ស.ស.យ.ក និង រដ្ឋបាលខេត្តសៀមរាប បន្តរៀបចំសង្ក្រាន្តភៀសសឹកនៅមណ្ឌលសុវត្ថិភាពស្រុកស្រីស្នំ និង ស្រុកក្រឡាញ់

នៅថ្ងៃទី ៩ ខែមេសា ឆ្នាំ ២០២៦ នេះ ក្នុងស្មារតីចែករំលែកសេចក្ដីសុខ និងការយកចិត្តទុកដាក់ខ្ពស់ចំពោះប្រជាពលរដ្ឋភៀសសឹក សហភាពសហព័ន្ធយុវជនកម្ពុជា(ស.ស.យ.ក) រដ្ឋបាលខេត្តសៀមរាប រដ្ឋបាលស្រុកស្រីស្នំ និង រដ្ឋបាលស្រុកក្រឡាញ់ បានសហការរៀបចំអបអរសាទរពិធីបុណ្យចូលឆ្នាំថ្មី ជាមួយគ្រួសារភៀសសឹក នៅមណ្ឌលសុវត្ថិភាពវត្តប្រាសាទបុទុមមោង និងវត្តពោធិក្រឡាញ់ ដើម្បីអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ដែលនឹងចូលមកដល់នាពេលឆាប់ៗ ខាងមុខ។

លោក ឡុត ញាន អភិបាលរងស្រុកស្រីស្នំ បានឱ្យដឹងថា ការរៀបចំកម្មវិធីនេះ បានបង្ហាញពីការយកចិត្តទុកដាក់ខ្លាំងពីសុខទុក្ខ ការលំបាក និងការរស់នៅរបស់ពលរដ្ឋភៀសសឹក កំពុងបន្តការស្នាក់នៅក្នុងមណ្ឌលសុវត្ថិភាពនានាក្នុងខេត្ត ដែលមិនទាន់អាចត្រឡប់ទៅកាន់លំនៅឋានវិញបាន ដោយសារការឈ្លានពានរបស់កងទ័ពថៃ។ លោកថា នេះជាទីតាំងទី ២ ដែលអាជ្ញាធរស្រុកស្រីស្នំ បានរៀបចំកម្មវិធីជួបជុំជាមួយគ្រួសារភៀសសឹកកំពុងស្នាក់នៅក្នុងមណ្ឌលសុវត្ថិភាព។

ដោយឡែក លោក សុខ ណារ៉េត អភិបាលស្រុកក្រឡាញ់ ក៏បានឱ្យដឹងដែរថា ការរៀបចំនេះមានកម្មវិធីជាច្រើន ដូចជា កម្មវិធីសាសនា ពិធីក្រុងពាលី ពិធីពូនភ្នំខ្សាច់ ពិធីស្រង់ព្រះ ជូនលោកតា លោកយាយ ឪពុកម្ដាយ នៃគ្រួសារភៀសសឹក ទស្សនាការរាំរបាំប្រជាប្រិយ និងរាំកម្សាន្តស្គរដៃ ការលេងល្បែងប្រជាប្រិយ ចោលឈូង លាក់កន្សែង វាយក្អម ទាញព្រ័ត្រ ពិសានំបញ្ចុកសាមគ្គីទាំងអស់គ្នា និងពេលយប់ទស្សនាល្ខោនជាដើម។

ជាមួយនឹងការរៀបចំនេះដែរ ពលរដ្ឋភៀសសឹក បានថ្លែងអំណរគុណចំពោះថ្នាក់ដឹកនាំគ្រប់ជាន់ថ្នាក់ ជាពិសេសអាជ្ញាធរខេត្តសៀមរាប និងអាជ្ញាធរស្រុក ដែលនៅតែបន្តយកចិត្តទុកដាក់ខ្ពស់ចំពោះពួកគាត់ ជាពិសេសនាឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ដែលមានរៀបចំកម្មវិធីសង្ក្រាន្តតាមតំបន់ភៀសសឹក បង្កើនការជួបជុំ សប្បាយរីករាយ និងផ្ដល់ភាពកក់ក្ដៅ ដោយមិនមានអារម្មណ៍ថាឯកោ៕
អត្ថបទ ៖ គឿនវេត