ព័ត៌មានជាតិ

លោក ជិន ម៉ាលីន ជួបប្រជុំជាមួយតំណាង UNDP , UNOHCHR និងអ្នកជំនាញពាក់ព័ន្ធ តាម Zoom

បានផុស

៤ years មុន

នៅ

ថ្ងៃអង្គារ ១៣ មេសា ២០២១

ដោយ

លោក ជិន ម៉ាលីន រដ្ឋលេខាធិការក្រសួងយុត្តិធម៌ បានដឹកនាំកិច្ចប្រជុំជាមួយតំណាង UNDP, UNOHCHR, អ្នកជំនាញការបរទេស និងអន្តរក្រសួងពាក់ព័ន្ធ ធ្វើកាវាយតម្លៃគម្រោងសិទ្ធិទទួលបានយុត្តិធម៌សម្រាប់ជនមានពិការភាពនៅកម្ពុជា តាមប្រព័ន្ធអនឡាញ Zoom ដើម្បីវាយតម្លៃពីគម្រោងសិទ្ធិទទួលបានយុត្តិធម៌សម្រាប់ជនពិការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជិន ម៉ាលីន បានថ្លែងប្រាប់កម្ពុជាថ្មីនៅថ្ងៃទី១៣ ខែមេសា នេះថា គម្រោងនេះអនុវត្តរយៈពេលបីឆ្នាំ គឺពីឆ្នាំ២០១៨ ដល់២០២០ ហើយមកដល់ពេលនេះបានបញ្ចប់ ដែលត្រូវធ្វើការវាយតម្លៃមួយ ថាតើចំណុចខ្លាំងចំណុចខ្សោយមានអ្វីខ្លះ និងដើម្បីផ្ដល់ឱកាសឲ្យវាយតំលៃអំពីគម្រោង ដើម្បីបន្តគម្រោងនេះតទៅទៀត ដោយបញ្ចូលអនុសាសន៍ពីស្ថាប័នពាក់ព័ន្ធ ដែលបានផ្ដល់ឱ្យ ដើម្បីឲ្យគម្រោងនេះអនុវត្តទៅមានប្រសិទ្ធភាព ជាពិសេសនៅក្នុងដំណាក់កាលដែលយើងកំពុងជួបនូវវិបត្តិកូវីដ១៩នេះ។

សូមបញ្ជាក់ថា កិច្ចប្រជុំតាមប្រព័ន្ធអនឡាញ Zoom ជាមួយតំណាង UNDP, UNOHCHR អ្នកជំនាញការបរទេស និងអន្តរក្រសួងពាក់ព័ន្ធនេះ បានធ្វើឡើងកាលពីម្សិលមិញ (ថ្ងៃទី១២ ខែមេសា) ដើម្បីធ្វើកាវាយតម្លៃគម្រោងសិទ្ធិទទួលបានយុត្តិធម៌សម្រាប់ជនមានពិការភាពនៅកម្ពុជា ដែលគាំទ្រដោយកម្មវិធីជំនួយរបស់ UNDP និងបានអនុវត្តសម្រាប់រយៈពេល៣ឆ្នាំ២០១៨ – ២០២០ ក្នុងគោលដៅលើកស្ទួយអត្ថប្រយោជន៍ និងសិទ្ធិទទួលបានយុត្តិធម៌របស់ជនងាយរងគ្រោះ រួមមានជនមានពិការភាពជាដើម។

កិច្ចប្រជុំនេះ ក៏បានធ្វើការវាយតម្លៃផងដែរ ពីចំណុចខ្លាំង និងចំណុចខ្សោយរបស់គម្រោង និងផ្តល់ជាអនុសាសន៍មួយចំនួនសម្រាប់បន្តគម្រោងនេះទៅមុខទៀត ឱ្យកាន់តែមានប្រសិទ្ធភាពខ្ពស់ ជាពិសេសឆ្លើយតបបានទៅនឹងតម្រូវការរបស់គ្រប់ភាគីពាក់ព័ន្ធក្នុងបរិបទកូវីដ-១៩ នេះ៕

ដោយ ៖ កោះកែវ