ប្រធានមណ្ឌលអប់រំកែប្រែទី១ ជួបជាមួយមន្ត្រីស្ថានទូតកូរ៉េខាងត្បូង ដើម្បីស្វែងរកកិច្ចសហការរវាងភាគីទាំងពីរ

លោកឧត្តមអគ្គារនុរក្ស.១ នុត សវនា អគ្គនាយករងនៃអគ្គនាយកដ្ឋានពន្ធនាគារ និងជាប្រធានមណ្ឌលអប់រំកែប្រែទី១ បានទទួលជួបពិភាក្សាការងារជាមួយលោក ណាំ សុក យ៉ុន លេខាធិការទី២ និងជាអនុកុងស៊ុលនៃស្ថានទូតកូរ៉េប្រចាំនៅកម្ពុជា ដើម្បីផ្លាស់ប្ដូរយោបល់លើកិច្ចសហការរវាងភាគីទាំងពីរ។

ក្នុងកិច្ចពិភាក្សា ដែលធ្វើឡើងកាលពីរសៀលថ្ងៃទី១៦ ខែកុម្ភៈ ឆ្នាំ២០២៦ លោក នុត សវនា ប្រាប់ទៅកាន់លោក ណាំ សុក យ៉ុន ពីស្ថានភាពទូទៅរបស់មណ្ឌល ក្របខ័ណ្ឌច្បាប់ក្នុងការគ្រប់គ្រង និងការងារស្តារនីតិសម្បទាជនជាប់ឃុំ ទាំងជនជាតិខ្មែរ និងជនបរទេស។ បើតាមលោកប្រធានមណ្ឌល បច្ចុប្បន្ននៅមណ្ឌលអប់រំកែប្រែទី១ គឺមានអ្នកជាប់ឃុំចំនួន ៣៩ជាតិសាសន៍ ដែលកំពុងអនុវត្តទោសក្នុងមណ្ឌល ក្នុងនោះក៏មានជនជាប់ឃុំជាជនជាតិកូរ៉េចំនួន១៩នាក់។

ក្រៅពីបានពិភាក្សាពីក្របខ័ណ្ឌច្បាប់ ភាគីទាំងពីរ ក៏បានពិភាក្សាពីក្របខ័ណ្ឌបច្ចេកទេស និងការដោះស្រាយលើបញ្ហាប្រឈមរួមគ្នា។ លោក ណាំ សុក យ៉ុន បានលើកឡើងពីកិច្ចសហការដ៏ល្អរវាងស្ថានទូតកូរ៉េ និងមណ្ឌលអប់រំកែប្រែទី១ កាន់តែមានទំនាក់ទំនងល្អបន្ថែមទៀតទៅថ្ងៃអនាគត។

លោក ក៏បានលើកឡើងពីការត្រៀមខ្លួនរួមចណែកជួយដល់មណ្ឌលបើមណ្ឌលអប់រំកែប្រែទី១ ទៅតាមលទ្ធភាពដែលលោកអាចជួយបានផងដែរ៕