អាជ្ញាធរសង្កាត់ជ័យជំនះ ចុះពិនិត្យវឌ្ឍនភាព នៃការផ្លាស់ប្ដូរការ៉ូឡាថ្មី ក្នុងមូលដ្ឋាន

អាជ្ញាធរសង្កាត់ជ័យជំនះ ធ្វើការផ្លាស់ប្ដូរការ៉ូឡាថ្មី ដើម្បីលើកកម្ពស់សោភ័ណភាពក្នុងមូលដ្ឋានសង្កាត់ ជាពិសេសនៅលើចិញ្ចើមផ្លូវព្រះស៊ីសុវត្ថិ ដែលជាតំបន់មានភ្ញៀវទេសចរអន្តរជាតិដើរលេងកម្សាន្តច្រើននាពេលរាត្រី និង ជាផ្លូវដើរថ្មើរជើងនាចុងសប្ដាហ៍( Walkstreet)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្តែងទីតាំងគម្រោងអភិវឌ្ឍន៍រៀបចំការ៉ូឡាថ្មី ស្ថិតនៅលើចិញ្ចើមផ្លូវព្រះស៊ីសុវត្ថិ និង ផ្លូវសុធារស ភូមិ ១ សង្កាត់ជ័យជំនះ ខណ្ឌដូនពេញ រាជធានីភ្នំពេញ។

លោក លី មុនី ជាប្រជាពលរដ្ឋមានលំនៅឋាននៅលើផ្លូវកំពុងដំណើរការដ្ឋាន បានសម្ដែងក្ដីរីករាយសប្បាយចិត្ត ពេលមានការ៉ូឡាថ្មី នៅមុខផ្ទះស្អាត ខណៈផ្លូវដែលអាជ្ញាធរកំពុងរៀបនេះគឺជាផ្លូវមានភ្ញៀវដើរលេងកម្សាន្តនៅពេលរាត្រី ដោយសម្បូរភ្ញៀវទេសចរអន្តរជាតិ។ ទន្ទឹមនោះ លោក បានថ្លែងអំណរអរគុណដល់អាជ្ញាធរ ដែលតែងយកចិត្តទុកដាក់ពីដងផ្លូវ សោភ័ណភាពទីក្រុងស្អាត។

លោក លី សុខគ្រី ចៅសង្កាត់ជ័យជំនះ បានបញ្ជាក់ថា គម្រោងអភិវឌ្ឍន៍សង្កាត់ឆ្នាំ ២០២៥ ការរៀបការ៉ូឡាថ្មីនេះ ស្ថិតនៅលើគម្រោងអភិវឌ្ឍន៍ឆ្នាំ ២០២៥ ចាប់ពីចំណុចព្រះគម្លង់ ផ្លូវព្រះស៊ីសុវត្ថិ រហូតដល់ផ្លូវប្រសព្វនឹងផ្លូវសម្ដេចសុធារស។ ក្នុងនោះ អាជ្ញាធរ បានណែនាំឲ្យម្ចាស់ក្រុមហ៊ុនម៉ៅការធ្វើឲ្យមានលក្ខណៈបច្ចេកទេសត្រឹមត្រូវ និង ធ្វើយ៉ាងណាមិនឲ្យប៉ះពាល់ដល់ផលប្រយោជន៍ពលរដ្ឋ ត្រូវកាត់បន្ថយផលប៉ះពាល់ឲ្យបានច្រើនបំផុត។

លោកបានបន្ថែមឲ្យដឹងថា ការផ្លាស់ប្ដូរការ៉ូឡាថ្មីនេះ ជាគម្រោងរបស់រដ្ឋបាលសង្កាត់ ដោយសង្កេតឃើញថាការ៉ូឡានេះ មានសភាពចាស់ទ្រុឌទ្រោម ខូចខាត ដូច្នេះដើម្បីពលរដ្ឋធើ្វដំណើរបានយ៉ាងងាយស្រួល ហើយជៀសវាងបង្កគ្រោះថ្នាក់ណាមួយជាយថាហេតុ។

រដ្ឋបាលសង្កាត់ បានផ្លាស់ប្ដូរការ៉ូឡាថ្មីនេះ ដោយលើកឲ្យខ្ពស់ជាងមុន និងធានាគុណភាពល្អជាងមុនផងដែរ ពិសេសនោះបានការ៉ូឡាឆ្នូតពណ៌លឿងសម្រាប់កំណត់ព្រំរួចស្រេចផងដែរ៕

ដោយ ៖ ម៉េង