គ្រូពេទ្យបារាំង​យកទីតាំងនៅលេីកប៉ាល់ ជួយ​ពិនិត្យព្យាបាល​ភ្នែក​ដល់ពលរដ្ឋក្នុង​ខេត្ត​ក្រចេះ

តាមការគ្រោងទុករបស់ក្រុមគ្រូពេទ្យភ្នែកនៃអង្គការ Pour Les Yuen De Monde ប្រទេសបារាំង សហការជាមួយកម្មវិធីសុខភាពភ្នែកក្រសួងសុខាភិបាល ដោយមានការចូលរួមពីមន្ទីរសុខាភិបាលខេត្តក្រចេះ បានចាប់ផ្ដើមធ្វើការពិនិត្យព្យាបាល និងវះកាត់ជំងឺភ្នែក ជូនប្រជាពលរដ្ឋ នៅខេត្តក្រចេះ ដោយឥតគិតថ្លៃ ចាប់ពីថ្ងៃទី២ ខែវិច្ឆិកា ឆ្នាំ​២០២៥​។

នៅព្រឹកថ្ងៃទី៣ ខែវិច្ឆិកា ត្រូវនឹងថ្ងៃទី២ នៃការចុះពិនិត្យព្យាបាលជំងឺភ្នែកនេះដែរ ឃើញថាមានប្រជាពលរដ្ឋយ៉ាងច្រើនកុះករ មកពីតាមបណ្តាស្រុក ក្រុង ក្នុងខេត្តក្រចេះ មកទទួលសេវាពិនិត្យព្យាបាល និងវះកាត់ជំងឺភ្នែក ដោយឥតគិតថ្លៃ។

តាមការឱ្យដឹងពីលោក ហាស់ សុខហួន តំណាងសមាគមន៍ក្រុមគ្រូពេទ្យសម្រាប់ភ្នែកនៃអង្គការ Pour Les De Yuen Monde ប្រទេសបារាំង បានឱ្យដឹងថា ការចុះពិនិត្យព្យាបាលជំងឺភ្នែន នៅក្នុងខេត្តក្រចេះ​នេះដែរ​ គឺធ្វេីឡេីងចំនួន ០២​លេីក​ ដោយលេីកទី១ ក្រុមគ្រូពេទ្យនៃប្រទេសបារាំង បានកំណត់យកទីតាំងនៅលេីកប៉ាល់ ដែលចតនៅមាត់ទន្លេកំពង់ផែ​ក្រុងក្រចេះ ខេត្តក្រចេះ សម្រាប់ធ្វេីការព្យាបាល និងវះកាត់ជំងឺភ្នែក ជូនប្រជាពលរដ្ឋរយៈពេល ៧ ថ្ងៃ ពោល គឺចាប់ទី២ ខែវិច្ឆិកា ដល់ថ្ងៃទី៨ ខែវិច្ឆិកា ឆ្នាំ២០២៥ និងលេីកទី០២ ធ្វេីឡេីងរយៈពេល ៩ ថ្ងៃ គឺចាប់ពីថ្ងៃទ១៦ ខែវិច្ឆិកា ដល់ទី២៤ ខែវិច្ឆិកា ឆ្នាំ២០២៥ នៅទីតាំងលេីកប៉ាល់​មាត់ទន្លេ មុខវត្តខ្សាច់អណ្ដែត ឃុំខ្សាច់អណ្ដែត ស្រុកឆ្លូង ខេត្តក្រចេះ។

លោក បានបន្តឲ្យដឹងថា កន្លងមកក្រុមគ្រូពេទ្យរបស់លោក ធ្លាប់មកព្យាបាលជំងឺភ្នែកជូនប្រជាពលរដ្ឋដោយឥតគិតថ្លៃនៅស្រុកចិត្របុរី ខេត្តក្រចេះ ចំនួន ៣ លេីករួចហេីយ កាលនៅប្រេីប្រាស់កប៉ាល់​តូច ចំពោះកប៉ាលធំនេះ គឺជាលេីកទី១ ផងដែរ។

លោក ហាស់ សុខហួន បានបញ្ជាក់បន្ថែមថា ក្នុងមួយថ្ងៃក្រុមគ្រូពេទ្យ អាចព្យាបាលអ្នកជំងឺភ្នែកចន្លោះពី ៨០ នាក់​ ទៅ ១២០ នាក់ តាមស្ថានភាពជំងឺ និងអាចធ្វេីវះកាត់បានចន្លោះពី ១០នាក់ ទៅ ១២នាក់ ក្នុងមួយថ្ងៃផងដែរ៕

អត្ថបទ៖ ប្រុញ វិធិន