បុគ្គលិកម្នាក់ធ្វើការឲ្យក្រុមហ៊ុនរហូតដល់បំបែកកំណត់ត្រា Guinness

បុរស​ចំណាស់ម្នាក់​​បាន​ចំណាយ​ពេល​ជាង ៨ទសវត្សរ៍​ ធ្វើការនៅ​ក្រុមហ៊ុន​តែ​មួយ​ រហូតអាចបំបែកកំណត់ត្រាពិភពលោក ​Guinness ជាមនុស្សស្មោះត្រង់នឹងក្រុមហ៊ុនរយៈពេលយូរបំផុត។

លោកតា Walter Orthmann ជនជាតិប្រេស៊ីល បានចាប់ផ្តើមធ្វើការឱ្យក្រុមហ៊ុនវាយនភណ្ឌ Industrias Renaux S.A នៅថ្ងៃទី១៧ ខែមករា ឆ្នាំ១៩៣៨ នៅពេលគាត់មានអាយុទើបតែ ១៥ឆ្នាំ។ ពីនាយកដ្ឋានដឹកជញ្ជូន លោកតា Walter Orthmann បន្តិចម្តងៗបានឡើងតំណែងជាជំនួយការរដ្ឋបាល ហើយបច្ចុប្បន្នគាត់កាន់តំណែងជាអ្នកគ្រប់គ្រងផ្នែកលក់។

កាលពីខែកុម្ភៈ ឆ្នាំ២០២២ លោកតា Orthmann បានកត់ត្រានៅក្នុងសៀវភៅកំណត់ត្រាហ្គីណេស ជាបុគ្គលធ្វើការនៅក្រុមហ៊ុនមួយសម្រាប់រយៈពេលដ៏យូរបំផុត រហូតដល់ ៨៤ឆ្នាំ និង ៩ថ្ងៃ។

រំលឹកពីអតីតកាល លោកតា Orthmann និយាយថា កាលពីធ្វើការដំបូងៗមិនមានកុំព្យូទ័រប្រើទេ រាល់ពេលដែលត្រូវវាយឯកសារ ត្រូវធ្វើការលើម៉ាស៊ីនអង្គុលីលេខ បន្ទាប់មកផ្ញើតាមប្រៃសណីយ៍។ នៅផ្ទះអត់មានទឹកស្អាតប្រើប្រាស់ ហើយនៅតាមផ្លូវអត់មានភ្លើងស្តុបសាធារណៈទៀត ចំណែកផ្លូវទៅក្រុមហ៊ុនសុទ្ធតែខ្សាច់ និងភក់ខ្លាំង ពេលរដូវភ្លៀង។

នៅពេលគេសួរថា តើគាត់ធ្វើយ៉ាងណាអាចធ្វើការនៅក្រុមហ៊ុនមួយរហូតដល់ ៨៤ឆ្នាំ ហើយនៅតែមិនលាឈប់? លោកតា Orthmann ឆ្លើយថា “អ្នកមិនអាចគ្រាន់តែធ្វើការងារណាមួយ ហើយគិតថាអ្នកកំពុងធ្វើការនោះទេ។ បើដូច្នេះ អ្នកនឹងមិនអាចទ្រាំទ្របានឡើយ។ ចំណែក​ខ្ញុំ​វិញ ខ្ញុំ​ចូល​ចិត្ត​ធ្វើ​ការ ហើយ​ត្រៀម​ខ្លួន​ជា​និច្ច​ក្នុង​ការ​តស៊ូ​ពេល​មាន​ការ​លំបាក»។

ក្នុងឆ្នាំ ២០២២នេះ លោកតា Orthmann មានអាយុ ១០០ឆ្នាំហើយ ប៉ុន្តែបុគ្គលិកពិសេសរូបនេះមិនទាន់មានគម្រោងចូលនិវត្តន៍នៅឡើយ៕

ប្រែសម្រួល៖ សន្យា

ចុចអាន៖ បច្ចេកទេស​ចម្លែក​ ​រក្សា​ផ្លែឈើ​ក្នុង​ដី​ឥដ្ឋ អាចទុកហូបបានរហូត​មួយ​ឆ្នាំ

ចុចអាន៖ ប្រវត្តិតស៊ូរបស់បុរសពិការជើង ធ្លាប់បំបែកកំណត់ត្រាពិភពលោកដល់ទៅ ២ដង