ទិវាជាតិអំណានលើកទី១១ នឹងមានការរៀបចំពិព័រណ៍សៀវភៅរយៈពេល៥ថ្ងៃ ក្នុងខែមីនាខាងមុខ

ក្រសួងអប់រំ យុវជន និងកីឡា, ក្រសួងវប្បធម៌ និងវិចិត្រសិល្បៈ រួមជាមួយក្រសួងព័ត៌មាន នឹងរៀបចំទិវាជាតិអំណានលើកទី១១ នាថ្ងៃទី១១ ខែមីនា ឆ្នាំ២០២៦ ខាងមុខ នៅវិទ្យាស្ថានបច្ចេកវិទ្យាកម្ពុជា (សាលាតិចណូ) ព្រមទាំងមានការពិព័រណ៍សៀវភៅរហូតដល់ ៥ថ្ងៃ។

ទិវាជាតិអំណានលើកទី១១ ឆ្នាំ២០២៦ នឹងរៀបចំក្រោមប្រធានបទ៖ “សំណេរ និងអំណាន ក្នុងបរិបទថ្មី”។ ក្នុងកម្មវិធីនោះ ក៏មានបាឋកថាស្តីពី “ប្រវត្តិភាសាខ្មែរ” ដោយបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាផងដែរ។ ទិវានេះ ក៏មានការពិព័រណ៍សៀវភៅរយៈពេល ៥ថ្ងៃ ចាប់ពីថ្ងៃទី១១​ ដល់ថ្ងៃទី ១៥ ខែមីនា។ បន្ថែមពីនេះ ក៏មានវេទិកាតុមូលលើប្រធានបទសម្រាំង និងវាគ្មិនពិសេស ៤រូប និងមានការប្រឡងប្រជែងតែងនិពន្ធប្រលោមលោកខ្នាតខ្លី “ខ្ញុំស្រឡាញ់ភូមិខ្ញុំ” និងអត្ថបទឧទាហរណ៍កថា “ការបណ្តុះមនសិការជាតិ” តាមរយៈវណ្ណកម្មរបស់អ្នកនិពន្ធ ជុត ខែ ផងដែរ។

គួររម្លឹកថា កាលពីឆ្នាំមុន ទិវាជាតិអំណានលើកទី១០ រៀបចំឡើង ថ្ងៃទី១១ ខែមីនា ឆ្នាំ២០២៥ ក្រោមប្រធានបទ “ការអានផ្សារភ្ជាប់អន្តរជំនាន់មនុស្សក្នុងសង្គម ” នៅវិទ្យាស្ថានបច្ចេកវិទ្យាកម្ពុជា (សាលាតិចណូ)។ បើតាមក្រសួងអប់រំ ធ្លាប់បញ្ជាក់ថា ទិវាជាតិអំណាន ត្រូវបានប្រារព្ធឡើងនៅថ្ងៃទី១១ ខែមីនា ជារៀងរាល់ឆ្នាំ ដែលជាថ្ងៃប្រសូត្ររបស់សម្តេចព្រះសង្ឃរាជ ជួន ណាត ដើម្បីរម្លឹកដល់ស្នាដៃ និងការចូលរួមអភិរក្សភាសាខ្មែរ និងចងក្រងវចនានុក្រមខ្មែរ ដែលមានការទទួលស្គាល់ និងប្រើប្រាស់មកដល់ពេលបច្ចុប្បន្ន ក៏ដូចជាមានគោលបំណង បន្តបណ្ដុះទម្លាប់អាននិងសរសេរ ជំរុញវប្បធម៌អាន លើកកម្ពស់សមត្ថភាពអាន ស្មូតកំណាព្យ និងការតែងនិពន្ធ សំដៅរួមចំណែកការពារ និងពង្រឹងវប្បធម៌ អរិយធម៌ខ្មែរ ដល់សិស្ស និស្សិត មន្ត្រីរាជការ ប្រជាជនគ្រប់រូប ក្នុងប្រទេសកម្ពុជា ឈានទៅសម្រេចគោលដៅអភិវឌ្ឍប្រកបដោយចីរភាព ដែលធានាគុណភាពអប់រំប្រកបដោយសមធម៌ បរិយាបន្ន និងលើកកម្ពស់ការសិក្សាពេញមួយជីវិតសម្រាប់ទាំងអស់គ្នា៕