រដ្ឋមន្ត្រីមហាផ្ទៃចង្អុលឱ្យអាជ្ញាធរខេត្តបាត់ដំបងបន្តបង្ក្រាបបទល្មើសគ្រប់ប្រភេទ រាប់ទាំង Online Scams

យកពេលអញ្ជើញជាអធិបតីភាពក្នុងពិធីបិទសន្និបាតការងាររបស់រដ្ឋបាលខេត្តបាត់ដំបងកាលពីរសៀលថ្ងៃទី២០ ខែមករា ឆ្នាំ២០២៦ លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ ជំរុញដល់អាជ្ញាធរខេត្តមួយនេះឱ្យយកចិត្តទុកដាក់បង្ក្រាបបទល្មើសគ្រប់ប្រភេទ ដែលកើតមាននៅក្នុងមូលដ្ឋាន ធ្វើយ៉ាងណាធានាឱ្យបានសន្តិសុខ សណ្ដាប់ធ្នាប់សង្គម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧបនាយករដ្ឋមន្ត្រី ស សុខា បានណែនាំដល់មន្ត្រីរាជការ កងកម្លាំងប្រដាប់អាវុធ ក៏ដូចជាអាជ្ញាធរពាក់ព័ន្ធគ្រប់លំដាប់ថ្នាក់ក្នុងខេត្តបាត់ដំបងឱ្យបង្កើនប្រសិទ្ធភាពបង្ក្រាប និងទប់ស្កាត់រាល់បទល្មើសគ្រប់ប្រភេទ ជាមួយនឹងការបន្តយកចិត្តទុកដាក់ខ្ពស់លើការអនុវត្ត និងផ្សព្វផ្សាយគោលនយោបាយ ភូមិឃុំសង្កាត់មានសុវត្ថិភាព ឱ្យកាន់តែមានភាពផុសផុល និងសកម្មខ្លាំងក្លាជាងមុនទ្វេដង។

លោក បានលើកឡើងថា អាជ្ញាធរខេត្តបាត់ដំបងត្រូវតែបន្តបង្ក្រាបឱ្យបាននូវរាល់បទល្មើសផ្សេងៗ រួមមាន លួច ឆក់ ប្លន់ ក្មេងទំនើង គ្រឿងញៀន ល្បែងស៊ីសងខុសច្បាប់ កម្ចីអនឡាញ និងបទល្មើសឆបោកតាមប្រព័ន្ធបច្ចេកវិទ្យា (Online Scams) ដែលកើតមាននៅក្នុងមូលដ្ឋានខេត្តបាត់ដំបង។

ពីវេទិកាខាងលើ រដ្ឋមន្ត្រីក្រសួងមហាផ្ទៃ ក៏បានបង្ហាញក្តីបារម្ភចំពោះគ្រោះថ្នាក់ចរាចរណ៍ ដែលកំពុងមានសន្ទុះហក់ឡើងគួរឱ្យកត់សម្គាល់ក្នុងរយៈពេលចុងក្រោយនេះ មិនថាតែក្នុងខេត្តបាត់ដំបងនោះទេ ប៉ុន្តែកំពុងប្រឈមនៅទូទាំងប្រទេស។សម្រាប់លោក ស សុខា បញ្ហានេះបានក្លាយជារឿងដ៏គួរឱ្យព្រួយបារម្ភបំផុតសម្រាប់សន្តិសុខ និងសុវត្ថិភាពសង្គមជាតិដោយត្រូវរឹតបន្តឹងច្បាប់ចរាចរណ៍ផ្លូវគោក ដើម្បីការពារសុខសុវត្ថិភាពជូនប្រជាពលរដ្ឋ។

ប៉ុន្តែលោក សង្កត់ធ្ងន់ថា ការទប់ស្កាត់គ្រោះថ្នាក់ចរាចរណ៍ទាមទារជាចាំបាច់នូវការចូលរួមយ៉ាងសកម្ម និងកិច្ចសហការគ្នាយ៉ាងជិតស្និទ្ធពីគ្រប់ភាគីពាក់ព័ន្ធទាំងអស់ រាប់ចាប់តាំងពីមន្ត្រីអនុវត្តច្បាប់ រហូតដល់ពលរដ្ឋគ្រប់រូបក្នុងនាមជាអ្នកប្រើប្រាស់ផ្លូវថ្នល់៕