ព័ត៌មានជាតិ

រដ្ឋសភារៀបចំស្នាក់ការតាមខេត្តឡើងវិញដើម្បីភ្ជាប់ទំនាក់ទំនងកាន់តែជិតស្និតជាមួយពលរដ្ឋ

បានផុស

៣ ខែ មុន

នៅ

ថ្ងៃសុក្រ ២០ មីនា ២០២៦

ដោយ

ទីស្នាក់ការរដ្ឋសភាតាមខេត្តនីមួយត្រូវបានប្រធានសភា សម្ដេចសភាធិបតី ឃួន សុដារី បញ្ជាឱ្យរៀបចំ និងសាងសង់ថ្មី ជាជំហានថ្មីនៃយុទ្ធសាស្ត្រធ្វើទំនើបកម្មស្ថាប័ន និងភ្ជាប់ទំនាក់ទំនងកាន់តែជិតស្និតរវាងអ្នកតំណាងរាស្ត្រក្នុងមណ្ឌលជាមួយពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកខុទ្ទកាល័យប្រធានរដ្ឋសភា និងជាអ្នកនាំពាក្យ លោក កែវ ពិសិដ្ឋ បានឱ្យដឹងថាការរៀបចំមណ្ឌលសភាតាមខេត្តឡើងវិញនេះនឹងផ្ដល់សេវារបស់សភាដល់ពលរដ្ឋកាន់តែច្រើន រួមទាំងជំនួបរវាងអ្នកតំណាងរាស្ត្រនិងពលរដ្ឋក្នុងមណ្ឌលរបស់ខ្លួន ជាកន្លែងផ្ដល់ព័ត៌មានពីច្បាប់ រួមទាំងការបង្ហាញព័ត៌មានថ្មីៗពីរដ្ឋសភាដល់ពលរដ្ឋ ការ LIVE ផ្ទាល់នៃកិច្ចប្រជុំសភា និងជាកន្លែងទទួលបណ្ដឹងពីពលរដ្ឋផងដែរ។

លោកថា៖ «ជាទូទៅនៅសភារបស់យើងតែងតែទទួលនូវពាក្យបណ្ដឹងពេលដែលប្រជាជនគាត់ដាក់ប្ដឹងពេលដែលមានអារម្មណ៍ថាខ្លួនឯងហ្នឹងទទួលរងរឿងអយុត្តិធម៌ណាមួយ។ អ៊ីចឹងអ្នកតំណាងរាស្ត្រតែងតែទទួលពាក្យបណ្ដឹងរបស់គាត់ហើយតែងតែពិនិត្យនិងធ្វើការជាមួយក្រសួងស្ថាប័នពាក់ព័ន្ធដើម្បីដោះស្រាយបញ្ហាពលរដ្ឋជាប្រចាំ។ អ៊ីចឹងស្នាក់ការសភានៅតាមខេត្តនានានឹងដើរតួនាទីកាន់តែសំខាន់ថែមទៀតសម្រាប់ការផ្សព្វផ្សាយពីច្បាប់ និងតួនាទីភារកិច្ចរបស់សភាកាន់តែជិតជាមួយប្រជាជនថែមទៀត និងចូលរួមចំណែកជួយសម្រួលដល់ប្រជាពលរដ្ឋផងដែរ»។

និស្សិតឆ្នាំទី២ ផ្នែកច្បាប់នៅសាកលវិទ្យាល័យជាតិគ្រប់គ្រង លោក អុន ថារិទ្ធ គាំទ្រចំពោះការរៀបចំស្នាក់ការសភាតាមខេត្តឡើងវិញនេះដោយថាទីតាំងនេះនឹងក្លាយជាទីតាំងជំនួបរវាងពលរដ្ឋនិងអ្នកតំណាង ក្លាយជាជាទីពឹង និងជាការជួយដោះស្រាយបញ្ហារបស់ប្រជាពលរដ្ឋនៅមូលដ្ឋាន។

លោកបន្ថែមថា៖ «អ៊ីចឹងដូចថាមានមណ្ឌលអ្នកតំណាងរាស្ត្រនៅកំពង់ចាមវាបានផ្សារភ្ជាប់រវាងអ្នកតំណាងនឹងប្រជាពលរដ្ឋ ពេលដែលប្រជាពលរដ្ឋមានបញ្ហាប្រជាពលរដ្ឋមានសំណូមពរគឺប្រជាពលរដ្ឋអាចទៅប្រាប់តំណាងរាស្ត្រហើយតំណាងរាស្ត្រយកអ្វីដែលជាទុក្ខលំបាកបញ្ហាប្រឈមរបស់ប្រជាជនហ្នឹងទៅដោះស្រាយនៅសភាបានផងដែរ។ អ៊ីចឹងការធ្វើបែបនេះធ្វើឱ្យអាចនឹងងាយស្រួលក្នុងការដោះស្រាយនូវបញ្ហាជាតិហើយក៏ជាចំណែកមួយធ្វើឱ្យប្រទេសជាតិយើងមានការរីកចម្រើនផងដែរ»។

កម្ពុជាមានអ្នកតំណាងរាស្ត្រចំនួន១២៥នាក់ ដែលត្រូវបានបោះឆ្នោតជ្រើសតាំងរៀងរាល់៥ឆ្នាំម្ដងពីពលរដ្ឋដែលរស់នៅមណ្ឌលដែលអ្នកតំណាងឈរឈ្មោះទាំង២៥ ខេត្តរាជធានី។

កម្ពុជាក៏មានទីស្នាក់ការរដ្ឋសភានៅតាមខេត្តនីមួយៗផងដែរ និងត្រូវបានកែទម្រង់រៀបចំថ្មីជាបន្តបន្ទាប់ក្រោមអាណត្តិដឹកនាំរបស់ប្រធានសភាសម្ដេចសភាធិបតី ឃួន សុដារី ក្នុងអាណត្តិទី៧នេះ។ មកដល់ពេលនេះមានមណ្ឌល៤ហើយដែលត្រូវបានរៀបចំសាងសង់ជាថ្មីមានទីស្នាក់ការសភាខេត្តតាកែវ កំពង់ឆ្នាំ សៀមរាប និងក្រចេះ៕

អត្ថបទដោយ ហ៊ុន សិរីវឌ្ឍន៍

Related Topics:រដ្ឋសភា សម្ដេច ឃួន សុដារី

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា