ក្រសួងសុខាភិបាល ពង្រឹងផ្នែកស្តេរីលក្នុងមន្ទីរពេទ្យ អនុវត្តតាមស្តង់ដាររបស់ WHO

សាស្រ្តាចារ្យ ឡឹម តារា រដ្ឋលេខាធិការក្រសួងសុខាភិបាល និងជាប្រធានគណៈកម្មការ «ការបង្ការ និងការត្រួតពិនិត្យការចម្លងរោគ» និងជាប្រធានគណៈកម្មការ «សល្យសាស្រ្ត សម្ភព និងសណ្តំ» បានអញ្ជើញជាអធិបតីក្នុង សិក្ខាសាលា «ការពិនិត្យលទ្ធផលការស្តេរីល និងការធ្វើផែនការបន្តសម្រាប់ការអនុវត្តការស្តេរីល និងសុវត្ថិភាពការវះកាត់» ក្នុងន័យពង្រឹងពង្រឹងផ្នែកស្តេរីលក្នុងមន្ទីរពេទ្យ ដោយប្តូរទម្លាប់ចាស់ចេញ អនុវត្តតាមស្តង់ដាររបស់ WHO។

សិក្ខាសាលានេះមានសិក្ខាកាមចូលរួមចំនួន ៣៥ រូប ដែលអញ្ជើញមកពី មន្ទីរពេទ្យកាល់ម៉ែត មន្ទីរពេទ្យមិត្តភាពខ្មែរ-សូវៀត និងមន្ទីរពេទ្យខេត្តចំនួន ៦។

ក្នុងវគ្គសិក្ខាសាលានេះក៏មានការប្រគលវិញ្ញបនបត្រជូនដល់គ្រូបង្គោល ផ្នែកស្តេរីលចំនួន ១៦ រូប ដែលបានឆ្លងកាត់វគ្គបណ្តុះបណ្តាលដោយអ្នកជំនាញជាតិ និងអន្តរជាតិ រួមទាំងការវាយតំលៃការអនុវត្តការងារស្តេរីល តាំងពី ឆ្នាំ២០២២។

នៅក្នុងសិក្ខាសាលានាថ្ងៃទី១៤ ខែសីហា ឆ្នាំ២០២៤ នេះ សាស្រ្តាចារ្យ ឡឹម តារា បានផ្តាំផ្ញើទៅគ្រូបង្គោលទាំង១៦ ដូចជា៖ ១. ត្រូវចាប់ផ្តើមអនុវត្តពង្រឹងផ្នែកស្តេរីលក្នុងមន្ទីរពេទ្យដោយប្តូរទម្លាប់ចាស់ចេញ អនុវត្តតាមស្តង់ដាររបស់ WHO ។ ២. ត្រូវផ្សព្វផ្សាយចំណេះដឹងថ្មីៗ និងបណ្តុះបណ្តាលបន្តដល់បុគ្គលិកដែលកំពុងអនុវត្តការងារជាមួយគ្នាឱ្យបាន។ ៣. សហការជាមួយនាយកដ្ឋានមន្ទីរ ដើម្បីពង្រីកការងារស្តេរីល ឱ្យបានគ្រប់មន្ទីរពេទ្យទូទាំងប្រទេស។ ៤. កត់ត្រានូវទិន្នន័យ និងលទ្ធផលដែលទទួលបានពីការអនុវត្តល្អនេះ សិក្សាប្រៀបធៀប និងឈានទៅរកនវានុវត្តបន្ថែមទៀត។

សាស្រ្តាចារ្យ ឡឹម តារា បានថ្លែងអំណរគុណដល់អង្គការដៃគូរទាំងអស់ ជាពិសេសអង្គការសុខភាពពិភពលោក ដែលបានជួយឧបត្ថម្ភវគ្គបណ្តុះបណ្តាលនេះ និងសំណូមពរឱ្យបន្តជួយបន្ថែមទៀត ដល់គ្រប់មន្ទីរពេទ្យទូទាំងប្រទេស៕