ព័ត៌មានជាតិ

ចុះបង្ក្រាបគ្រឿងញៀនក្នុងខុនដូរមួយកន្លែង ឃាត់ខ្លួនជនជាតិចិនប្រុសស្រីជាង៦០នាក់

បានផុស

៤ years មុន

នៅ

ថ្ងៃពុធ ១៩ ឧសភា ២០២១

ដោយ

កម្លាំងសមត្ថកិច្ចម្រុះ នៃស្នងការដ្ឋាននគរបាលរាជធានីភ្នំពេញ បានបើកការឆ្មក់ចុះបង្ក្រាបគ្រឿងញៀនទ្រង់ទ្រាយធំមួយ ឃាត់ខ្លួនជនជាតិចិនប្រុសស្រីជាង៦០នាក់ នៅចំណុចខុនដូរមួយកន្លែងស្ថិតតាមបណ្តោយផ្លូវលេខ ៩៥ កែងផ្លូវលេខ២៨៨ ស្ថិតក្នុងសង្កាត់បឹងកេងកងទី២ ខណ្ឌបឹងកេងកង រាជធានីភ្នំពេញ កាលពីវេលាយប់ថ្ងៃទី១៨ ខែឧសភា ឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រង្វង់ប្រតិបត្តិការចុះបង្ក្រាបខាងលើ ធ្វើឡើងដោយមានការដឹកនាំកម្លាំងដោយលោកឧត្តមសេនីយ៍ត្រី តឹង សុធី ស្នងការរងនគរបាលរាជធានីភ្នំពេញ ទទួលដឹកនាំកម្លាំងអន្តរាគមន៍ពិសេស នៃស្នងការដ្ឋាននគរបាលរាជធានីភ្នំពេញ ហៅកាត់ ( SDU ) និងមានការចូលរួមពីសំណាក់នគរបាលការិយាល័យព្រហ្មទណ្ឌកម្រិតស្រាល និងនគរបាលការិយាល័យអន្តោប្រវេសន៍ផងដែរ។

តាមប្រភពព័ត៌មានឱ្យដឹងថា ការចុះបង្ក្រាប គឺធ្វើឡើងតាំងពីវេលាម៉ោង២០យប់ថ្ងៃទី១៨ រហូតដល់វេលាម៉ោង២រំលងអាធ្រាត្រឈានចូលថ្ងៃទី១៩ ខែឆ្នាំដដែល ទើបប្រតិបត្តិការត្រូវបានបញ្ចប់ ពោលគឺមានរយះពេល៧ម៉ោង នៃរង្វង់ប្រតិបត្តិការទាំងស្រុង។

ភ្នាក់ងារព័ត៌មានកម្ពុជាថ្មីចុះដល់កន្លែងទីតាំងរាយការណ៍ថា ដំបូងឡើយសមត្ថកិច្ចទទួលបានព័ត៌មានអំពីការប្រមូលផ្តុំជួបជុំគ្នានៅចំណុចខាងលើតែប៉ុណ្ណោះ មិនមែនគោលដៅចុះទៅចាប់គ្រឿងញៀននោះទេ លុះដល់ពេលចុះដល់កន្លែងកើតហេតុក៏ឃើញមានការជួបជុំផឹកស៊ី មានការប្រើប្រាស់គ្រឿងញៀន និងរកឃើញគ្រឿងញៀន ទើបធ្វើការឃាត់ខ្លួនតែម្តង។

សមត្ថកិច្ចចម្រុះ បានធ្វើការឃាត់ខ្លួនជនជាតិចិនប្រុសស្រីសរុបជាង៦០នាក់ និងរកឃើញមានវត្ថុតាងជាច្រើនពាក់ព័ន្ធនឹងគ្រឿងញៀន ប៉ុន្តែក្នុងនោះគេពុំដឹងថា មានការដកហូតបានថ្នាំញៀនប៉ុន្មានឡើយ។

ក្រោយការឃាត់ខ្លួន ជនជាតិចិនទាំងជាង៦០នាក់ ត្រូវបានកម្លាំងសមត្ថកិច្ច ធ្វើការបញ្ចូនខ្លួនទៅកាន់ស្នងការដ្ឋាននគរបាលរាជធានីភ្នំពេញ ដើម្បីចាត់ការទៅតាមនីតិវិធីច្បាប់ផងដែរ៕