ក្រុមមេធាវីស្ម័គ្រចិត្តសម្តេចតេជោសែន ជួយការពារសិទ្ធក្មេងស្រីរងគ្រោះអាយុ១៤ ឆ្នាំ ដែលត្រូវចាប់រំលោភ និងអារកប៉ងសម្លាប់

បន្ទាប់ពី​ទទួល​បាន​ដំណឹង​អំពី​ករណី​រំលោភ​សេពសន្ថវៈ និង​អាករ​ប៉ង​សម្លាប់ ទៅ​លើ​ក្មេង​ស្រី​អាយុ​១៤​ឆ្នាំ នៅ​ស្រុក​អណ្ដូង​មាស​ ខេត្ត​រតនគិរី លោក គី តិច ប្រធាន​ក្រុម​មេធាវី​ស្ម័គ្រចិត្ត​សម្ដេច​តេជោ​សែន បាន​ចាត់​​តាំង​ក្រុម​មេធាវី​ចុះ​ទៅ​ជួប​ក្រុម​គ្រួសារ និង​ជន​រងគ្រោះដើម្បីជួយការពារសិទ្ធិ ជូន​ក្មេង​ស្រី​រងគ្រោះក្នុងករណីនេះ។​

ទំព័រហ្វេសប៊ុករបស់ក្រុមមេធាវីស្ម័គ្រចិត្តសម្តេចតេជោសែនបានបង្ហោះនៅថ្ងៃទី ២៣ ខែឧសភានេះថា អនុប្រធាន​ក្រុម​មេធាវី​ស្ម័គ្រចិត្ត​សម្តេច​តេជោសែន ប្រចាំ​ខេត្ត​រតនគីរី និង​លោក​មេធាវី លី ទិត្យ​បូនាមី បាន​ចុះ​ជួប​គ្រួសារ​កុមារី​រង​គ្រោះ និង​ទទួល​ជួយ​ការ​ពារ​សិទ្ធ​ឱ្យ​ក្មេង​ស្រី​រង​គ្រោះ​អាយុ ១៤ ឆ្នាំ ក្នុង​ករណី​រំលោភ​សេពសន្ថវៈ និង​ប៉ង​សម្លាប់​ដើម្បីបំបិតភស្តុតាង។

កាលពីថ្ងៃទី៦ ខែ​ឧសភា ឆ្នាំ២០២១ វេលា​ម៉ោង១៨:៣០ នាទី​ល្ងាច មាន​ករណី​រំលោភ​សេពសន្ថវៈ​លើកុមារីម្នាក់អាយុ១៤ឆ្នាំ ស្ថិត​នៅចំណុចការដ្ឋានទី ៣ ក្រុមហ៊ុនហ័ងអញ ភូមិមុយ ឃុំញ៉ាង ស្រុកអណ្ដូងមាស ខេត្តរតនគិរី។

ជនល្មើសឈ្មោះ គា អាយុ៤១ឆ្នាំ បានរំលោភ និងបានអារក ក្មេងស្រីរងគ្រោះរហូតដាច់បំពងក និង​បាន​អូស​ក្មេង​ស្រី​រង​គ្រោះ​ទម្លាក់​ទៅ​ក្នុង​អូរ ក្នុង​បំណង​សម្លាប់​បំបិទ​ភស្តុតាង។ ជន​ល្មើស​បាន​រង​ចាំ​រហូត​ដល់​ក្មេង​ស្រី​ស្លាប់ ទើប​បាន​ចាក​ចេញ ប៉ុន្តែ​ដោយ​ក្មេង​ស្រី​រង​គ្រោះ​បាន​ធ្វើ​ពុតជាស្លាប់ ( អត់ដង្ហើមចំនួន១នាទី ) ទើប​ជន​ល្មើស​ចាក​ចេញ​ពី​កន្លែង​កើតហេតុ។

ក្មេង​ស្រីរងគ្រោះប្រឹងវាឡើងពីអូរមកខាងលើ ទើបមានអ្នកជួយ និងបានយកទៅសង្គ្រោះបន្ទាន់ នៅ​មន្ទីរពេទ្យ រួច​ផុត​ពីសេច​ក្តីស្លាប់។ សមត្ថកិច្ចកំពុងស្រាវជ្រាវរកចាប់ខ្លួន​ជនល្មើសយកមកផ្ដន្ទា​ទោស​តាមច្បាប់៕

អត្ថបទ៖ វុទ្ធឦសាន