គណៈចលនាសាសនាឥស្លាមកម្ពុជា ប្រគល់សត្វ​គោជិត១០០ក្បាលជូនពលរដ្ឋខ្មែរឥស្លាមនៅខេត្តកោះកុង ដើម្បីអបអរសាទរពិធីបុណ្យរ៉ូយ៉ាហាជ្ជី

សត្វគោជិត១០០ក្បាល ត្រូវបានគណៈចលនាសាសនាឥស្លាមកម្ពុជា ចែកប្រគល់ជូនដល់ប្រជាពលរដ្ឋខ្មែរឥស្លាមនៅទូទាំងខេត្តកោះកុង ក្នុងឱកាសពិធីបុណ្យរ៉ូយ៉ាហាជ្ជី នាពេលខាងមុខ នៅវិហារភូមិ៤ សង្កាត់ដងទង់ ក្រុងខេមរភូមិន្ទ។

សត្វគោទាំងនេះ ជាអំណោយរបស់អង្គការមូលនិធិអាស៊ានដើម្បីការអប់រំ និងអភិវឌ្ឍន៍ ដឹកនាំដោយតំណាងលោក អូស្មាន ហាស្សាន ទេសរដ្ឋមន្រ្តីទទួលបន្ទុកបេសកម្មពិសេស និងជាប្រធានគណៈចលនាសាសនាឥស្លាមកម្ពុជា និងលោក សុះ ម៉ាត់លី សមាជិកក្រុមប្រឹក្សាខេត្តកោះកុង យកទៅប្រគល់ជូនពលរដ្ឋខ្មែរឥស្លាមជានិមិត្តរូប ដើម្បីអបអរសាទរពិធីបុណ្យរ៉ូយ៉ាហាជ្ជី។

បើតាមលោក ម៉ន គ្រីយ៉ា តំណាងគណៈចលនាសាសនាឥស្លាមកម្ពុជា បានឱ្យដឹងនៅថ្ងៃទី២៥ ខែឧសភា ឆ្នាំ២០២៦ថា សត្វគោដែលប្រគល់ជូនគណៈអ៊ីមុំានៅតាមក្រុងស្រុកទាំង៧នៅពេលនេះ ក្នុងគោលបំណងរៀបចំធ្វើពិធីបុណ្យ រ៉ូយ៉ាហាជ្ជី ប៉ុណ្ណោះមិនមែនយកទៅចិញ្ចឹម ឬលក់ដូរអ្វីឡើយ។

លោក គ្រីយ៉ា បន្តអំពាវនាវដល់ពលរដ្ឋខ្មែរឥស្លាមនៅខេត្តកោះកុង បន្តគាំទ្ររាជរដ្ឋាភិបាល​កម្ពុជា និងគោលនយោបាយសុខដុមរមនីយកម្ម ធ្វើឱ្យបង​ប្អូន​សាសនិក​ឥស្លាមកម្ពុជា​មាន​លទ្ធភាព​បរិច្ចាកទ្រព្យសម្បត្ដិ របស់ខ្លួនចូលរួមធ្វើបុណ្យ និងមានលទ្ធភាព​បានទៅ​ចូលរួមធ្វើ​បុណ្យ​ហាជ្ជី​​នៅ​ទីក្រុង​ម៉ាកះ ប្រទេស​អារ៉ាប៊ីសា​អូឌីតរៀងរាល់ឆ្នាំ។

តំណាងគណៈចលនាសាសនាឥស្លាមកម្ពុជា ស្នើឱ្យពលរដ្ឋបង្កើនការប្រុងប្រយ័ត្នចំពោះការចេញទូកទៅនេសាទនៅឯសមុទ្រ ជំរុញដល់កូនចៅទៅសិក្សាឱ្យបានគ្រប់គ្នា ថែរក្សាបរិស្ថានសោភណ្ឌភាពអនាម័យ និងសុខសន្តិភាពស្ថេរភាពនយោបាយការអភិវឌ្ឍន៍។ ​ប្រមុខថ្នាក់ដឹក​នាំរាជរដ្ឋាភិបាលកម្ពុជា គោរពសាសនាព្រះពុទ្ធប៉ុន្តែបានយកចិត្ត​ទុកដាក់​គិតគូរដល់សាសនិកឥស្លាមទាំងសេរីភាពការរស់នៅ សិទ្ធិ​គោរព​ប្រតិបត្តិ​​​សាសនាយ៉ាងពេញលេញដូចអ្នកគោរពសាសនាដទៃទៀតហើយសាសនាទាំងអស់ មានសុខដុមរមនីកម្ម ជាមួយគ្នាដោយគ្មានការរើសអើងចំពោះសាសនាណាមួយឡើយដោយសារគោលនយោបាយដ៏ត្រឹមត្រូវរបស់គណបក្សប្រជាជនកម្ពុជា។

ចំណែកលោក ជា សូវី អភិបាលរងខេត្តកោះកុង លើកឡើងថា ឈរលើមូលដ្ឋានសុខសន្តិភាព និងស្ថេរភាពនយោបាយ រាជរដ្ឋាភិបាលកម្ពុជា បានយកចិត្តទុកដាក់ និងគិតគូរលើការអភិវឌ្ឍវិស័យសាសនា ដែលក្នុងនោះបានផ្ដល់នូវសិទ្ធិសេរីភាពខាងជំនឿ និងសាសនា តាមរយៈការសាងសង់ វត្តអារាម វិហារឥស្លាម និងវិហារសាសនាផ្សេងៗទៀត។

លោកអភិបាលរងខេត្ត បានបន្ថែមថា អាជ្ញាធរមន្ទីរជំនាញ មិនរើសអើងពណ៌សម្បុរ មានស្មារតីសាមគ្គី ស្រលាញ់រាប់អានគ្នាយ៉ាងទូលំទលាយនៅក្នុងសង្គម និងចូលរួមអភិវឌ្ឍសង្គមជាតិ។ ជាក់ស្តែងបច្ចុប្បន្ន ខេត្តកោះកុង មានវិហារឥស្លាមចំនួន១៣វិហារ សូរ៉ាចំនួន០៤ និងសាលាបង្រៀនអក្សរឥស្លាមមានចំនួន១៣សាលា ដើម្បីរួមចំណែកក្នុងការអប់រំស្មារតីផ្លូវចិត្តដល់ខ្មែរឥស្លាមនៅក្នុងខេត្ត៕

អត្តបទ៖ សិរីវឌ្ឍនៈ