ឥណ្ឌា និងប្រេស៊ីលចុះកិច្ចព្រមព្រៀងរ៉ែ ក្រោមគោលដៅពាណិជ្ជកម្ម ២០ ប៊ីលានដុល្លារក្នុងរយៈពេល៥ឆ្នាំ

ឥណ្ឌាបានបោះជំហានថ្មីក្នុងការពង្រឹងទំនាក់ទំនងពាណិជ្ជកម្មជាមួយប្រេស៊ីលកាលពីថ្ងៃសៅរ៍ ដោយ​ចុះហត្ថលេខាលើកិច្ចព្រមព្រៀង​ពង្រីកកិច្ចសហប្រតិបត្តិការក្នុងវិស័យរ៉ែ ក្រោមគោលដៅពាណិជ្ជកម្ម ២០ ប៊ីលាន​ដុល្លារ ក្នុងរយៈពេល ៥ ឆ្នាំ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

កិច្ចព្រមព្រៀងនេះត្រូវបានចុះហត្ថលេខាក្រោម​វត្តមានរបស់នាយករដ្ឋមន្ត្រីឥណ្ឌា លោក ណារិនដ្រា មូឌី (Narendra Modi) និងប្រធានាធិបតីប្រេស៊ីល លោក Luiz Inacio Lula da Silva ដែលធ្វើដំណើរទៅដល់ទីក្រុងញូវដេលីនៅសប្ដាហ៍នេះសម្រាប់ដំណើរទស្សនកិច្ចរយៈពេល ៣ ថ្ងៃ។

ប្រេស៊ីលគឺជាប្រទេសផលិតរ៉ែដែកកំពូលមួយលើ​ពិភពលោក ហើយមានទុនបម្រុងរ៉ែយ៉ាងច្រើនដែលសំខាន់សម្រាប់ការផលិតដែកថែប។

សេចក្តីថ្លែងការណ៍របស់រដ្ឋាភិបាលឥណ្ឌាបាននិយាយថា កិច្ចសហប្រតិបត្តិការកាន់តែជិតស្និទ្ធជាមួយប្រេស៊ីល រំពឹងថានឹងធ្វើឱ្យប្រសើរឡើងនូវការចូលប្រើប្រាស់វត្ថុធាតុដើម និងបច្ចេកវិទ្យាសម្រាប់ឥណ្ឌា ដើម្បីរក្សាកំណើន​រយៈពេលវែងក្នុងវិស័យដែកថែបរបស់ប្រទេស។

សេចក្តីថ្លែងការណ៍បន្តថា កិច្ចសហប្រតិបត្តិការនឹងផ្តោតលើការទាក់ទាញការវិនិយោគលើវិស័យរុករករ៉ែ និងហេដ្ឋារចនាសម្ព័ន្ធដែកថែប។

បច្ចុប្បន្ន ឥណ្ឌាមានសមត្ថភាពផលិតដែកថែប ២១៨ លានតោន ហើយក្រុមហ៊ុននានា កំពុងពង្រីកផលិតកម្ម​ដើម្បីបំពេញតម្រូវការក្នុងស្រុកដែលកំពុងកើនឡើង ដោយសារតែការអភិវឌ្ឍហេដ្ឋារចនាសម្ព័ន្ធ និងឧស្សាហូបនីយកម្ម។

ថ្លែងនៅក្នុងកិច្ចប្រជុំជាមួយគណៈប្រតិភូប្រេស៊ីលដឹកនាំដោយលោក Lula លោក មូឌី បាននិយាយថា កិច្ចពិភាក្សារបស់ពួកគេបានផ្តោតលើមធ្យោបាយដើម្បីពង្រឹងភាពជាដៃគូពាណិជ្ជកម្មឥណ្ឌា-ប្រេស៊ីល។

លោកបន្តយ៉ាងដូច្នេះថា៖ «យើងប្តេជ្ញាចិត្តក្នុងការធ្វើឱ្យពាណិជ្ជកម្មទ្វេភាគីកើន​លើសពី ២០ ប៊ីលានដុល្លារក្នុងរយៈពេល ៥ ឆ្នាំខាងមុខ»។

ពាណិជ្ជកម្មទ្វេភាគីរវាងប្រទេសសមាជិត BRICS ទាំង២ បច្ចុប្បន្នមានចំនួនប្រហែល ១៥ ប៊ីលានដុល្លារ។

មែនទែនទៅ ឥណ្ឌា និងប្រេស៊ីលជាដៃគូយុទ្ធសាស្ត្រចាប់តាំងពីឆ្នាំ ២០០៦​ ដោយមានកិច្ចសហប្រតិបត្តិការលើវិស័យពាណិជ្ជកម្ម ការពារជាតិ ថាមពល កសិកម្ម សុខភាព រ៉ែសំខាន់ៗ បច្ចេកវិទ្យា និងហេដ្ឋារចនាសម្ព័ន្ធឌីជីថល។ ប្រេស៊ីលគឺជាដៃគូពាណិជ្ជកម្មធំបំផុតរបស់ឥណ្ឌាក្នុងតំបន់អាមេរិកឡាទីន និងតំបន់ការ៉ាអ៊ីប ហើយប្រទេសទាំង២​ធ្វើការយ៉ាងជិតស្និទ្ធលើបញ្ហាសកលដូចជាកំណែទម្រង់អង្គការសហប្រជាជាតិ ការប្រែប្រួលអាកាសធាតុ និងការប្រឆាំងភេរវកម្មជាដើម៕