អភិបាលខេត្តព្រះសីហនុ ថ្លែង​សារឱ្យមន្ត្រីកងកម្លាំងបង្កើតចលនាគំរូស្នាក់នៅក្នុងផ្ទះ​កាត់ផ្តាច់ខ្សែចម្លងកូវីដ១៩

អភិបាលខេត្តព្រះសីហនុ លោក គួច ចំរើន នៅថ្ងៃទី ២០ ខែមេសា ឆ្នាំ២០២១នេះ បានថ្លែងសារបន្ទាន់មួយជូនចំពោះមន្ត្រីរាជការ និងកងកម្លាំងប្រដាប់អាវុធគ្រប់ប្រភេទឱ្យណែនាំទៅក្រុមគ្រសាររបស់ខ្លួន និងបង្កើតជាចលនាគំរូ ស្នាក់នៅក្នុងផ្ទះដាច់ខាត លើកលែងតែចាំបាច់បំផុត ដែលត្រូវចាកចេញពីផ្ទះតែប៉ុណ្ណោះ។

លោកថា លើកលែងតែមន្ត្រីសារធារណៈដែលមានភារកិច្ចត្រូវធ្វើការ ក្រៅពីនោះ សូមឱ្យថ្នាក់ដឹកនាំមន្ត្រី និងសមាជិកគ្រួសារធ្វើជាគំរូ អំពីការស្នាក់នៅក្នុងផ្ទះមួយរយៈពេល ទើបអាចកាត់ផ្តាច់ខ្សែសង្វាក់នូវការចម្លងនេះ។

លោកគួច ចំរើនប្រាប់ថា តាមលទ្ធផលថ្ងៃនេះ ការឆ្លងទៅក្រុមគ្រួសាររបស់អាជីវករមានច្រើនសន្ធឹកសន្ធាប់ ដូច្នេះប្រសិនបើមិនបានកាត់ផ្តាច់ទំនាក់ទំនងនេះ នឹងមានការឆ្លងរាលដាលច្រើនទៀត។

រដ្ឋបាលខេត្តព្រះសីហនុ បានបង្ហាញអត្តសញ្ញាណមនុស្សចំនួនមនុស្ស ១០៤នាក់វិជ្ជមានកូវីដ១៩ នៅថ្ងៃនេះជាករណីឆ្លងថ្មី ដែលភាគច្រើនជាអាជីវករផ្សារ និងក្រុមគ្រួសារ៕

អត្ថបទ៖ ឡេង ដេត