ប្រទេសបារាំង វាយតម្លៃខ្ពស់ចំពោះការចុះកិច្ចព្រមព្រៀងសន្តិភាពរវាង កម្ពុជា-ថៃ

នៅថ្ងៃទី២៨ ខែតុលា ឆ្នាំ២០២៥ ស្ថានទូតបារាំងប្រចាំកម្ពុជា បានបង្ហោះពីសេចក្តីថ្លែងការណ៍រួមរបស់ក្រសួងអឺរ៉ុប និងការបរទេសបារាំង ថា ប្រទេសបារាំង វាយតម្លៃខ្ពស់ចំពោះការចុះកិច្ចព្រមព្រៀងសន្តិភាព កម្ពុជា-ថៃ កាលពីថ្ងៃទី២៦ ខែតុលា នៅប្រទេសម៉ាឡេស៊ី ក្នុងឱកាសនៃកិច្ចប្រជុំកំពូលអាស៊ានលើកទី៤៧។

បើតាម ស្ថានទូតបារាំងប្រចាំកម្ពុជា បញ្ជាក់ថា៖ “សេចក្តីថ្លែងការណ៍រួមនេះ អនុញ្ញាតឱ្យប្រទេសកម្ពុជា និងប្រទេសថៃ ដោះស្រាយជម្លោះព្រំដែនដោយសន្តិវិធី ដែលមានភាពចាំបាច់សម្រាប់ស្ថិរភាពតំបន់”។

ជាមួយគ្នានេះ ប្រទេសបារាំងក៏វាយតម្លៃខ្ពស់ជាពិសេស ចំពោះការចុះហត្ថលេខាលើលក្ខខណ្ឌយោងសម្រាប់ក្រុមអ្នកសង្កេតការណ៍អាស៊ាន ដែលនឹងអនុញ្ញាតឱ្យពន្លឿនការដាក់ពង្រាយនៅតាមមូលដ្ឋាន ការប្តេជ្ញាចិត្តរបស់ភាគីទាំងពីរក្នុងការដកអាវុធធុនធ្ងន់ចេញពីព្រំដែន ការបន្តការ​ដោះ​មីន ក៏ដូចជាការប្រកាសរបស់ប្រទេសថៃស្តីពីការដោះលែងទាហានកម្ពុជាដែលប្រទេសថៃកំពុងឃុំខ្លួន។

លើសពីនេះ ប្រភពដដែលបញ្ជាក់ទៀតថា៖ “ដោយមានទំនាក់ទំនងជាមួយដៃគូអាស៊ាន និងសហរដ្ឋអាមរិក ប្រទេសបារាំងនឹងតាមដានដោយយកចិត្តទុកដាក់ចំពោះការអនុវត្តជាក់ស្តែងនូវការប្តេជ្ញាចិត្តទាំងនេះ ក៏ដូចជាការបន្តការដោះស្រាយជម្លោះព្រំដែនរវាងភាគីទាំងពីរតាមរយៈការសន្ទនា និងដោយគោរពច្បាប់អន្តរជាតិ”។

សូមជម្រាបថា ការចុះហត្ថលេខាកិច្ចព្រមព្រៀងសន្តិភាពរវាងកម្ពុជា និងថៃ រៀបចំឡើងនៅទីក្រុងគូឡាឡាំពួរ ក្នុងឱកាសនៃកិច្ចប្រជុំកំពូលអាស៊ានលើកទី៤៧ ដោយមានការចូលរួមជាសាក្សីពី នាយករដ្ឋមន្ត្រីម៉ាឡេស៊ី និងជាប្រធានអាស៊ាន គឺ លោក អាន់វ៉ា អ៊ីប្រាហ៊ីម និងប្រធានាធិបតីអាមេរិក លោក ដូណាល់ ត្រាំ ផងដែរ។ វត្តមានរបស់មេដឹកនាំទាំង២ ក្នុងការសម្រេចបាននូវកិច្ចព្រមព្រៀងសន្តិភាព នេះ ទទួលបានការសាទរខ្លាំងចំពោះប្រជាជនកម្ពុជា និងពិភពលោក៕