អ្នកប្រកបរបរឡើងត្នោតចាប់ផ្ដើមទៀតហើយ ក្រោយផុតរដូវភ្លៀង

រដូវលក់ទឹកឆ្នោតផ្អែម និងទឹកត្នោតជូរ កំពុងចាប់ផ្ដើមដំណើរការជាបណ្ដើរៗហើយ ដោយប្រជាកសិករដែលប្រកបមុខរបរឡើងត្នោត ក៏បានរៀបចំបង្អោង បំពង់ កាំបិត ដែលជាឧបករណ៍ធ្វើត្នោត ដើម្បីចាប់ផ្ដើមដំណើរការឡើងវិញ បន្ទាប់ពីអាក់ខានជាងកន្លះឆ្នាំដោយសាររដូវភ្លៀងធ្លាក់។

លោក សាន ផល្លា ជាកសិកររស់នៅឃុំព្រែកនរិន្ទ ស្រុកឯកភ្នំ ខេត្តបាត់ដំបង បាននិយាយថា នៅពេលនេះ គឺទើបតែចាប់ផ្ដើម ដោយសារតែផ្កាត្នោតឈ្មោលមិនទាន់មានច្រើន ដូច្នេះលោកក៏គាបយកទឹកជាបណ្ដើរៗដើម្បីច្រកដបលក់ឲ្យអតិថិជនដែលធ្វើដំណើរឆ្លងកាត់តំបន់នេះ ដោយតម្លៃមួយដបត្រឹមតែ ១.០០០ រៀលតែប៉ុណ្ណោះ ហើយនៅដើមដៃបែបនេះក្នុងមួយថ្ងៃលោកអាចផលិតទឹកត្នោតផ្អែម បានចន្លោះពី ៦០ ទៅ ៨០ ដបតែប៉ុណ្ណោះ ប៉ុន្តែបើទៅមុខបន្តិចទៀតនៅពេលដែលផ្កាត្នោតឈ្មោលចាប់ផ្ដើមចេញមកច្រើននោះលោកក៏អាចផលិតទឹកត្នោតផ្អែមបានច្រើនទៅតាមហ្នឹងដែរ។

លោក ផល្លា បន្ថែមថា តាំងពីដើមរៀងមក គឺឪពុករបស់លោកជាអ្នកប្រកបមុខរបរឡើងត្នោត រហូតដល់បច្ចុប្បន្នក៏លោកនៅតែប្រកបរបរនេះបន្តពីឪពុករបស់លោកផងដែរ។ ដោយនៅក្បែរផ្ទះមានដើមត្នោតពីរជួរនៅជាប់ៗគ្នា ដូច្នេះលោកអាចឡើងតែមួយដើម គឺបន្តដើរតាមធាងទៅដើមផ្សេងៗទៀតបានដោយងាយ ដោយឡែកសម្រាប់បំពង់ទឹកឆ្នោតដែលត្រង់ទឹកបាន គឺលោកចងខ្សែយោងចុះមកក្រោម ដោយមិនចាំបាច់ស្ពាយនៅនឹងចង្កេះឡើយ។

លោកបានបន្តថា កាលពីឆ្នាំកន្លងទៅ លោកអាចផលិតទឹកត្នោតផ្អែមដើម្បីលក់ក្នុងមួយថ្ងៃគឺចាប់ពី ៣០០ដប ដល់ ៥០០ ដប ដើម្បីលក់ឲ្យអតិថិជន ប៉ុន្តែបើថ្ងៃណាលក់មិនអស់ គឺភរិយារបស់លោកបានយកទឹកឆ្នោតផ្អែមនោះទៅកូរម្ងាស់ជាស្ករត្នោត ដើម្បីទុកលក់ជាស្ករផែនបន្ថែមទៀត ហើយបើដល់ពេលរដូវភ្លៀងដែលធ្វើត្នោតមិនកើត នោះលោកក៏ចាប់ផ្ដើមធ្វើស្រែម្ដង ដើម្បីលើកស្ទួយនៅក្នុងជីវភាពគ្រួសារប្រចាំថ្ងៃ ដោយការឡើងត្នោតនេះវាជាទម្លាប់ទៅហើយ ហើយក៏ជាមុខរបរបន្តពីឪពុកផងដែរ៕

អត្ថបទ៖ សោ និយមរ័ត្ន