៣ ចំណុចដែលស្ត្រីមានហានិភ័យស្លាប់ដោយសារជំងឺកូវីដ-១៩ទាបជាងបុរស

ផ្អែកតាមរបាយការណ៍អង្គការសុខភាពពិភពលោក (WHO) បានឱ្យដឹងថា អ្នកជំងឺកូវីដ-១៩ ដែលបានស្លាប់នៅទូទាំងពិភពលោកប្រមាណ ៦៣% គឺជាបុរស។ នេះបង្ហាញថា តួលេខមរណភាពរបស់ស្ត្រីស្ថិតក្នុងកម្រិតទាបគួរឱ្យកត់សម្គាល់។

ដោយឡែក ការសិក្សាមួយផ្សេងទៀតដែលត្រូវបានចេញផ្សាយនៅក្នុង Annals of Internal Medicine បានបង្ហាញថា បុរសធាត់វ័យក្មេងងាយនឹងស្លាប់ដោយសារវីរុសកូវីដ-១៩ ខ្លាំងជាងស្ត្រីផងដែរ។

តើមកពីមូលហេតុអ្វីទើបស្ត្រីមិនងាយឆ្លងវីរុសកូវីដ-១៩? ហើយហេតុអ្វីបានជាបុរសប្រឈមហានិភ័យរោគធ្ងន់ធ្ងរនិងមិនឆាប់ធូរស្រាល?

អង់ស៊ីម ACE-2

វីរុសកូវីដ-១៩ ធ្វើទុក្ខបុកម្នេញខ្លាំងទៅលើអង់ស៊ីម ACE2 ដើម្បីចូលទៅក្នុងកោសិកានៃខ្លួនមនុស្ស។ ចំពោះបុរស ​​ពួកគេមានកំហាប់ ACE2 ខ្ពស់ជាង បើប្រៀបធៀបទៅនឹងស្ត្រី។ ដូច្នេះទើបស្ត្រីមានហានិភ័យនៃការវិវត្តទៅរករោគសញ្ញាធ្ងន់ធ្ងរតិច និងងាយជាសះស្បើយជាងប្រុសៗ។

តួនាទីនៃអរម៉ូន អ៊ឹស្ត្រូសែន (estrogen ) និង តេស្តូស្តេរ៉ូន (testosterone)

យោងតាមរបាយការណ៍របស់សារព័ត៌មាន Times Now ស្ត្រីមានរាងកាយធន់នឹងប្រព័ន្ធភាពស៊ាំខ្លាំងជាងបុរស។ នេះដោយសារតែ អរម៉ូនអ៊ឹស្ត្រូសែនក្នុងរាងកាយស្ត្រីរំញោចការឆ្លើយតបទៅនឹងប្រព័ន្ធភាពស៊ាំរហ័សដែលជួយក្នុងការប្រយុទ្ធប្រឆាំងនឹងភ្នាក់ងារបស់វីរុស។

ចំណែកបុរស ពួកគេមានកម្រិត តេស្តូស្តេរ៉ូនខ្ពស់ដែលរារាំងការឆ្លើយតបនៃប្រព័ន្ធភាពស៊ាំរបស់រាងកាយ ហេតុនេះហើយទើបពួកគេងាយនឹងឆ្លងមេរោគ និងកម្រជាសះស្បើយ។

ក្រូម៉ូសូម X

ហេតុផលមួយទៀតដែលបានបញ្ជាក់នៅក្នុងរបាយការណ៍ដដែល បង្ហាញថា ក្រូម៉ូសូម X នៅក្នុងហ្សែនជួយកំណត់ភ្នាក់ងារបង្កជំងឺនិងឆ្លើយតបប្រឆាំងនឹងវីរុស។ ក្នុងនោះ បុរសមានក្រូម៉ូសូម X តែមួយ ចំណែកស្ត្រីមានក្រូម៉ូសូម 2X ។ ដូច្នេះទើបធ្វើឱ្យការឆ្លើយតបរបស់ប្រព័ន្ធភាពស៊ាំរបស់មនុស្សស្រីខ្លាំងជាងបុរស។

មួយវិញទៀត អ្នកជំនាញសុខាភិបាលបានរកឃើញថា រាងកាយស្ត្រីមានលទ្ធភាពបង្កើតអង់ទីគ័រប្រឆាំងនឹងវីរុសកូវីដ-១៩លឿនជាងបុរស៕

ប្រែសម្រួល៖ សន្យា

ប្រភព៖ thehindubusinessline

ចុចអាន៖ មូលហេតុសំខាន់មួយដែលបុរសមានហានិភ័យ​ឆ្លងនិងស្លាប់ដោយសារកូវីដច្រើនជាងស្ត្រី

ចុចអាន៖ ការសិក្សា៖ ស្ត្រីវ័យក្មេងរងផលប៉ះពាល់ខ្លាំងជាងបុរស ក្រោយចាក់វ៉ាក់សាំងកូវីដ