តើអ្វីទៅជា«សិទ្ធិជ្រកកោននយោបាយ»?

សិទ្ធិជ្រកកោននយោបាយ គឺជាសិទ្ធិក្នុងការរស់នៅក្រៅប្រទេស ហើយត្រូវបានផ្តល់ដោយរដ្ឋាភិបាលនៃប្រទេសនោះ ដល់ប្រជាជនដែលត្រូវចាកចេញពីប្រទេសរបស់ខ្លួនដោយហេតុផលនយោបាយ។

សិទ្ធិជ្រកកោននយោបាយនេះ ការពារដល់បុគ្គលទាំងឡាយណាដោយសារហេតុផលផ្សេងៗ មិនអាចត្រឡប់ទៅប្រទេសកំណើតរបស់ពួកគេវិញបាន។ សិទ្ធិជ្រកកោននយោបាយ ជួយបុគ្គលម្នាក់ៗ ដោយផ្តល់លទ្ធភាពឱ្យពួកគេស្នាក់នៅក្នុងប្រទេសស្នើសុំសិទ្ធិ មានជាការស្នើសុំប័ណ្ណសន្តិសុខសង្គម និងស្នើសុំការអនុញ្ញាតឱ្យធ្វើការងារ។ អ្នកដែលស្វែងរកសិទ្ធិនេះ គឺក្នុងគោលបំណងការពារខ្លួនពីការគំរាមផ្សេងៗទាក់ទងនឹងនយោបាយ។

សម្រាប់បុគ្គលដែលកំពុងស្វែងរកការការពារ ពួកគេដាក់ពាក្យសុំឋានៈជាជនភៀសខ្លួននយោបាយជាផ្លូវការជាមួយឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន។ ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន គឺជាមែកធាងរបស់អង្គការសហប្រជាជាតិ ដែលដោះស្រាយបញ្ហានេះទាំងស្រុង។ បន្ទាប់ពីដាក់ពាក្យ ឧត្តមស្នងការអង្គការសហប្រជាជាតិនឹងធ្វើការស្រាវជ្រាវ ត្រួតពិនិត្យប្រវត្តិរូបឱ្យបានច្បាស់លាស់ដើម្បីឱ្យប្រាកដថា បុគ្គលនោះស័ក្តិសមនឹងទទួលសិទ្ធិនេះទេ? ក្នុងនោះក៏មានការជួបសម្ភាសន៍ដោយផ្ទាល់ ឬ តាមប្រព័ន្ធអេឡិចត្រូនិចផងដែរ។

ដំណើរការនៃការផ្តល់សិទ្ធិជ្រកកោននយោបាយ ក៏ត្រូវមានការតាមដានពីស្ថានភាពនៅក្នុងប្រទេសកំណើតរបស់បុគ្គលដែលស្នើសុំ និងកត្តាផ្សេងៗទៀត។ ពួកគេអាចបង្ហាញពីភស្តុតាង និងការគំរាមកំហែងផ្សេងជុំវិញនឹងបញ្ហានយោបាយដូចជា ការចោទប្រកាន់ក្នុងសេចក្តីថ្លែងការណ៍នយោបាយណាមួយ ការចោទប្រកាន់ក្នុងព័ត៌មាន រូបភាព​ ឬ វីដេអូជាដើម។ ការបង្ហាញនេះ ដើម្បីបញ្ជាក់ថា ពួកគេប្រឈមមុខនឹងការបៀតបៀន ឬគ្រោះថ្នាក់នៅក្នុងប្រទេសកំណើតរបស់ពួកគេ ដោយសារតែជំនឿនយោបាយ ឬសមាជិកភាពក្នុងក្រុមនយោបាយរបស់ពួកគេ។

យ៉ាងណាមិញ តើការផ្តល់សិទ្ធិជ្រកកោននយោបាយនេះ ទាល់តែមានការធ្វើ​ទុក្ខបុកម្នេញពីរដ្ឋាភិបាលទើបមានសិទ្ធិទទួលបានឬ? មែនទែនទៅ មិនអញ្ចឹងទាំងស្រុងនោះទេ។ បុគ្គលម្នាក់អាចស្វែងរកឋានៈជាជនភៀសខ្លួននយោបាយ នៅពេលដែលរងការធ្វើទុក្ខបុកម្នេញពីមជ្ឈដ្ឋានផ្សេងៗ ដូចជា យោធា ក្រុមឧទ្ទាម ក្រុមដែលមានអំណាច និងឥទ្ធិពលនៅក្នុងប្រទេសជាដើម៕

ដោយ៖ អុន ស្រីមាន