ក្ដោបក្ដាប់ទ្រព្យសម្បត្តិប្រមាណ ៣០០ពាន់លានដុល្លារ លោក Elon Musk គឺជាមហាសេដ្ឋីដែលមានជាងគេបំផុតនៅលើពិភពលោក ក្នុងឆ្នាំ២០២២នេះ។ មិនត្រឹមតែមានកេរ្តិ៍ឈ្មោះលើសមត្ថភាព និងអាជីពនោះទេ ​មហាសេដ្ឋីរូបនេះ ក៏ទទួលបានការកោតសរសើរចំពោះការចិញ្ចឹមបីបាច់កូនៗរបស់លោកផងដែរ។

អ្វីដែលធ្វើឱ្យមហាជនជាច្រើនមានការភ្ញាក់ផ្អើលខ្លាំង គឺតិចនិកបង្រៀនកូនៗទាំង ៧ របស់ Elon Musk ហាក់ប្លែកពីឪពុកម្តាយទូទៅ ដែលក្នុងនោះលោកតែងតែ៖

១. អនុញ្ញាតឱ្យកូនៗប្រើប្រាស់អ៊ីនធឺណិត

ក្នុងនាមជាមហាសេដ្ឋីបច្ចេកវិទ្យា លោក Elon Musk បើកចិត្តទូលាយដោយអនុញ្ញាតឱ្យកូនៗប្រើប្រាស់អ៊ីនធឺណិតសម្រាប់ការរៀនសូត្រ។ Elon Musk បាន​ចែករំលែក​ថា «ខ្ញុំ​ឱ្យ​កូន​របស់​ខ្ញុំ​ប្រើ​អ៊ីនធឺណិត​តាំង​ពី​តូច​មក ហើយ​ពួកគេ​ទទួល​បាន​ការ​អប់រំ​ពី YouTube និង Reddit ជា​ចម្បង»។

២. ឱ្យកូនលេងវីដេអូហ្គេម ប៉ុន្តែត្រូវរក្សាទម្លាប់អានសៀវភៅ

តាំងពីកុមារភាព Elon Musk ចូលចិត្តវីដេអូហ្គេមណាស់ ដែលនោះ​ជាមូលហេតុនាំ​ឱ្យលោក​អភិវឌ្ឍ​ចំណង់​ចំណូល​ចិត្ត​ក្នុង​ការ​សរសេរ​កម្មវិធី។ ដូច្នេះហើយ មហាសេដ្ឋីរូបនេះ មិនរឹតត្បិតកូនៗក្នុងការលេងហ្គេមនោះទេ ព្រោះលោកយល់ថាវាជួយផ្ដល់ការកម្សាន្ត និងអភិវឌ្ឍបញ្ញារបស់ពួកគេ។

ទោះជាយ៉ាងណាក៏ដោយ Elon Musk បានគ្រប់គ្រងពេលវេលាលេងហ្គេមយ៉ាងតឹងរ៉ឹងចំពោះកូនទាំងអស់ ដោយពួកគេត្រូវរក្សាទម្លាប់អានសៀវភៅជាប្រចាំ។ Elon Musk ចែករំលែកថា “កុមារត្រូវចំណាយពេលអានសៀវភៅពីរដងច្រើនជាងការលេងវីដេអូហ្គេម។ ធ្វើបែបនេះយើងអាចការពារពួកគេពីការញៀនហ្គេម និងអភិវឌ្ឍជំនាញដែលមានប្រយោជន៍នៅពេលអនាគត”។

៣. បង្រៀនកូនឱ្យស្គាល់សម្ពាធ

មុនពេលក្លាយជាមហាសេដ្ឋី Elon Musk ត្រូវឆ្លងកាត់ការលំបាក និងជំពប់ដួលជាច្រើនលើកច្រើនសារ។ ទោះជាយ៉ាងនេះក្តី លោកមិនបានបោះបង់ពាក់កណ្តាលផ្លូវនោះទេ។ នេះហើយជាមូលហេតុដែលជួយឱ្យលោកទទួលជោគជ័យដូចបច្ចុប្បន្ន។ ដូច្នេះ ចំពោះកូនៗរបស់ Elon Musk លោកតែងតែ​ទុក​ឱ្យ​ពួកគេ​ប្រឈម​មុខ​នឹង​ការ​លំបាក និង​សម្ពាធ​តាំង​ពី​តូច ដើម្បី​ឱ្យ​ពួក​គេ​រៀន​ធំ​ឡើងមានភាពរឹងមាំ និងឯករាជ្យ។

៤. លើកទឹកចិត្តកូនឱ្យញ៉ាំអាហារសុខភាព

តាមសម្ដីរបស់អ្នកមើលថែទាំកូនក្នុងគ្រួសារ Musk បានចែករំលែកថា កូនៗរបស់ Elon Musk តែងមានទម្លាប់ញ៉ាំដែលមានសុខភាពល្អ។ ជាទូទៅ ប្រសិនត្រូវចេញទៅញ៉ាំអីនៅខាងក្រៅផ្ទះ ក្មេងៗតែងជ្រើសរើសចូលហាងអាហារបួស ឬអាហារសរីរាង្គផ្សេងៗ​ ជាជាងចូលហាង Burger ឬ Pizza។

៥. បើកសាលាផ្ទាល់ខ្លួនសម្រាប់អភិវឌ្ឍន៍ចំណេះដឹងរបស់កូន

Elon Musk បានសាងសង់សាលាមួយឈ្មោះថា Ad Astra (Reach for the stars) នៅភាគខាងត្បូង រដ្ឋកាលីហ្វ័រញ៉ា។ មិនដូចមហាសេដ្ឋីដទៃទៀតដែលបញ្ជូនកូនរបស់ពួកគេទៅសាលារៀនល្បីៗ Elon Musk បានសាងសង់សាលាផ្ទាល់ខ្លួនមួយនេះ ដើម្បីដឹកនាំកូនឱ្យរៀនតាមវិធីរបស់លោក។ សាលានេះអនុញ្ញាត្តឱ្យក្មេងៗប្រើវិធីសាស្ត្រដោះស្រាយបញ្ហា និងស្រាវជ្រាវផ្សេងៗ ដើម្បីជួយអភិវឌ្ឍការគិតរបស់ពួកគេ។

តើ​អ្នក​គិត​យ៉ាង​ណា​ចំពោះ​វិធីសាស្ត្រ​ចិញ្ចឹម​កូន​របស់ Elon Musk?

ប្រែសម្រួល៖ សន្យា

ចុចអាន៖ រឿងរ៉ាវ ចម្លែក ៧ យ៉ាង​ពី​ក្រោយ​ជោគជ័យ​នៃ​មហាសេដ្ឋី ELON MUSK

ចុចអាន៖ មហាសេដ្ឋី Elon ធ្លាប់រៀបការដល់ទៅ៣ដង និងមានសង្សារសុទ្ធតែជាតារាល្បីៗក្រោយលែងលះភរិយា