ព្រះមាលារបស់ព្រះចៅអធិរាជ ណាប៉ូឡេអុង បូណាផាត លក់ដាច់តម្លៃជាង ២ លានដុល្លារក្នុងការដេញថ្លៃនៅ បារាំង

ព្រះមាលា ឬមួក ដែលគេជឿថា ជារបស់ព្រះចៅអធិរាជណាប៉ូឡេអុង បូណាផាត បានលក់ក្នុងតម្លៃ ២.១១ លានដុល្លារ នៅក្រុមហ៊ុនដេញថ្លៃ Drouot ក្នុងទីក្រុងប៉ារីស ប្រទេសបារាំង កាលពីថ្ងៃទី១៩ ខែវិច្ឆិកា ។

ដំបូងគេប៉ាន់ប្រមាណថាវាមានតម្លៃប្រហែល ៦០ ម៉ឺនទៅ ៩០ ម៉ឺនដុល្លារប៉ុណ្ណោះ ។ ផ្ទុយទៅវិញ វាបានដណ្ដើមដំណែងព្រះមាលាមួយទៀតរបស់ព្រះចៅអធិរាជណាប៉ូឡេអុង បូណាផាត ដែលលក់ចេះកាលពីឆ្នាំ ២០១៤ ក្នុងតម្លៃ ២.០៦ លានដុល្លារ ។

មុនការដេញថ្លៃ គេហទំព័រ Osenat បានឲ្យដឹងថា ព្រះចៅអធិរាជណាប៉ូឡេអុង មានព្រះមាលាបែបនេះចំនួនសរុបប្រហែល ១២០ ។ រាល់ព្រះមាលាដែលគេជឿថាជារបស់ទ្រង់តែងតែលេចមុខនៅឯការដេញថ្លៃ បន្ទាប់ពីការពិនិត្យ DNA រួច ។

គួរឲ្យដឹងថា ព្រះចៅអធិរាជណាប៉ូឡេអុង បូណាផាត បានឡើងគ្រងរាជ្យជាព្រះចៅអធិរាជរបស់បារាំងនៅឆ្នាំ ១៨០៤ ក្រោយផ្ដួលរំលំរដ្ឋាភិបាលចាស់បានសម្រេចនៅឆ្នាំ ១៧៩៨ ហើយព្រះអង្គក៏បានអនុវត្តនយោបាយពង្រីកទឹកដីចាប់ពីពេលនោះមក ៕

ប្រែសម្រួល៖ វារី

ប្រភព៖ CNA

ចុចអាន៖ ជីវិតចុងក្រោយរបស់មេទ័ពបារាំងដ៏ល្បីល្បាញ ណាប៉ូឡេអុង ក្រោយចាញ់សង្គ្រាម ត្រូវនិរទេសខ្លួនទៅកោះដាច់ស្រយាល