ការសិក្សាព្រមានថា មនុស្សនឹងកើតជំងឺទឹកនោមផ្អែម ១.៣ ពាន់លាននាក់ នៅឆ្នាំ ២០៥០

ការសិក្សាថ្មីរកឃើញថា ប្រសិនបើមនុស្សនៅតែមិនកែទម្លាប់អាក្រក់ចេញទេ អត្រាអ្នកជំងឺទឹកនោមផ្អែមនឹងបន្តកើនឡើងនៅគ្រប់ទីកន្លែងក្នុងរយៈពេល ៣០ ឆ្នាំ ខាងមុខនេះ ។

យោងតាមការប៉ាន់ស្មានរបស់អ្នកស្រាវជ្រាវនៅវិទ្យាស្ថានវាស់ស្ទង់សុខភាព និងការវាយតម្លៃ នៃសាកលវិទ្យាល័យវ៉ាស៊ីនតោន បានឲ្យដឹងថា នៅឆ្នាំ ២០៥០ នឹងមានអ្នកជំងឺទឹកនោមផ្អែមប្រហែល ១.៣ ពាន់លាននាក់ ទូទាំងពិភពលោក ខណៈបច្ចុប្បន្នមាន ៥២៩ លាននាក់ទៅហើយ ។

ក្នុងចំណោមនោះ ៩០ ភាគរយនៃអ្នកជំងឺមានទឹកនោមផ្អែមប្រភេទ ២ ដែលជាជំងឺបណ្ដាលមកពីភាពធាត់ របបអាហារ ការប្រើប្រាស់គ្រឿងស្រវឹង ឬថ្នាំជក់ និងមិនសូវហាត់ប្រាណជាដើម ។

សូម្បីលោក Liane Ong អ្នកដឹកនាំការស្រាវជ្រាវដែលចេញផ្សាយនៅក្នុងទស្សនាវដ្តីវេជ្ជសាស្ត្រ The Lancet ក៏មានប្រសាសន៍ដែរថា “អត្រាកើនឡើងយ៉ាងឆាប់រហ័សនៃជំងឺទឹកនោមផ្អែមមិនត្រឹមតែគួរឱ្យព្រួយបារម្ភប៉ុណ្ណោះទេ ថែមទាំងជាបញ្ហាប្រឈមសម្រាប់គ្រប់ប្រព័ន្ធសុខភាពនៅក្នុងពិភពលោកទៀតផង” ។

សម្រាប់កត្តាសំខាន់ដែលជំរុញឲ្យអត្រាមនុស្សកើតជំងឺទឹកនោមផ្អែមកើនឡើង គឺបណ្តាលមកពីការឡើងទម្ងន់ ទន្ទឹមនេះការសិក្សាបង្ហាញថា មនុស្សចាស់ប្រឈមនឹងហានិភ័យកើតជំងឺទឹកនោមផ្អែម ជាងមនុស្សវ័យក្មេងគួរឲ្យកត់សម្គាល់ ៕

ប្រែសម្រួល៖ វារី

ប្រភព៖ Sputnik

ចុចអាន៖ ផឹកគ្រឿងស្រវឹងជាប្រចាំ ប្រយ័ត្នកើតជំងឺទឹកនោមផ្អែមដោយមិនដឹងខ្លួន

ចុចអាន៖ កុមារ ចូលចិត្តបរិភោគចំណីអាហារ និងភេសជ្ជៈផ្អែម ប្រឈមផលប៉ះពាល់ធ្ងន់ធ្ងរ​ដល់សុខភាព