បារាំង ខឹងសម្បារយ៉ាងខ្លាំង ក្រោយមន្ត្រីការទូតខ្លួនរងការ​ធ្វើបាបនៅអ៊ីរ៉ង់

រដ្ឋមន្ត្រីការបរទេសបារាំង បានប្រកាសកាលពីថ្ងៃ ទី២០ ខែកក្កដា ថា មន្ត្រីការទូត​របស់ខ្លួន​ចំ​នួន​ពីររូបប្រចាំប្រទេសអ៊ីរ៉ង់ បានរងគ្រោះដោយសារតែ​ «សកម្មភាពគំរាមកំហែងដ៏ធ្ងន់ធ្ងរបំផុត» ពីសំណាក់ទីភ្នាក់ងារសន្តិសុខ​អ៊ីរ៉ង់ ហើយក្នុងនោះមានមន្ត្រីម្នាក់បានរងការធ្វើបាបខាងរាងកាយថែមទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Jean-Noel Barrot រដ្ឋមន្ត្រីការបរទេសបារាំង បានបញ្ជាក់នៅក្នុងសេចក្តីថ្លែងការណ៍មួយថា មន្ត្រីការទូតទាំងពីររូប ត្រូវបានមន្ត្រីអ៊ីរ៉ង់កំណត់គោលដៅវាយប្រហារកាលពីយប់ថ្ងៃអាទិត្យ ដែលនេះជា ការរំលោភបំពានយ៉ាងធ្ងន់ធ្ងរលើអភ័យឯកសិទ្ធិការទូត។ នេះបើយោងតាមការចេញផ្សាយពីសារព័ត៌មាន lemonde.fr។

លោកបានបន្តថា ពួកគេទាំងពីរនាក់ត្រូវបាន ឃាត់ខ្លួនអស់រយៈពេលជាច្រើនម៉ោងដោយគ្មានមូលហេតុ ត្រូវបានសាកសួរចម្លើយ ហើយម្នាក់ក្នុងចំណោមពួកគេត្រូវបានគេធ្វើបាបខាងរាងកាយ មុនពេលពួកគេអាចត្រឡប់ទៅកាន់ស្ថានទូតវិញ។ បច្ចុប្បន្ន ពួកគេមានសុវត្ថិភាពហើយ និងត្រូវបានរំពឹងថានឹងធ្វើដំណើរត្រឡប់មកប្រទេសបារាំងវិញក្នុងរយៈពេលប៉ុន្មានម៉ោងខាងមុខ។

លោក Barrot បានសង្កត់ធ្ងន់ថា «ការវាយប្រហារនេះគឺជារឿងដ៏រន្ធត់បំផុត ព្រោះមន្ត្រីទាំងពីររូបនេះគឺជាអ្នកគ្រប់គ្រងកម្មវិធីរបស់យើងក្នុងការគាំទ្រដល់សង្គមស៊ីវិល ជាពិសេសសិល្បករ និងអ្នកវិទ្យាសាស្ត្រអ៊ីរ៉ង់»។

លោករដ្ឋមន្ត្រី ដែលកំពុងបំពេញទស្សនកិច្ចនៅប្រទេសអ៊ីស្លង់ បានថ្លែងថា លោកបានប្រាប់ទៅកាន់សមភាគីអ៊ីរ៉ង់ លោក Abbas Araghchi រួចហើយថា ហេតុការណ៍ដ៏ធ្ងន់ធ្ងរ និងមិនអាចទទួលយកបាន នេះ មិនអាចបញ្ចប់ទៅដោយគ្មានផលវិបាកនោះឡើយ។

ការលើកឡើងនេះបានធ្វើឡើងបន្ទាប់ពីលោក Barrot បានបញ្ជាក់ជាថ្មីកាលពីសប្តាហ៍មុនថា ទណ្ឌកម្មរបស់អឺរ៉ុបលើអ៊ីរ៉ង់ នឹងមិនត្រូវបានលើកលែងនោះទេ លុះត្រាតែទីក្រុងតេហេរ៉ង់បោះបង់ចោលកម្មវិធីនុយក្លេអ៊ែររបស់ខ្លួន និងបញ្ឈប់សកម្មភាពដែលទីក្រុងប៉ារីសហៅថាជាការបង្កអស្ថិរភាពនៅក្នុងតំបន់។

ស្របពេលជាមួយគ្នានេះ ទីក្រុងតេហេរ៉ង់បានប្រកាសកាលពីថ្ងៃច័ន្ទថា ខ្លួនកំពុងប្រយុទ្ធក្នុងសង្គ្រាមទ្រង់ទ្រាយធំ ជាមួយវ៉ាស៊ីនតោន ខណៈដែលសហរដ្ឋអាមេរិកបានពង្រីកការវាយប្រហារតាមអាកាសពាសពេញប្រទេសអ៊ីរ៉ង់ ជាយប់ទីប្រាំបួនជាប់ៗគ្នា ចាប់តាំងពីកិច្ចព្រមព្រៀងឈប់បាញ់ដ៏ផុយស្រួយបានដួលរលំ៕

អត្ថបទ ៖ សាង ស្រីល័ក្ខ

ខ្មាន់កាំភ្លើងមិនស្គាល់មុខ លបធ្វើ​ឃាតមេដឹកនាំនិកាយសាសនា​ដ៏ល្បីម្នាក់នៅ អ៊ីរ៉ង់