ព័ត៌មានជាតិ

អគ្គលេខាធិការកាកបាទក្រហមកម្ពុជា ប្រាប់មន្ត្រីឱ្យប្រុងប្រយ័ត្នខ្ពស់ចំពោះ ថវិកាកង្វល់ពីសប្បុរសជនមិនល្អ

បានផុស

៦ ខែ មុន

នៅ

ថ្ងៃចន្ទ ២០ តុលា ២០២៥

ដោយ

អគ្គលេខាធិការកាកបាទក្រហមកម្ពុជា ប្រាប់ដល់គណៈកម្មាធិការកាកបាទក្រហមកម្ពុជាខេត្តកោះកុង ត្រូវបង្កើនការប្រុងប្រយ័ត្នខ្ពស់ចំពោះការទទួលថវិកាកង្វល់ពីសប្បុរសជនមិនល្អក្រោមហេតុផលជាសប្បុរសធម៌។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ជាក់យ៉ាងដូច្នេះរបស់លោកស្រី ពុំ ចន្ទីនី អគ្គលេខាធិការកាកបាទក្រហមកម្ពុជា បានធ្វើឡើងក្នុងពិធីសន្និបាតសាខាកាកបាទក្រហមកម្ពុជាខេត្តកោះកុង អាណត្តិទី ៦ នៅថ្ងៃទី ២០ ខែតុលា ឆ្នាំ ២០២៥ នេះ។

លោកស្រី ពុំ ចន្ទីនី សង្កត់ធ្ងន់ថា កាកបាទក្រហមកម្ពុជា មានបេសកកម្ម ទិសដៅ ចក្ខុវិស័យ និងសកម្មភាពត្រឹមត្រូវណាស់ ទើបមានសប្បុរសជនចូលរួមបរិច្ចាគធនធានមកជួយ ករណីមិនត្រឹមត្រូវនោះទេ គ្មាននរណាគាំទ្រឡើយផ្នែកមនុស្សធម៌គ្រប់ទីកន្លែងទាំងអស់។ ដូច្នេះកាកបាទក្រហមកម្ពុជា មិនត្រូវការថវិកាណាដែលមិនល្អស្អាតមកជួយផ្នែកការងារសប្បុរសធម៌នោះទេ។

លោកស្រីអគ្គលេខាធិការកាកបាទក្រហមកម្ពុជា ក៏បានវាយតម្លៃខ្ពស់ចំពោះការដឹកនាំរបស់លោកស្រី មិថុនា ភូថង ដែលជាប្រធានគណៈកម្មាធិការសាខាកាកបាទក្រហមកម្ពុជាកន្លងទៅ ដោយទទួលបានជោគជ័យជាច្រើនផ្នែកដឹកនាំជំនួយមនុស្សធម៌ កៀរគរមូលនិធិ និងសង្គ្រោះជនងាយរងគ្រោះក្នុងមូលដ្ឋានខេត្តរហូតដល់ផុតអាណត្តិនៅថ្ងៃនេះ។

លោកស្រីជឿជាក់ថា ប្រធានថ្មី នៃគណៈកម្មាធិការសាខាកាកបាទក្រហមកម្ពុជាខេត្តកោះកុង នឹងបន្តអនុវត្តតួនាទីភារកិច្ចពង្រឹងការងារយុវជន-អ្នកស្ម័គ្រចិត្តកាកបាទក្រហមឱ្យបានទូលំទូលាយ និង សុក្រឹតភាពជាងមុន ព្រមទាំងចលនាចូលរួមសកម្មភាពការងារសង្គមយ៉ាងផុលផុស។ ចាំបាច់ហ្វឹកហាត់ជំនាញ និង ការយល់ដឹងពីចលនា គោលការណ៍គ្រឹះអន្តរជាតិ កាកបាទក្រហម អឌ្ឍចន្ទក្រហម ការផ្សព្វផ្សាយផ្សេងៗ ជូនអនុសាខា យុវជន អ្នកស្ម័គ្រចិត្ត និងសហគមន៍ ឱ្យបានល្អប្រសើរជាប្រចាំ។

តបនឹងការណែនាំរបស់លោកស្រី ពុំ ចន្ទីនី , លោកស្រី ឈី វ៉ា ប្រធានថ្មីកាកបាទក្រហមកម្ពុជាខេត្តកោះកុង បានប្ដេជ្ញាចិត្តថា លោកស្រី នឹងប្រឹងប្រែងពង្រឹងអង្គភាព និងលើកទិសដៅការងារជាច្រើនចំពោះសកម្មភាពមនុស្សធម៌ក្នុងសហគមន៍នៅពេលមានគ្រោះមហន្តរាយ និងជនរងគ្រោះឱ្យបានទាន់ពេលវេលា តបនឹងផែនការរបស់កាកបាទក្រហមកម្ពុជា។

លោកស្រី ឈី វ៉ា នឹងជំរុញអនុសាខាក្រុង-ស្រុកទាំង ៧ ដើម្បីចូលរួមចំណែកសហការឱ្យបានល្អជាមួយអាជ្ញាធរមូលដ្ឋាន ដើម្បីរួមគ្នាអភិវឌ្ឍន៍ស្ថាប័ននេះ ឱ្យកាន់តែរឹងមាំស្វែងរកមូលនិធិ និងមានធនធានគ្រប់គ្រាន់ជួយដល់ប្រជាពលរដ្ឋរងគ្រោះ។

ក្នុងអាណត្តិ ៦ ឆ្នាំ កន្លងទៅ លោកស្រី មិថុនា ភូថង អតីតប្រធានគណៈកម្មាធិការកាកបាទក្រហមកម្ពុជាខេត្តកោះកុង បង្ហាញថា សាខាកាកបាទក្រហមកម្ពុជាខេត្ត និងអនុសាខាតាមបណ្តាក្រុង-ស្រុកទាំង ៧ បានផ្តល់សេវាកម្មមនុស្សធម៌ជូនអ្នកទទួលផលដោយផ្ទាល់សរុប ៧.៣៣៣ គ្រួសារ និងមានអ្នកទទួលផលដោយប្រយោលប្រមាណ ៤ ម៉ឺន ១ ពាន់នាក់ ដោយរងគ្រោះមហន្តរាយ និងការប្រែប្រួលអាកាសធាតុ ក្នុងនោះ មានខ្យល់កន្ត្រាក់ ទឹកជំនន់ អគ្គិភ័យ រលំផ្ទះ យុទ្ធភណ្ឌមិនទាន់ផ្ទុះ រន្ទះបាញ់ គ្រោះថ្នាក់ចរាចរណ៍ ស្ត្រីពោះម៉ាយ កុមារកំព្រា និងលង់ទឹក។

ក្រៅពីនេះ សាខាកាកបាទក្រហមកម្ពុជាខេត្តកោះកុង ក៏ធ្វើសកម្មភាពច្រើនការងារអប់រំថែទាំសុខភាពនៅតាមសហគមន៍នីមួយៗ ដូចជា ៖ បង្រៀនការសង្គ្រោះបឋម អប់រំបង្ការជំងឺអេដស៍ គ្រោះថ្នាក់ចរាចរណ៍ ចូលរួមសកម្មភាពកិច្ចប្រជុំផ្សេងៗ និងបញ្ហាផលប៉ះពាល់គ្រឿងញៀនជាដើម៕

អត្ថបទ ៖ សិរីវឌ្ឍនៈ