តើអ្វីទៅជា អាហារូបត្ថម្ភ?

អាហារូបត្ថម្ភ គឺជាការទទួលបាន និងការប្រើប្រាស់អាហារ ដែលមានជីវជាតិចិញ្ចឹមសម្រាប់ជីវិតរស់នៅ ប្រកបទៅដោយសុខភាពល្អ មានការលូតលាស់ និងការអភិវឌ្ឍ។ អាហាររូបត្ថម្ភ ចែកចេញជា៣ក្រុម៖

១. អាហារថាមពល

អាហារថាមពល ជាអាហារដែលសម្បូរ ទៅដោយជាតិកាបូអ៊ីត្រាត (អង្ករ គុយទាវ ដំឡូងគ្រប់ប្រភេទ ត្រាវ ពោត  នំបុ័ង ស្ករ ទឹកអំពៅ  និងទឹកឃ្មុំជាដើម) និងអាហារដែលសម្បូរទៅដោយជាតិខ្លាញ់​ (ខ្ទិះដូង ប្រេងឆា និងខ្លាញ់សត្វជាដើម)។

២.អាហារសាងសង់

អាហារសាងសង់ ជាអាហារដែលមានប្រភពមកពីសាច់សត្វ ជាតិប្រូតេអ៊ីន ដែលរាងកាយត្រូវការយកទៅប្រើប្រាស់សម្រាប់ការលូតលាស់ ទ្រទ្រង់រក្សា និងជួសជុលជាលិការបស់រាងកាយ។ អាហារក្នុងក្រុមនេះរួមមាន ទឹកដោះម្តាយ សាច់សត្វ ត្រី តៅហ៊ូ សណ្តែកសៀង ទឹកដោះគោឆៅ ស៊ុត ក្តាម កំពឹស មឹក អន្ទង់ និងកង្កែបជាដើម។

៣.អាហារការពារ

ក្រុមអាហារនេះ មានពពួកជីវជាតិ និងរ៉ែខនិជសំខាន់ៗជាច្រើន ធ្វើការរួមគ្នាជាមួយអាហារស្ថាបនារាងកាយ និងក្រុមអាហារថាមពល ការពារប្រឆាំងទប់ទល់នឹងជំងឺ និងការបង្កររោគផ្សេងៗ។ អាហារក្នុងក្រុមការពារនេះ មានបន្លែពណ៌បៃតងចាស់ (ត្រកួន ស្លឹកបាស់ ផ្ទី ស្លឹកងុប ស្ពៃខ្មៅ ស្លឹកល្ពៅ) បន្លែ/ផ្លែឈើ ពណ៌លឿងទុំ (ផ្លែល្ពៅ  ការ៉ុត ដំឡូងជ្វាពណ៌លឿង ផ្លែស្វាយទុំ ល្ហុងទុំ) និងទឹកដោះម្តាយសម្រាប់ទារក។

តាមរយ:ខ្សែរវីដេអូកាលពីពេលថ្មីៗនេះ ក្រសួងកិច្ចការនារី បានបង្ហាញថា កង្វះអាហារូបត្ថម្ភ មានផលប៉ះពាល់ដល់កុមារដូចជា ស្គមស្គាំង ឬម៉ារ៉ាស្ម (Marasmas/Wasting)។ ស្គមស្គាំងធ្វើឲ្យឆ្អឹងជំនីមើលឃើញច្បាស់ដោយសារសាច់ដុំស្វិត បាត់បង់ប្រូតេអ៊ីន និងជាតិខ្លាញ់ក្រោមស្បែក។​ កំប៉េះគូទយារធ្លាក់ ពោះប៉ោង មានតែខ្យល់ច្រើន ទម្ងន់តិចខ្លាំងធៀបទៅនឹងអាយុ ។ ទម្ងន់ធៀបទៅនឹងកម្ពស់តិចជាង 3SD (ស្តងដាវាយតម្លៃស្តីពីការលូតលាស់របស់កុមារនៃអង្គការសុភាពពិភពលោក) ឬវាស់ជុំវិញពាក់កណ្តាលដើមដៃតិចជាត១១.៥សម។ កុមារឃ្លានជានិច្ចតែហូបមិនបានច្រើនតាមតមរូវការរាងកាយ។

ករណីកង្វះអាហារូបត្ថម្ភធ្ងន់ធ្ងរ កុមារអាចហើមនៅលើប្រអប់ជើងសងខាង និងមានស្នាមទ្រុត។ សក់ស្តើងមានពណ៌ក្រហម ហើយងាយនឹងជ្រុះ។ ស្បែកស្ងួតបែកស្រកា ជាពិសេសនៅលើពោះ ដៃ និងខ្នងជើង។ ទម្ងន់កុមារ ហាក់នៅធម្មតា មិនស្រកចុះនោះទេ ផ្ទៃមុខមូលដូចព្រះខែពេញវង់ និងមិនចង់បរិភោគអាហារ៕

​