ឆ្នាំ ២០២៥ រដ្ឋាករទឹកមណ្ឌលគិរី តភ្ជាប់បណ្តាញទឹកស្អាតថ្មីជូនពលរដ្ឋជាង ២ពាន់គ្រួសារ

ក្នុងឆ្នាំ២០២៥ រដ្ឋាករទឹកមណ្ឌលគិរី បានតភ្ជាប់បណ្ដាញទឹកស្អាតថ្មីជូនប្រជាពលរដ្ឋក្នុងសង្កាត់ចំនួន ៤ នៅក្រុងសែនមនោរម្យ ស្មើនឹង ២ ៥៣១គ្រួសារ ដែលចំនួននេះមានកើនឡើង ៩.២៣% បើធៀបក្នុងឆ្នាំ២០២៤ មានបានតភ្ជាប់ជូនប្រជាពលរដ្ឋភ្ជាប់ត្រឹម ២ ៣២៧គ្រួសារ។ នេះបើយោងតាមរបាយការណ៍របស់រដ្ឋាករទឹកមណ្ឌលគិរី។ ចំនួន៤ សង្កាត់ដែលត្រូវបានរដ្ឋាករទឹកតភ្ជាប់ថ្មីក្នុងតំបន់សេវាកម្មក្នុងក្រុងសែនមនោរម្យរួមមាន សង្កាត់ស្ពានមានជ័យ ចំនួន១ ៥៥១គ្រួសារ សង្កាត់សុខដុម ៤៥៨ គ្រួសារ សង្កាត់មនោរម្យ ៤១៨គ្រួសារ និងសង្កាត់រមនា ចំនួន ១៥ គ្រួសារ។

រដ្ឋាករទឹកមណ្ឌលគិរី មានប្រភពទឹកស្អាត១កន្លែង និងមានប្រភពទឹកឆៅចំនួន៣កន្លែង ដែលបរិមាណទឹកផលិតប្រចាំឆ្នាំបានចំនួន ៩៦៩.៤០០ម៉ែត្រគូប កើនឡើង ១៤.៦៩%បើធៀបឆ្នាំ២០២៤ បានផលិតទឹកស្អាត  ៨៤៥.២២៤ ម៉ែត្រគូប ។ សម្រាប់សេវាតភ្ជាប់បណ្ដាញទឹកស្អាតពីរដ្ឋាករទឹកមណ្ឌលគិរី តម្រូវបង់ថ្លៃសេវាដំបូងក្នុងមួយដំណរ ចំនួន ៣៥៩.៥០០រៀល និងអតិជនប្រើប្រាស់ក្នុង១ម៉ែត្រគូបថ្លៃ ១៨០០-២០០០រៀល។

លោក សូរ សុវណ្ណារឹទ្ធ អគ្គនាយករដ្ឋាករទឹកមណ្ឌលគិរី ប្រាប់កម្ពុជាថ្មីថា ដើម្បីឆ្លើយតបតម្រូវការទៅនឹងកំណើនប្រជាជនប្រើប្រាស់ រដ្ឋាករទឹក មានផែនការពង្រីកហេដ្ឋារចនាសម្ព័ន្ធសេវាកម្មទឹកស្អាតនៅឆ្នាំ២០២៦-២០៣០។ ក្នុងផែនការនេះ រដ្ឋាករទឹកមណ្ឌលគិរី នឹងពង្រីកដំណរសេវាទឹកស្អាតដល់ខ្នងផ្ទះជូនប្រជាពលរដ្ឋដែលរស់នៅឆ្ងយពីទីប្រជុំជនបន្ថែមទៀត។ ដោយឡែកសម្រាប់ស្រុកអូររាំងរដ្ឋាទឹកមណ្ឌលគិរី បានបង្កើតរោងចក្រជំរុញទឹកមកកាន់ក្រុងសែនមនោរម្យ។ លោកថ្លែងប្រាប់ទៀតថា៖« បើសិនជាមានប្រជាពលរដ្ឋរស់នៅក្នុងស្រុកអូររាំងមានការស្នើសុំតភ្ជាប់សេវាកម្មទឹកស្អាត ហើយមានការអនុញ្ញាតពីក្រសួង រដ្ឋាករទឹកនឹងធ្វើការតភ្ជាប់ជូនប្រជាពលរដ្ឋឱ្យបានប្រើប្រាស់តាមលំនៅដ្ឋានផងដែរ»។

គួរជម្រាបថា ពលរដ្ឋដែលរស់នៅតាមបណ្ដាស្រុកនានា ក្នុងខេត្តមណ្ឌលគិរី មានស្ថានភាពប្រើប្រាស់ទឹកខុសៗគ្នា ដោយគ្រួសារខ្លះប្រើប្រាស់ទឹកដែលផ្គត់ផ្គង់ដោយរដ្ឋាករទឹកនៃស្ថាប័នរដ្ឋ ខណៈតំបន់ខ្លះទៀតទទួលបានទឹកពីក្រុមហ៊ុនឯកជន ហើយតំបន់ដាច់ស្រយាលមួយចំនួន នៅពុំទាន់មានទឹកស្អាតសម្រាប់ប្រើប្រាស់នៅឡើយទេ៕

អត្ថបទ៖រៀម សុខហេង