ទទួលទានវីតាមីន E រាល់ថ្ងៃ តើមានអ្វីកើតឡើង ចំពោះរាងកាយ?

បន្ថែមពីលើលក្ខណៈសម្បត្តិប្រឆាំងអុកស៊ីតកម្មរបស់វា វីតាមីន E ក៏ជួយរក្សាប្រព័ន្ធការពារ ការពារបេះដូង និងភ្នែកផងដែរ។ ទោះជាយ៉ាងណាក៏ដោយ ការបន្ថែមលើសកម្រិត ក៏អាចបង្កគ្រោះថ្នាក់ដល់សុខភាព។

របាំងប្រឆាំងអុកស៊ីតកម្មធម្មជាតិរបស់រាងកាយ

វីតាមីន E គឺជាវីតាមីនរលាយក្នុងខ្លាញ់ ដែលមាននៅក្នុងគ្រាប់ផ្កាឈូករ័ត្ន គ្រាប់អាល់ម៉ុន ស្ពៃខ្មៅ និងប្រេងបន្លែ។ នេះគឺជាសារធាតុចិញ្ចឹមដែលជួយការពារកោសិកាពីរ៉ាឌីកាល់សេរី ដែលនាំទៅរកភាពចាស់មុនអាយុ និងជំងឺរ៉ាំរ៉ៃជាច្រើន។

យោងតាមអ្នកជំនាញអាហារូបត្ថម្ភលោកស្រី Jennifer lefton វិទ្យាស្ថានអាហារូបត្ថម្ភ និងវេជ្ជសាស្ត្រអាមេរិកាំង វីតាមីន E ដើរតួនាទីជាសារធាតុប្រឆាំងអុកស៊ីតកម្មដ៏មានឥទ្ធិពល ជួយការពារការបំផ្លាញកោសិកា និងការពារជាតិខ្លាញ់រាងកាយពីការបំបែក។ របបអាហារដែលសម្បូរទៅដោយវីតាមីន E ត្រូវបានគេបង្ហាញថាអាចជួយកាត់បន្ថយហានិភ័យនៃជំងឺបេះដូង មហារីក និងជំងឺ degenerative ផ្សេងទៀត។

ជាការកត់សម្គាល់ លោកស្រី Jennifer lefton បានបញ្ចាក់ថា បច្ចុប្បន្ននេះមិនមានភស្តុតាងច្បាស់លាស់ដែលថាការបន្ថែមវីតាមីន E ក្នុងទម្រង់ជាគ្រាប់ថ្នាំ អាចជួយការពារជំងឺនោះទេ។ នាងបាននិយាយថា ប្រភពធម្មជាតិនៃវីតាមីន E ពីអាហារនៅតែជាជម្រើសដែលមានសុវត្ថិភាពបំផុត និងមានប្រសិទ្ធភាពបំផុត។

ល្អសម្រាប់បេះដូង ភ្នែក និងខួរក្បាល ប៉ុន្តែត្រូវការកម្រិតថ្នាំត្រឹមត្រូវ

ការសិក្សាទ្រង់ទ្រាយធំនៅសាលាវេជ្ជសាស្ត្រហាវ៉ាដ (សហរដ្ឋអាមេរិក) ដែលបានតាមដានគិលានុបដ្ឋាយិកាស្ត្រីជាង ៨ពាន់នាក់ក្នុងរយៈពេល ២០ ឆ្នាំបានបង្ហាញថា ក្រុមដែលមានការស្រូបយកវីតាមីន E ច្រើនបំផុតមានហានិភ័យទាបនៃជំងឺបេះដូងពី ៣០ ទៅ ៤០ ភាគរយ។ តែអ្នកវិទ្យាសាស្ត្រជឿថា លទ្ធផលនេះគ្រាន់តែជាការជាប់ទាក់ទងគ្នាប៉ុណ្ណោះ ដោយមិនបានបញ្ជាក់ថា វីតាមីន E គឺជាមូលហេតុផ្ទាល់នោះទេ។

លើសពីនេះ វីតាមីន E ក៏ជួយការពារភ្នែកចំពោះមនុស្សចាស់ផងដែរ។ ការស្រាវជ្រាវ AREDS (វិទ្យាស្ថានស្រាវជ្រាវភ្នែកជាតិសហរដ្ឋអាមេរិក) បង្ហាញថាការបន្ថែមវីតាមីន E និងសារធាតុប្រឆាំងអុកស៊ីតកម្មផ្សេងទៀតកាត់បន្ថយហានិភ័យនៃការថយចុះនៃភ្នែកដែលទាក់ទងនឹងអាយុដោយ ២៥% ។

ទាក់ទងនឹងប្រព័ន្ធប្រសាទ ការសិក្សាមួយចំនួនបង្ហាញថា កម្រិតខ្ពស់នៃវីតាមីន E នៅក្នុងរបបអាហារអាចជួយបន្ថយល្បឿននៃការយល់ដឹង។ ទោះបីជាយ៉ាងណាក៏ដោយ អ្នកជំនាញ Elizabeth Barnes អ្នកឯកទេសអាហារូបត្ថម្ភនៅសាកលវិទ្យាល័យ Texas បានព្រមានថា ការទទួលទានវីតាមីន E ច្រើនពេកក្នុងរយៈពេលយូរ អាចបណ្តាលឲ្យហូរឈាម និងបង្កើនហានិភ័យនៃជំងឺមហារីកក្រពេញប្រូស្តាតចំពោះបុរស។

ការ​ទទួល​ទាន​អាហារ​ចម្រុះ​នៅ​តែ​ជា​គន្លឹះ

ការទទួលទានវីតាមីន E ប្រចាំថ្ងៃដែលត្រូវបានណែនាំគឺ ១៥មីលីក្រាម សម្រាប់មនុស្សពេញវ័យ។ ប្រភពអាហារធម្មជាតិដូចជាប្រេងផ្កាឈូករ័ត្ន អាល់ម៉ុន ផ្លែ kiwi អាចបំពេញតម្រូវការនេះបានទាំងស្រុង។ ការបន្ថែមវីតាមីន E ក្នុងកម្រិតមធ្យមនឹងជួយឲ្យរាងកាយមានសុខភាពល្អ ប៉ុន្តែវាមានសារៈសំខាន់ក្នុងការរក្សាតុល្យភាព កុំបំពានលើគ្រាប់ថ្នាំ និងផ្តល់អាទិភាពដល់អាហារូបត្ថម្ភពីអាហារស្រស់៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ឥទ្ធិពលនៃ ម៉ាឆា លើស្មារតីនិងអារម្មណ៍