ព័ត៌មានជាតិ

ខ្លាញ់គោពេញមួយរថយន្តយីឌុប ត្រូវបានកម្លាំងការិយាល័យផលិតកម្មនិងបសុព្យាបាលខេត្តតាកែវឃាត់ទុក

បានផុស

៥ years មុន

នៅ

ថ្ងៃពុធ ១២ ឧសភា ២០២១

ដោយ

រថយីឌុបដឹកខ្លាញ់គោកែឆ្នៃរួចមួយគ្រឿងត្រូវបានកម្លាំងការិយាល័យផលិតកម្មនិងបសុព្យាបាលខេត្តតាកែវធ្វើការឃាត់ទុក ក្នុងហេតុផលដឹកជញ្ជូនគ្មានច្បាប់អនុញ្ញាតត្រឹមត្រូវ ។

មានការដឹកជញ្ជូនខ្លាញ់គោកែឆ្នៃរួចលោតឆ័ត្រមកពីរាជធានីភ្នំពេញឆ្ពោះទៅលក់នៅប្រទេសវៀតណាមមិនតិចជាង២០តោននោះទេ ត្រូវបានក្រុមមន្ត្រីជំនាញខេត្តតាកែវធ្វើការឃាត់ទុក សួររកច្បាប់អនុញ្ញាតដឹកជញ្ជូននាំចេញ។ ផ្អែកតាមសម្តីមន្ត្រីផលិតកម្មនិងបសុព្យាបាលខេត្តតាកែវបានឲ្យដឹងថា ការឃាត់រថយន្តខាងលើនេះធ្វើឡើងកាលពីយប់ថ្ងៃទី០៩ ខែឧសភា ឆ្នាំ២០២១ នៅចំណុចច្រករបៀងឫស្សី៣គុម្ភ ទឹកដីស្រុកគីរីវង់ ព្រំប្រទល់ប្រទេសវៀតណាម។

មន្ត្រីដដែលបង្ហើបថា ខ្លាញ់គោដែលកែឆ្នៃរួចទាំងអស់គឺមិនមានសារធាតុគីមីប៉ះពាល់សុខភាពទេ តែដែលឃាត់ទុកនេះ គឺក្នុងគោលបំណងឲ្យម្ចាស់ទៅរត់ការសុំច្បាប់អនុញ្ញាតិត្រឹមត្រូវពីមន្ត្រីជំនាញពាក់ព័ន្ធ ព្រោះតាមការពិនិត្យជាក់ស្តែងគឺពុំមានច្បាប់អ្វីទាំងអស់។

ជុំវិញករណីនេះ មកដល់ព្រឹកថ្ងៃទី១២ ខែឧសភា ឆ្នាំ២០២១នេះ ក៏នៅមិនទាន់អនុញ្ញាតឲ្យនាំចេញខ្លាញគោទៅលក់នោះទេ បន្ទាប់ពីឃាត់ទុករយៈពេលប៣ថ្ងៃមកហើយ ដោយមហាជនសង្ស័យថា តើអាចទេដែលឈ្មួញដឹកជញ្ជូនខ្លាញ់គោខាងលើ បង់លុយមិនគ្រប់ជាមួយមន្ត្រីពេទ្យសត្វខេត្តតាកែវទើបឃាត់រថយន្តទុកចរចារគ្នា ព្រោះរថយន្តធ្វើចរាចរតាំងពីភ្នំពេញមិនចាប់ទាំងដែលប៉ូលីសចរចរដាក់គោលដៅត្រួតពិនិត្យមិនតិចកន្លែងនោះទេ ហេតុអ្វីមកជាប់ទើត្រឹមពេទ្យសត្វខេត្តតាកែវទៅវិញ?

បច្ចុប្បន្នទាំងរថន្តនិងវត្ថុតាងកំពុងរក្សាទុកនៅការិយាល័យផលិតកម្មនិងបសុព្យាបាលខេត្តតាកែវដើម្បីដោះស្រាយតាមផ្លូវច្បាប់៕

អត្ថបទ ៖ វីរៈ