ព័ត៌មានជាតិ

រដ្ឋបាលខេត្តស្វាយរៀង រៀបចំយុទ្ធនាការសម្អាតក្រុង អបអរសាទរ ទិវាជាតិទីក្រុងស្អាត លើកទី ១៣ ក្រោមប្រធានបទ«សាមគ្គីដើម្បីទីក្រុងស្អាត»

បានផុស

៤ ខែ មុន

នៅ

ថ្ងៃព្រហស្បតិ៍ ១៩ មីនា ២០២៦

ដោយ

នាព្រឹកថ្ងៃទី ១៩ ខែមីនា ឆ្នាំ ២០២៦ នេះ រដ្ឋបាលខេត្តស្វាយរៀង បានរៀបចំពិធីបញ្ជ្រាបការយល់ដឹង និងយុទ្ធនាការសម្អាតទីក្រុង ដើម្បីចូលរួមអបអរសាទរ «ទិវាជាតិទីក្រុងស្អាត លើកទី ១៣ ឆ្នាំ ២០២៦» ក្រោមប្រធានបទ «សាមគ្គីដើម្បីទីក្រុងស្អាត» នៅបរិវេណរង្វង់មូលវិមានឯករាជ្យ ក្រុងស្វាយរៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីនេះប្រព្រឹត្តឡើងក្រោមអធិបតីភាព លោក សេង សីលា អភិបាលរងខេត្ត តំណាងដ៏ខ្ពង់ខ្ពស់ លោកអភិបាល នៃគណៈអភិបាលខេត្តស្វាយរៀង ដោយមានការអញ្ជើញចូលរួមពីសំណាក់ព្រះសង្ឃ មន្ត្រីរាជការជុំវិញខេត្ត កងកម្លាំងប្រដាប់អាវុធ លោកគ្រូ អ្នកគ្រូ សិស្សានុសិស្ស យុវជន ស.ស.យ.ក និងប្រជាពលរដ្ឋយ៉ាងច្រើនកុះករ។

ថ្លែងក្នុងឱកាសនោះ លោកអភិបាលរងខេត្ត បានគូសបញ្ជាក់ថា ការរៀបចំយុទ្ធនាការ នាថ្ងៃនេះ ធ្វើឡើងក្នុងគោលបំណងបង្កើនការយល់ដឹងដល់សាធារណជន ឲ្យកាន់តែយល់ច្បាស់អំពីតម្លៃ នៃអនាម័យ បរិស្ថាន និងសោភ័ណភាពទីក្រុង។

លោកបានបន្តថា ទីក្រុងស្អាត មិនមែនជាភារកិច្ចរបស់បុគ្គលណាម្នាក់នោះទេ ប៉ុន្តែទាមទារឲ្យមានការចូលរួមដោយស្មារតី «សាមគ្គី» និងការទទួលខុសត្រូវខ្ពស់ពីគ្រប់មជ្ឈដ្ឋានទាំងអស់ ដើម្បីធ្វើឲ្យក្រុងស្វាយរៀង ក្លាយជាទីក្រុងដែលគួរឲ្យចង់រស់នៅ និងមានភាពទាក់ទាញសម្រាប់ភ្ញៀវទេសចរ។

យោងតាមសេចក្ដីណែនាំរបស់រដ្ឋបាលខេត្ត យុទ្ធនាការនេះ រួមមានសកម្មភាពសំខាន់ៗ ដូចជា ៖ -ការអប់រំផ្សព្វផ្សាយ ៖ បញ្ជ្រាបការយល់ដឹងអំពីការទុកដាក់សំរាមឲ្យបានត្រឹមត្រូវ និងការកាត់បន្ថយការប្រើប្រាស់ប្លាស្ទិក។ -សកម្មភាពអនាម័យផ្ទាល់ ៖ ការចុះប្រមូលសំរាមតាមដងផ្លូវ សួនច្បារសាធារណៈ និងតាមបណ្ដាផ្សារនានា ក្នុងក្រុងស្វាយរៀង។ -ការលើកសោភ័ណភាព ៖ ការរៀបចំទង់ជាតិ ទង់សាសនា ទង់ព្រះមហាក្សត្រ និងបដាពាក្យស្លោកនៅតាមមន្ទីរ អង្គភាព និងសាលាក្រុង-ស្រុក។

បន្ទាប់ពីកិច្ចប្រជុំជួបជុំ លោកអភិបាលរងខេត្ត រួមជាមួយមន្ត្រីរាជការ និងយុវជន បានចុះធ្វើយុទ្ធនាការសម្អាតតាមដងផ្លូវសំខាន់ៗ ក្នុងក្រុងស្វាយរៀង ប្រកបដោយភាពស្និទ្ធស្នាល និងស្មារតីសាមគ្គីភាពខ្ពស់។ សកម្មភាពនេះ មិនត្រឹមតែជាការអបអរសាទរទិវាជាតិទីក្រុងស្អាតប៉ុណ្ណោះទេ ប៉ុន្តែក៏ជាការដាស់តឿនស្មារតីឲ្យប្រជាពលរដ្ឋគ្រប់រូបបន្តចូលរួមថែរក្សាអនាម័យបរិស្ថានជាប្រចាំ ដើម្បីលើកកម្ពស់មុខមាត់ខេត្តស្វាយរៀង ឲ្យកាន់តែស្រស់បំព្រងបន្ថែមទៀត៕

អត្ថបទ ៖ ភក្ដី