រដ្ឋមន្ត្រីមហាផ្ទៃលើកឡើងពីកិច្ចសហការជិតស្និទ្ធរបស់ស្ថាប័នអក្សរសម្ងាត់វៀតណាមជាមួយកម្ពុជា

រដ្ឋមន្ត្រីក្រសួងមហាផ្ទៃ លោក ស សុខា លើកឡើងពីកិច្ចសហការដ៏ជិតស្និទ្ធរបស់ស្ថាប័នអក្សរសម្ងាត់វៀតណាមជាមួយកម្ពុជា ដោយលោករដ្ឋមន្ត្រី បង្ហាញការជឿជាក់លើផែនការសហប្រតិបត្តិការរវាងស្ថាប័នអក្សរសម្ងាត់ប្រទេសទាំងពីរនឹងកាន់តែផ្ដល់ផលវិជ្ជមាន។

ការលើកឡើងរបស់រដ្ឋមន្ត្រីក្រសួងមហាផ្ទៃ ធ្វើឡើងបន្ទាប់ពីផែនការសហប្រតិបត្តិការឆ្នាំ២០២៦ លើវិស័យអក្សរសម្ងាត់ រវាងក្រសួងមហាផ្ទៃកម្ពុជា និងគណៈអក្សរសម្ងាត់វៀតណាម ត្រូវបានចុះហត្ថលេខាកាលពីថ្ងៃទី៩ ខែធ្នូ ឆ្នាំ២០២៥ នៅរាជធានីភ្នំពេញ។

ក្នុងជំនួបជាមួយលោក ង្វៀន ហៀវហុង អនុប្រធានអក្សរសម្ងាត់រដ្ឋាភិបាលវៀតណាម នាព្រឹកថ្ងៃទី១០ ខែធ្នូនេះ លោក ស សុខា ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃបានចាត់ទុកផែនការសហប្រតិបត្តិការរវាងស្ថាប័នអក្សរសម្ងាត់របស់កម្ពុជា និងវៀតណាម នឹងរួមចំណែកយ៉ាងសំខាន់ក្នុងការលើកម្ពស់ទំនាក់ទំនង និងកិច្ចសហប្រតិបត្តិការរវាងប្រទេសទាំងពីរកាន់តែជិតស្និទ្ធក្នុងវិស័យអក្សរសម្ងាត់។

លោក ស សុខា និងលោក ង្វៀន ហៀវហុង បានវាយតម្លៃខ្ពស់ចំពោះទំនាក់ទំនងវិស័យអក្សរសម្ងាត់រវាងភាគីទាំងពីរ ព្រោះវិស័យអក្សរសម្ងាត់ដើរតួនាទីសំខាន់ប្រៀបដូចជាខែលការពាររាល់ការសម្ងាត់របស់រដ្ឋាភិបាល ក្នុងការធានាសន្តិសុខជូនជាតិ និងប្រជាជន ដើម្បីបុព្វហេតុរួមនៃសុខសន្តិភាព ភាពសុខដុមរមនា ផ្ដល់លទ្ធភាពដល់ការបន្តការអភិវឌ្ឍសង្គមជាតិកាន់តែរីកចម្រើន។

ឧបនាយករដ្ឋមន្ត្រី ស សុខា បានអរគុណដល់គណៈអក្សរសម្ងាត់រដ្ឋាភិបាលវៀតណាម ដែលតែងតែផ្តល់កិច្ចសហការជិតស្និទ្ធក្នុងវិស័យអក្សរសម្ងាត់ ដោយនេះជាការរួមចំណែកយ៉ាងសំខាន់ដល់ការពង្រឹងពង្រីកទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ កម្ពុជា-វៀតណាម ជាពិសេសរវាងស្ថាប័នទាំងពីរ៕