ថ្នាក់ដឹកនាំសាលាក្នុងខេត្តមណ្ឌលគិរី ចុះណែនាំអាជីវករហាមលក់ចំណីអាហារប៉ះពាល់សុខភាពសិស្ស

បន្ទាប់ពីបើកបវេសនកាលឆ្នាំសិក្សា ២០២៥-២០២៦ សាលារៀននានាក្នុងខេត្តមណ្ឌលគីរី មួយចំនួនបានបន្តអនុវត្តការរឹតបន្តឹងលើការលក់ភេសជ្ជៈប៉ូវកម្លាំង និងចំណីអាហារដែលប៉ះពាល់ដល់សុខភាពនៅក្នុងបរិវេណសាលា ដោយមានគោលបំណងលើកកម្ពស់សុខភាពសិស្ស។

លោក សាង រ៉ា នាយកសាលាបឋមសិក្សាហ៊ុនសែន សែនមនោរម្យ ខេត្តមណ្ឌលគិរី បានប្រាប់«កម្ពុជាថ្មី» នៅថ្ងៃទី១១ខែវិច្ឆិកានេះថា ស្របតាមគោលនយោបាយរបស់ក្រសួងអប់រំ និងការណែនាំពីមន្ទីរអប់រំខេត្ត ថ្នាក់ដឹកនាំសាលាបានហាមឃាត់យ៉ាងតឹងរ៉ឹងចំពោះការលក់ភេសជ្ជៈផ្អែម និងអាហារប៉ះពាល់សុខភាពសិស្ស។ លោកបានសង្កត់ធ្ងន់ថា ការរឹតបន្តឹងទាំងនេះមានសារៈសំខាន់ណាស់សម្រាប់ការការពារសុខភាពសិស្សដែលជាទំពាំងស្នងឬស្សី។​

លោកថ្លែងប្រាប់ថា៖« លើសពីនេះ គ្រូបានធ្វើការអប់រំផ្សព្វផ្សាយជាប្រចាំនៅពេលដែលសិស្សានុសិស្សមកជួបជុំគ្នាពេលដែលគោរពទង់ជាតិម្តងៗ និងបានអប់រំផ្សព្វផ្សាយទៅដល់អាណាព្យាបាលសិស្សឱ្យយល់ដឹង និងជួយអប់រំដល់កូនៗកុំឱ្យបរិភោគចំណីអាហារណាធ្វើឱ្យប៉ះពាល់ទៅដល់សុខភាព»។ លោកគ្រូ អ្នកគ្រូ ក៏បានអប់រំទៅដល់អាជីវករលក់ដូរ ឱ្យចៀសវាងលក់អាហារកញ្ចប់ ឬភេសជ្ជៈផ្អែមណា ធ្វើឱ្យប៉ះពាល់ទៅដល់សុខភាពសិស្សានុសិស្សដែលកំពុងស្ថិតនៅក្នុងការសិក្សា។

ជានិច្ចជាកាល មន្ទីរអប់រំខេត្ត តែងតែក្រើនរំលឹក និងណែនាំទៅដល់ការិយាល័យអប់រំរដ្ឋបាលក្រុងស្រុកទាំង៥ ឱ្យអនុវត្តតាមការណែនាំរបស់ក្រសួងអប់រំ និងបន្តអនុវត្តចុះអប់រំផ្សព្វផ្សាយទៅដល់ អាណាព្យាបាលក៏ដូចជាអាជីវករដែលលក់ដូរចំណីអាហារណាដែលក្រសួងបានហាមឃាត់។ នេះបើតាមលោក លី សាមិ ប្រធានមន្ទីរអប់រំខេត្តមណ្ឌលគិរី។

ជាមួយគ្នានេះ អាជីវករមួយរូបដែលលក់ដូរនៅបរិវេណសាលា បានថ្លែងប្រាប់ ក្រោយពីទទួលបានការអប់រំណែនាំពីថ្នាក់ដឹកនាំសាលា រូបគាត់ងាកមកផលិតនំចំណីដែលធ្វើឱ្យខ្លួនឯង លក់ផលិតផលខ្មែរ និងប្រើគ្រឿងផ្សំដែលមិនធ្វើឱ្យប៉ះពាល់ដល់សិស្សានុសិស្ស។

កន្លងទៅ ក្រសួងអប់រំ ណែនាំឱ្យមន្ទីរអប់រំ យុវជន និងកីឡារាជធានី ខេត្ត ការិយាល័យអប់រំ យុវជន និងកីឡានៃ រដ្ឋបាលក្រុង ស្រុក ខណ្ឌ និងគ្រប់គ្រឹះស្ថានសិក្សាសាធារណៈនិងឯកជន និងគ្រឹះស្ថានអប់រំបច្ចេកទេសនៅទូទាំងប្រទេស ត្រូវហាមឃាត់ដាច់ខាតនូវការចែកចាយ ការតាំងលក់ និងការផ្សព្វផ្សាយពាណិជ្ជកម្ម ផលិតផលភេសជ្ជៈប៉ូវកម្លាំងគ្រប់ប្រភេទនៅក្នុង និងជុំវិញជាប់បរិវេណគ្រឹះស្ថានសិក្សា។ ការណែនាំនេះ ដើម្បីលើកកម្ពស់សុវត្ថិភាពចំណី អាហារ និងអាហារប្រកបដោយសុខភាពនៅតាមគ្រឹះស្ថានសិក្សា៕

អត្ថបទ៖ រៀម សុខហេង