អភិបាលខេត្តក្រចេះ ណែនាំរដ្ឋបាលក្រុង​ស្រុក ហាម​​​មិន​ឲ្យ​យកឡានពន្លត់អគ្គិភ័យទៅប្រើបាញ់​ទឹក​កម្សាន្ត​ថ្ងៃ​សង្រា្កន្តឆ្នាំថ្មី

អភិបាលខេត្តក្រចេះ លោក វ៉ា ថន បានណែនាំដល់រដ្ឋបាលក្រុងស្រុកត្រូវត្រួតពិនិត្យក្នុងការរៀបចំសង្រ្កាន្តចូលឆ្នាំថ្មី នៅតាមវត្តអារាមឬទីកន្លែងផ្សេងៗក្នុងមូលដ្ឋាន មិនតម្រូវឲ្យយករថយន្តពន្លត់អគ្គិភ័យទៅប្រើប្រាស់បាញ់ទឹកលេងសប្បាយតាមកន្លែងធ្វើសង្រា្កន្តនោះទេ។

ការជម្រុញណែនាំខាងលើនេះ ធ្វើឡើងនៅក្នុងកិច្ចប្រជុំបូកសរុបលទ្ធផលការងារប្រចាំខែមីនា និងលើកទិសដៅការងារបន្ត ឆ្នាំ២០២៦ របស់រដ្ឋបាលខេត្តក្រចេះ នាថ្ងៃទី០៨ ខែមេសា ឆ្នាំ២០២៦។

ស្របពេលដែលអាកាសធាតុកំពុងតែក្តៅស្ងួតខ្លាំង ដែលងាយនឹងបណ្តាលឲ្យមានគ្រោះអគ្គិភ័យកើតឡើងជាយថាហេតុ នៅគ្រប់ទីវត្តអារាម ទីកន្លែងគោរពសក្ការៈបូជា និងទីកន្លែងសប្បាយនានា អាជ្ញាធរខេត្តក្រចេះក៏ណែនាំក្រើនរំលឹក​ឲ្យប្រជាពលរដ្ឋ ត្រូវប្រុងប្រយ័ត្នខ្ពស់ចំពោះដើមហេតុដែលអាចបង្កើតឲ្យមានគ្រោះអគ្គិភ័យដូចជា ភ្លើងចង្ក្រាន ភ្លើងចង្កៀង ភ្លើង​ធូបទៀន ការតភ្ជាប់ ឬប្រើចរន្តអគ្គិសនីមិនត្រឹមត្រូវតាមលក្ខណៈបច្ចេកទេស ការទុកដាក់ប្រេងឥន្ធនៈ ឧស្ម័នចំហេះ វត្ថុងាយឆេះ ឬងាយផ្ទុះឆេះ ដោយត្រូវពិនិត្យឲ្យបានហ្មត់ចត់ បង្ការកុំឲ្យមានការឆេះរាលដាលបង្កើតជាគ្រោះអគ្គិភ័យដែលធ្វើឲ្យបាត់បង់ទាំងទ្រព្យសម្បត្តិ និងអាចបង្ករដល់អាយុជីវិត។

ចំពោះអាជ្ញាធរមូលដ្ឋាន និងកងកម្លាំងមានសមត្ថកិច្ចទាំងអស់ ត្រូវត្រៀមរៀបចំលក្ខណៈឲ្យបានគ្រប់គ្រាន់ក្នុងការបង្ការ ថែរក្សាសុខសណ្ដាប់ធ្នាប់ជូនពលរដ្ឋក្នុងមូលដ្ឋានរបស់ខ្លួន នាអំឡុងពិធីបុណ្យចូលឆ្នាំប្រពៃណីជាតិខ្មែរ។

អភិបាលខេត្តក្រចេះ បានជម្រុញឲ្យអាជ្ញាធរក្រុងស្រុក ដែលមិនទាន់មានកន្លែងធ្វើសង្ក្រាន្ត ត្រូវរៀបចំតាមវត្តអារាមណាមួយឲ្យបានទាន់ពេលវេលា ដើម្បីចូលរួមអបអរសាទរបុណ្យចូលឆ្នាំថ្មីប្រពៃណីជាតិខ្មែរ ដែលនឹង​ឈានចូលមកដល់នៅពេលខាងមុខនេះ ជាពិសេសឲ្យប្រជាពលរដ្ឋចូលរួមលេងល្បែងប្រជាប្រិយប្រពៃណីជាតិខ្មែរ ជំនួយវិញ ដើម្បីថែរក្សាអត្តសញ្ញាណជាតិដ៏ផូផង់របស់ខ្មែរផងដែរ៕

អត្ថបទ៖ ប្រុញ វិធិន