ពលរដ្ឋខ្មែរឥស្លាមខេត្តសៀមរាប ជួយឧបត្ថម្ភគ្រឿងឧបភោគបរិភោគ និងថវិកាដល់ទាហានខ្មែរ និងពលរដ្ឋជម្លៀសខ្លួន

ប្រជាពលរដ្ឋខ្មែរឥស្លាមខេត្តសៀមរាប ចូលរួមឧបត្ថម្ភគ្រឿងឧបភោគបរិភោគ និងថវិកាដល់ទាហានខ្មែរ និងពលរដ្ឋជម្លៀសខ្លួនតាមរយៈលោក អែល សៀត សមាជិកក្រុមប្រឹក្សាខេត្ត និងជាអនុប្រធានសាសនាឥស្លាមខេត្តសៀមរាប នារសៀលថ្ងៃទី ២៦ ខែកក្កដា ឆ្នាំ២០២៥។

លោក ប្រាក់ សោភ័ណ អភិបាលខេត្តសៀមរាបបានថ្លែងអំណរគុណចំពោះទឹកចិត្តដ៏ស្មោះសររបស់ ប្រជាពលរដ្ឋខ្មែរឥស្លាមដែលមានស្មារតីស្រលាញ់ជាតិដោយបានចូលរួមឧបត្ថម្ភគ្រឿងឧបភោគបរិភោគនិងថវិកាដើម្បីគាំទ្រ ដល់សមរភូមិជួរមុខ គ្រួសារទ័ព និងប្រជាជនដែលបានជម្លៀសពីតំបន់សមរភូមិចូលមកភូមិសាស្ត្រខេត្តសៀមរាប ដោយទឹកចិត្តស្មោះសរក្នុងការរួបរួមជាតិខ្មែរជាធ្លុងមួយដោយស្មារតីខ្មែរជួយខ្មែរក្នុងគ្រាលំបាក។

ក្នុងឱកាសនោះដែរ លោក អភិបាលខេត្តក៏បានថ្លែងអំពាវនាវដល់ ម្ចាស់ក្រុមហ៊ុន សហគ្រាស ពាណិជ្ជករ អាជីវករ និងប្រជាពលរដ្ឋដែលនៅតាមបណ្តាក្រុង ស្រុក អាចចូលរួមបន្តឧបត្ថម្ភគាំទ្រនូវគ្រឿងឧបភោគបរិភោគ និងសម្ភារប្រើប្រាស់បានតាមរយៈក្រុង ស្រុកផ្ទាល់ ឬតាមរយៈរដ្ឋបាលខេត្តសៀមរាបបានផងដែរ ។

លោក អែល សៀត  តំណាងឲ្យពលរដ្ឋខ្មែរឥស្លាមខេត្តសៀមរាប ក៏បានថ្លែងថាដោយមានស្មារតីស្រលាញ់ជាតិ  និងដើម្បីរួមចំណែកការពារជាតិមាតុភូមិ ក្នុងនាមជាតិខ្មែតែមួយ ដូច្នេះហើយថ្នាក់ដឹកនាំសាសនាឥស្លាមខេត្តសៀមរាបក៏បានកៀរគរ ប្រជាពលរដ្ឋខ្មែរឥស្លាម បាននាំគ្នាចូលរួមបរិច្ចាគគ្រឿងឧបភោគបរិភោគរួមនិងថវិកាដើម្បីយកទៅជូនដល់វិរៈកងទ័ពសមរភូមិជួរមុខ តាមព្រំដែនកម្ពុជា-ថៃដែលកំពុងការពារពីចោរឈ្លានពានផងដែរ៕

ដោយ៖ គឿនវេត