ព័ត៌មានជាតិ

វិទ្យាល័យព្រះសីហនុ ក្រុងកំពង់ចាម នឹងក្លាយជាកន្លែងព្យាបាលអ្នកជំងឺកូវីដ-១៩

បានផុស

៥ years មុន

នៅ

ថ្ងៃសៅរ៍ ២២ ឧសភា ២០២១

ដោយ

កំពង់ចាម ៖ ក្រោយពីមានអ្នកជំងឺកូវីដបានឆ្លងរីករាលខ្លាំងក្នុងរយៈពេលចុងក្រោយនេះ រដ្ឋបាលខេត្តកំពង់ចាម ក្រោមការដឹកនាំពីសំណាក់ ឯកឧត្ដម អ៊ុន ចាន់ដា ប្រធានគណៈកម្មាធិការប្រយុទ្ធប្រឆាំងនឹងជំងឺកូវីដ-១៩ខេត្តកំពង់ចាម បានសម្រេចជ្រើសរើសយកវិទ្យាល័យព្រះសីហនុ ក្រុងកំពង់ចាម រៀបចំកែលម្អត្រៀមដាក់បរិក្ខាពេទ្យ ដើម្បីយកទីតាំងមួយនេះប្រែក្លាយទៅជាកន្លែងពិនិត្យព្យាបាលអ្នកជំងឺកូវីដ១៩បន្ថែមទៀត ក្រោយមន្ទីរពេទ្យមេគង្គកំពង់ចាមត្រូវបានពេញគ្រែខណៈមានអ្នកជំងឺកូវីដកើនឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែង នៅរសៀល ថ្ងៃទី ២២ ខែឧសភា ឆ្នាំ២០២១ ឯកឧត្ដម អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិការប្រយុទ្ធប្រឆាំងនឹងជម្ងឺកូវីដ-១៩ខេត្តកំពង់ចាម បានដឹកនាំមន្ត្រីជំនាញពាក់ព័ន្ធចុះពិនិត្យទីតាំងថ្មីមួយបន្ថែមទៀត សម្រាប់ធ្វើកន្លែងពិនិត្យព្យាបាលអ្នកជំងឺកូវីដ-១៩។

ដោយឡែក វិទ្យាល័យដីដុះ ក្រុងកំពង់ចាម នឹងប្រែក្លាយទៅជាមណ្ឌលចត្តាឡីស័កមួយទៀត សម្រាប់ក្រមខណ្ឌភូមិសាស្ត្រក្រុងកំពង់ចាម ប្រសិនបើមានអ្នកប៉ះពាល់ផ្ទាល់និង ប្រយោល ដើម្បីធ្វើចត្តាឡីស័កនៅទីនេះ ខណៈមណ្ឌលចត្តាឡីស័កគរុកោសល្យត្រូវបានបងប្អូនប្រជាពលរដ្ឋមកធ្វើចត្តាឡីស័កកើនឡើង។

អាជ្ញាធរខេត្តកំពង់ចាម នៅបន្តស្វែងរកស្រាវជ្រាវអ្នកដែលប៉ះពាល់ជាមួយអ្នកជំងឺកូវីដ១៩ ជាពិសេសទៅលើបងប្អូនកម្មករកម្មការនីតាមរោងចក្រដែលប្រឈមហានិភ័យចំនួនបួនរោងចក្រក្នុងស្រុកបាធាយ ស្រុកជើងព្រៃ និងស្រុកកំពង់សៀម។ ហើយអាជ្ញាធរខេត្តបានបន្តផ្សព្វផ្សាយរឹតបន្តឹងពីវិធានសុខាភិបាលដោយតម្រូវឲ្យពលរដ្ឋទាំងអស់ពេលធ្វើដំណើរ ឬ ប្រាស្រ័យទាក់ទងគ្នាធ្វើការពាក់ម៉ាស់ជាប្រចាំ និងអនុវត្តន៍គម្លាតសុវត្ថិភាពឲ្យបានខ្ជាប់ខ្ជួនតាមការណែនាំរបស់ក្រសួងសុខាភិបាល បីការពារបីកុំ និងពីរចូលរួម ដើម្បីជៀសឆ្ងាយពីការឆ្លងរីករាលដាលជំងឺកូវីដ១៩៕

អត្ថបទ និង រូបភាព លោក ហុង ម៉េងហៀ