ព័ត៌មានជាតិ

ទំនប់ដូនទ្រីបញ្ចប់សាងសង់ ១០០% អាចនាំទឹកស្រោចស្រពដីកសិកម្មបាន ១៥ ឃុំ ក្នុងខេត្តបាត់ដំបងនិងពោធិ៍សាត់

បានផុស

៥ ខែ មុន

នៅ

ថ្ងៃអង្គារ ១៨ វិច្ឆិកា ២០២៥

ដោយ

គម្រោងអភិវឌ្ឍន៍ទំនប់ដូនទ្រី ក្នុងភូមិសាស្ត្រខេត្តបាត់ដំបងសម្រេចការសាងសង់បញ្ចប់ ១០០% ខណៈទំនប់នេះមានលទ្ធភាពស្តុកទឹកបានប្រមាណ ១៦៣ លានម៉ែត្រគូប សម្រាប់បម្រើដល់វិស័យកសិកម្ម។

លោក សុខ លូ អភិបាលខេត្តបាត់ដំបងបានបញ្ជាក់ថា សក្តានុពលទំនប់នេះមានលទ្ធភាពអាចផ្គត់ផ្គង់ទឹកស្រោចស្រពលើផ្ទៃដីកសិកម្មនៅរដូវវស្សាប្រមាណ ៣៣ ០០០ ហិកតា និងរដូវប្រាំងប្រមាណ ៤ ៥០០ ហិកតា ក្នុងឃុំចំនួន ១៥ នៃស្រុកចំនួនបីគឺ ស្រុកមោងឬស្សី និងស្រុករុក្ខគិរី ខេត្តបាត់ដំបង និងស្រុកបាកាន ខេត្តពោធិ៍សាត់។

លោកបន្តថា គម្រោងនេះក៏នឹងចូលរួមចំណែកក្នុងការផ្គត់ផ្គង់ទឹកលើគ្រប់វិស័យ ជាពិសេសវិស័យទឹកស្អាតដែលបម្រើឱ្យការប្រើប្រាស់ក្នុងជីវភាពរស់នៅប្រចាំថ្ងៃ និងជួយកាត់បន្ថយទឹកជំនន់តាមតំបន់មួយចំនួននៅផ្នែកខាងក្រោម។

គម្រោងអភិវឌ្ឍន៍ទំនប់ដូនទ្រី បានចាប់ផ្ដើមបើកការដ្ឋានសាងសង់ក្នុងខែមិថុនា ឆ្នាំ២០១៨ និងបានបញ្ចប់ការសាងសង់អំឡុងខែតុលា ឆ្នាំ២០២៥។

ការងារសំខាន់ៗក្នុងគម្រោងរួមមាន ទី១) សំណង់ទំនប់មេប្រវែង ៦៥៤ ម៉ែត្រ ទី២) សំណង់បង្ហៀរប្រវែង ៤១៤ ម៉ែត្រ ទី៣) រូងទូនេលពង្វាងទឹករាងជាក្រចកជើងសេះប្រវែង ៤៦២ ម៉ែត្រ ទី៤)សំណង់គ្រប់គ្រងទឹកជាប្រភេទសំណង់ប៉មមានទ្វារទឹកច្រើនថ្នាក់ ដែលមានទ្វារទឹកចំនួន ៥ និងស្ពានសម្រាប់ឆ្លងទៅប៉មប្រវែង ៥៥ ម៉ែត្រ ទី៥)ផ្លូវក្រាលថ្មភ្នំប្រវែង ១៧,៣គីឡូម៉ែត្រ និងទី៦)សំណង់ដោះទឹកចំនួន ៨ កន្លែង និងស្ពានបណ្តោះអាសន្នចំនួន ៣ កន្លែង៕