ព័ត៌មានជាតិ

គាស់បន្ទប់សាលាឃុំលួចបានលុយជាង២លានរៀល យកទៅឲ្យប្រពន្ធទុក និងសល់ខ្លះទិញថ្នាំញៀនជក់

បានផុស

៥ years មុន

នៅ

ថ្ងៃអង្គារ ១៨ ឧសភា ២០២១

ដោយ

ជនសង្ស័យម្នាក់ត្រូវបានសមត្ថកិច្ច បញ្ជូនខ្លួននិងវត្ថុតាងទៅសាលាដំបូងខេត្តកំពង់ឆ្នាំងនៅព្រឹកថ្ងៃទី១៨ ខែឧសភានេះ បន្ទាប់ពីសមត្ថកិច្ចនិងអាជ្ញាធរមូលដ្ឋានធ្វើការឃាត់ខ្លួនពីបទលួចលុយក្នុងសាលាឃុំក្តុលសែនជ័យ ស្រុកទឹកផុស ដែលបានប្រព្រឹត្តឡើងកាលពីថ្ងៃយប់ថ្ងៃទី១៥ ឈានចូលថ្ងៃទី១៦ ខែឧសភា ឆ្នាំ២០២១ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ម៉ឹង វិសាលសុខ មេឃុំក្តុលសែនជ័យ បានឲ្យដឹងថា នៅយប់ថ្ងៃទី១៥ ខែឧសភា មានជនសង្ស័យលួចគាស់ចូលក្នុងសាលាឃុំ ហើយបានលួចលុយរបស់សាលាឃុំដែលបម្រុងទុកចំនួន២ លាន៣០ម៉ឺនរៀល។ លុះព្រឹកថ្ងៃទី១៦ ខែឧសភា ទើបមន្ត្រីសាលាឃុំមកធ្វើការបានដឹង ហើយក៏បានរាយការណ៍និងចាត់ចែងឲ្យមានការស្រាវជ្រាវ រហូតដល់ចាប់ខ្លួនជនសង្ស័យបាន នៅរសៀលថ្ងៃទី១៧ ខែឧសភានេះ ដោយរកឃើញថ្នាំញៀនចំនួន១កញ្ចប់ធំ និង៣កញ្ចប់តូចផងដែរ ហើយបានប្រគល់ជូនសមត្ថកិច្ចនគរបាលខេត្ត ដើម្បីកសាងសំណុំរឿងតាមនីតិវិធី ។

មន្ត្រីនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តបានឲ្យដឹងថា ជនសង្ស័យខាងលើមានឈ្មោះ រ៉េត តិ អាយុ២៩ឆ្នាំ មានទីលំនៅភូមិអូរល្ពៅ ឃុំក្តុលសែនជ័យ ស្រុកទឹកផុស ។ ក្រោយការឃាត់ខ្លួន ជនសង្ស័យខាងលើបានសារភាពថា ពិតជាបានលួចលុយក្នុងសាលាឃុំក្តុលសែនជ័យពិតមែន ហើយបានយកប្រាក់ចំនួន១លាន៣០ម៉ឺនរៀលប្រគល់ឱ្យប្រពន្ធ និងសល់ប៉ុន្មានខ្លួនបានផឹកស៊ីនិងទិញថ្នាំញៀនប្រើប្រាស់អស់ទៅហើយ ។