅដូចជាគំនិតល្អ»

បានផុស

៧ ខែ មុន

នៅ

ថ្ងៃចន្ទ ៦ តុលា ២០២៥

ដោយ

Chheang

ប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃអាទិត្យទី៥ខែតុលាថា សំណើរបស់ប្រធានាធិបតីរុស្ស៊ី លោក វ្ល៉ាឌីមៀរ ពូទីន ក្នុងការបន្តកិច្ចព្រមព្រៀងចំពោះការកម្រិតលើអាវុធនុយក្លេអ៊ែរចំនួនមួយឆ្នាំបន្ថែមទៀត «ស្តាប់ទៅដូចជាគំនិតល្អ»។

ការដាក់កម្រិតលើអាវុធនុយក្លេអ៊ែររវាងមហាអំណាចទាំងពីរ ត្រូវបានធ្វើឡើងជាលើកដំបូងនៅក្នុងសន្ធិសញ្ញា «New START 2010» ដែលនឹងផុតកំណត់នៅខែកុម្ភៈឆ្នាំក្រោយ។ លោក ពូទីន បានលើកឡើងថា រុស្ស៊ីនឹងរក្សាដែនកំណត់នុយក្លេអ៊ែរនេះ ប្រសិនបើអាមេរិកធ្វើដូចគ្នា។ ឯកអគ្គរដ្ឋទូតអង្គការសហប្រជាជាតិរបស់រុស្ស៊ី លោក Vassily Nebenzia បានប្រាប់ថា ទីក្រុងមូស្គូនៅតែរង់ចាំការឆ្លើយតបជាផ្លូវការពីសហរដ្ឋអាមេរិកប៉ុណ្ណោះ។

ការអត្ថាធិប្បាយរបស់លោក ត្រាំ បានកើតឡើងនៅពេលដែលភាពតានតឹងរវាងប្រទេសទាំងពីរនៅតែមានកម្រិតខ្ពស់ជុំវិញសង្គ្រាមនៅអ៊ុយក្រែន។ នៅក្នុងវីដេអូដែលបានចេញផ្សាយកាលពីថ្ងៃអាទិត្យ លោក ពូទីន បានព្រមានថា ទំនាក់ទំនងរវាងសហរដ្ឋអាមេរិក និងរុស្ស៊ីអាចនឹងដួលរលំ បើក្រុងវ៉ាស៊ីនតោនបញ្ជូនមីស៊ីល Tomahawk ទៅកាន់អ៊ុយក្រែន។

លោក ពូទីន បាននិយាយតាមទូរទស្សន៍រដ្ឋរុស្ស៊ីថា «វានឹងនាំទៅរកការបំផ្លាញទំនាក់ទំនងរបស់យើង»។

យ៉ាងណាមិញ សហរដ្ឋអាមេរិកមិនទាន់សម្រេចចិត្តថាតើត្រូវផ្គត់ផ្គង់ Tomahawk រយៈចម្ងាយឆ្ងាយ ដែលអាចចូលជ្រៅទៅក្នុងទឹកដីរុស្ស៊ី រួមទាំងទីក្រុងមូស្គូ ឬក៏យ៉ាងណានោះទេ។

សូមជម្រាបថា សន្ធិសញ្ញា New START 2010 គឺជាកិច្ចព្រមព្រៀងគ្រប់គ្រងអាវុធនុយក្លេអ៊ែររវាងសហរដ្ឋអាមេរិក និងរុស្ស៊ី ដែលចុះហត្ថលេខាក្នុងខែមេសាឆ្នាំ២០១០ ដោយអតីតប្រធានាធិបតីសហរដ្ឋអាមេរិក លោក Barack Obama និងអតីតប្រធានាធិបតីរុស្ស៊ី លោក Dmitry Medvedev។ សន្ធិសញ្ញានេះ ចូលជាធរមានក្នុងខែកុម្ភៈឆ្នាំ២០១១ ដោយកំណត់មិនឲ្យភាគីទាំងពីរដាក់ពង្រាយក្បាលគ្រាប់នុយក្លេអ៊ែរលើសពី ១ ៥៥០គ្រាប់។

សន្ធិសញ្ញានេះមានរយៈពេល១០ឆ្នាំ ប៉ុន្តែត្រូវបានបន្តនៅឆ្នាំ២០២១តែសម្រាប់រយៈពេល៥ឆ្នាំប៉ុណ្ណោះ ដោយនឹងផុតសុពលភាពនាខែកុម្ភៈឆ្នាំ២០២៦ខាងមុខ។ បើវាដួលរលំនៅឆ្នាំក្រោយ ដោយគ្មានការបន្តសន្ធិសញ្ញាថ្មី វានឹងមិនមានការកំណត់ផ្លូវច្បាប់លើទំហំនៃឃ្លាំងអាវុធនុយក្លេអ៊ែររបស់អាមេរិក និងរុស្ស៊ីជាលើកដំបូងគិតចាប់តាំងពីទសវត្សរ៍ឆ្នាំ១៩៧០៕

ដោយ៖ ឈាង